Read Achang 2 HWANKTI 6 Bible Online

2 HWANKTI 6 - Achang bible

2 HWANKTI 6

¹Dvnyeih gas lvpe dvphung ka Elisha lyis taiq zis gas, Yoeuh aq, ngamoq nvng yah dvgeh zophuom dah joqyos gas ngamoq xiklyis sunk ngis.

²Housoeh las ngamoq gas Yodan lvng yvm mas e lha, nyang yuk nyang toeu saiq khwih las houmha nyeis joqyos kuot goh, ge. Nyang gas, Loh geh, ge phuk taiq.

³Nyamoq mas dvyuk gas nyang lyis nyamoq yah dvgeh loh goh, ge yus las nyang bauh zis yah,

⁴nyamoq dvgeh loh las Yodan lvng jweh lyis nyamoq saiq thoeuq.

⁵Nyamoq mas dvyuk saiq thoeuq nyeis lyis wuzung gas jeis mas gyot wvng loh. Nyang Elisha lyis kaiq taiq zis gas, Ngah yhensain eh, khasoeh kuot lo das au, hauh zis nghoh los dah wuzung dvnghuot, ge.

⁶Elisha nyei zis gas, Khamha gyoh, ge. Hauh soeu joqyos tuonh shet las Elisha wuseh dvkoeuq thyet las houmha doeuh kat lyis hauh wuzung gas jeis thoq mas dang doq los nhang.

⁷Nyang sang zis gas, E kui yoeus aq, ge las hauh soeu gop las hauh zis siq yoeus.

⁸Siria hwankti ka Israel jens yah jeszan nyeis. Nyang nyah zau jens yah joeui nyei las nyah thoenkgus jesdvp toh das joqyos khyen.

⁹Nghuot laus eq Elisha gas, Israel hwankti jyank mas dius nhang lha Siria jens gauh tamh joq yvmvyah, hauh joqyos lyis jhank aq, ge.

¹⁰Housoeh Israel hwankti ka hauh joqyos mas nyeis dius jens lyis zaih nhang lha nyamoq jeswus jens lyis nyoshoq lhain yoh jhank tyamp. Nyamoq gas jeswus jens loq masyah yoh luiq.

¹¹Hauh gvng mas Siria hwankti ehnyet svsoh gywes las nyang nyah zau jens lyis nyei zis gas, Namoq mas Israel hwankti shot hank nghuot, ge.

¹²Nyamoq mas zis dvyuk taiq zis gas, Ngah yhensain hwankti eh, hank ma bos. Nvng nah yhetyos mas taiq dah dang yangh Israel mau mas nyeis dah lvpe Elisha nyang Israel hwankti lhyi taiq kyoh nyeis, ge.

¹³Housoeh las hwankti ka, Ngos nyang lyis loh yoh nyhik shoq nyang khamha nyeis zis e xo geh, ge. Dvyuk nyang lyis, Elisha gas Dothan mas nyeis, ge taiq kyoh lyis,

¹⁴nyang gas hauh wus mas nyang yahge jeslhyingh yah jesphung zainsmuh nhang kat las nyamoq gas nyenh lyis hauh wus mas jweh loh las lhaink toh.

¹⁵Nungsnvp noq yah Elisha dah jyeidwis toq las nghe pheh thuq loh lyis nyang eq lhyingh eq dah Siria jesphung ka wus lyis lhaink toh zis nyvng. Nyang Elisha jyank tauh loh las kaiq taiq zis gas, Ngah yhensain eh, yang khasoeh kuot lo das lah, ge.

¹⁶Elisha toeuh zis gas, Vgyuk, yang yah nghuot bang gas nyamoq yah nghuot bang thoq lyis zes nyo, ge.

¹⁷Housoeh Elisha shvmanh dung zis gas, YHENSAIN eh! haih soeu yoh nyvng bas jungh nyah nyoqjeih jenh phank dyei aq, ge. YHENSAIN ka Elisha dah vkyuh dung dang gyo dyei las nyah jyeidwis yoeuh kat lyis hauh boms mas Elisha dah yvmlhaink yah nyi nyang jens yahge nyi lhyingh jens dyingh joq zis lyis nyvng.

¹⁸Siria jens Elisha lyis los zan lyis Elisha YHENSAIN lhyi shvmanh dung zis gas, Haih bang dah nyoq lyis jenh gos tyamp dyei aq, ge. YHENSAIN ka nyah vkyuh dung dang lyis gyo las, nyamoq lyis nyoq gos nhang.

¹⁹Hauh thang lhyi Elisha nyamoq jyank loh las taiq zis gas, Namoq gas cho whang goeus. Namoq xo yenh dah wus haih wus ma nghuot. Namoq ngah thang chank geh. Ngos namoq lyis namoq xo yenh dah soeu jyank shwih loh bah, ge. Housoeh nyang nyamoq lyis Samari wus pheh shwih loh.

²⁰Samari wus jweh lyis Elisha vkyuh dung zis gas, YHENSAIN eh, haih bang nyoq nyvng bas jungh nyoq jenh phank dyei aq, ge. YHENSAIN eq nyamoq dah nyoqjeih phank dyei las nyamoq nyoq nyvng zis yah nyamoq gas Samari wus vkhau mha nghuot zis seq.

²¹Gvshih Israel hwankti nyamoq lyis nyvng lyis Elisha lyis, Ngah yhensain eh, ngos nyamoq lyis sat das lah? Ngos nyamoq lyis sat das lah, ge.

²²Nyang phuk taiq zis gas, Nvng nyamoq lyis vsat. Nah sham, nah lyei yah jeszan las xauh nyhik bang lyis yangh ma sat ma nghuot lah. Nyamoq xik mas wom jeis dyei las nyamoq dye zo shuk thang lhyi nyamoq nyang dah hwankti jyank mas loh bas jungh, ge.

²³Housoeh las hwankti ka nyamoq xiklyis pwe zainsmuh kuot dyei. Housoeh nyamoq dye zo shuk thang lhyi nyamoq lyis Siria hwankti jyank doms pont kat. Housoeh las Siria jesphung ka Israel mau lyis ma los womh zan lo.

²⁴Tsai dvlhain Siria hwankti Benhadad gas nyah jesphung dvnganh tsainh las Samari lyis loh lhaink toh.

²⁵Housoeh lhaink toh gvng mas Samari mas phanghkhauq zainsmuh gyoh nyeis. Nyamoq eq mauhlyihzoe uhloms dvkoeuq lyis ngwis kyvp xetci, khotjyauh khyeih dvthunk lyis ngwis kyvp oeng kyvp yah ungh shoq lhaink toh.

²⁶Israel hwankti ka ciank thoq mas suh loh uhlyis vmesbih dvyuk gas, Ngah yhensain hwankti eh, bos pangh aq, ge kaiq nyeis.

²⁷Nyang doms taiq zis gas, YHENSAIN nvng lyis ma pangh lyis ngos nvng lyis khasoeh yoh pangh das lah? Ngos sunghso nghuot ya zvbiq yoh lhyeh?

²⁸Nvng chah soe bos, ge nyei. Nyang phuk taiq zis gas, Haih vmesbih gas ngos lyis, Khvnyhik yang zo das zis nah lo thuq aq, ngah lo gas nvpyo zo goh, ge.

²⁹Housoeh las ngah lo lyis jyauq las zo goeus. Nungs nyeih ngos nyang lyis, Yang zo das zis nah lo dyei aq, oen lhyi, nyang gas nyah lo lyis shung toh, ge.

³⁰Hwankti hauh vmesbih dang xauhgyo lyis nyang svsoh gyuk dvn las nyah dyimis langchuiq tyamp. Nyang ciank thoq cho lai loh lyis nyamoq yoeuh las vkhau mha yanghthung dyi wuot toh zis tsain nyvng.

³¹Nyang kaiq taiq zis gas, Shaphat lo Elisha dah uhloms gas khvnyhik nyah gungs yah ma gang lyis gas YHENSAIN ka ngos lyis hauh thoq lyis kuot bas jungh, ge.

³²Elisha gas nyah yhen mha logis jens yah tsung toh. Hauh uhlyis hwankti ka dius dvyuk nyah xik mas nhang. Hauh loeuskyoh soeu ma jweh los shih lyis nyang logis jens lyis taiq zis gas, Dius sat soeu ka ngah uhloms thyet das ge dius dvyuk nhang zis vnyvng goh lah? Yoeuh aq, hau loeuskyoh soeu los lyis khomh nyheih las khomh mas nyang lyis vwvng nhang. Nyah thang mha hwankti nyang jweh los das, ge.

³³Nyang nyamoq yah taiq goh nyeis shih lyis loeuskyoh jweh los las taiq zis gas, Jyoengh haih shanghsenh cho ka YHENSAIN jyank masyah los: Nyang dvja ja kuot das nyhenshang ngos YHENSAIN lhyi chamus langh nyeis lo das lah, ge.