Read Achang 2 HWANKTI 22 Bible Online

2 HWANKTI 22 - Achang bible

2 HWANKTI 22

¹Yosia gas xet zvn lyis Yuda hwankti bweh los las Yerusalem mas somhci dvzvn guon khoq. Nyah ungwes gas Bozkat wus mas Adaia lonyi Yedida nghuot.

²Yosia gas YHENSAIN dah nyoqlvtjvng mas jus khyvlyis kuot. Nyang gas nyah phauh thyeih Dawi dah cho chank loqwi loqyos ma i lo chank suh.

³Gvshih Yosia guon zis dvci xet zvn bos lyis hwankti ka Meshulam nyeilo, Azalia lo, lhaih soeu Shaphan lhyi Yhenmuh mas nhang lha taiq kat zis gas:

⁴Phudyei Zainsmuh Hilkia jyank mas doq loh las, hau Yhenmuh Khomh mas yvwons yoeus dah phudyei bang dius jens jyank masyah tsainh toh dah ngwis khanyhoq nghuot goeus zis nyei los aq.

⁵Nyang lyis, Hauh ngwis Yhenmuh lyis yoeuh guon bang loq mas dyei aq, oen aq. Nyamoq gas hauh ngwis lyis Yhenmuh dyoq loh zis soq bang nghuot dah soehfuh jens, Yhenmuh ci bang, luk tsan bang lyis dyei las chah dah thyeh yahge tsan goeus luk wis aq, oen taiq aq, ge.

⁷Nghuot laus eq hauh ngwis lyis lhom yoeus bang gas lomluk bang nghuot yvmvyah jyen ma suon xoeuq noh, ge.

⁸Phudyei Zainsmuh Hilkia gas lhaih soeu Shaphan lyis taiq zis gas, Ngos Yhenmuh mas Lyi sauhbuk nyvng, ge. Hilkia gas hauh zis Shaphan lhyi dyei las nyang nghap.

⁹Hauh thang lhyi lhaih soeu Shaphan ka hwankti jyank mas loh taiq zis gas, Nah jyeidwis jens Yhenmuh khau mha joq dah ngwis lyis tsainh las yoeuh gomh dah muh zwi bang lyis dyei goeus, ge.

¹⁰Nyang gas, Phudyei Hilkia ngos lyis haih sauhbuk dyei, ge taiq las hauh sauhbuk lyis hwankti lhyi nghap kyoh.

¹¹Hwankti hau Lyi buk mas dah dang xauhgyo lyis nyang nyah dyimis langchuiq.

¹²Phudyei Hilkia, Shaphan lo Ahikam, Mikhaia lo Akhobo, lhaih soeu Shaphan yahge hwankti dah joeui dyei Asaia moq lyis vmingh dyei zis gas:

¹³Hai nyvng dah sauhbuk mas dah jyauh cho yah sen lha ngah xiklyis, Yuda dius jens dvnganh xiklyis YHENSAIN lhyi loh nyei gyo geh: Yah phauh thyeih moq haih sauhbuk mas lhaih toh ma kuot ma gis dang lyis domsyos ma gyo yvmvyah, YHENSAIN ka yang lyis nhaiqyo, ge.

¹⁴Hilkia, Ahikam, Akhobo, Shaphan yahge Asaia moq gas, Yerusalem wus saiq doeus mas nyeis dah lvpe nyih Hulda lyis loh nyei. (Nyah yhensain phoq gas Harha nyeilo, Tikwa lo Shalum, yhenmuh dyixing zom soeu nghuot.) Nyamoq gas nyang lyis bweh cho taiq kyoh.

¹⁵Nyang nyamoq lyis taiq zis gas, YHENSAIN heisoeh ge: Namoq lyis ngah jyank mas nhang kat dah hwankti lhyi taiq aq,

¹⁶Yuda hwankti nghap goeus maussauh mas lhaih toh dang yah dvyhangteh ngos gas Yerusalem yahge houmha nyeis dius jens dvnganh lyis joeng das.

¹⁷Nyamoq gas ngos lyis tyamp las gohtoeu mangso jens lyis phudyei goeus las nyamoq kuot zis dvnganh yah ngos lyis nhaiqyo nhang goeus. Ngos Yerusalem lyis phuot phuot tsoeu shoq nhaiqyo las hauh ngah nhaiqyo nyi gas ma yoh sat lo.

¹⁸Haih zis gas Ngos YHENSAIN, Israel Mangso ka Yuda hwankti lyis taiq: Nvng gas hau sauhbuk mas lhaih toh zis lyis gyo goeus.

¹⁹Ngos Yerusalem yahge hau mha nyeis bang dvnganh lyis joeng das oen kyuk dang lyis nvng xauhgyo uhlyis, nhaiqlom thaiq las nvnyang gungs lyis ngah xikkhonh mas nyhen mha gyoh goeus, nah dyimis langchuiq las ngaus goeus. Ngos Yerusalem lyis gyukphoh joqyos, dius jens nhoengh uhlyis chi dah joqyos kuot das. Nghuot laus eq ngos nah dang lyis gyo dyei.

²⁰Nvng shei buisnyeis jweh shoq ngos Yerusalem wus lyis joeng das, oen dah cho lhyi ma bweh nhang das. Ngos nvng lyis nyenstap zis yah shei nhang das, ge. Housoeh nyamoq gas hauh dang hwankti jyank mas wons loh dyei.