Read Achang 2 HWANKTI 7 Bible Online

2 HWANKTI 7 - Achang bible

2 HWANKTI 7

¹Elisha taiq zis gas, YHENSAIN dah dang gyo geh. YHENSAIN heisoeh ge: Nvpyo haih uhlyis Samari wus khomh mas ngwis kyvp das kyvp lyis yah sunghso mons 6 paung nghuot ya bali 12 paung xauh wis das, ge.

²Hwankti lhyi pangh dah zau Elisha lyis phuk taiq zis gas, Hauh zis ma gis bweh. YHENSAIN maukhung khomh phank kat lyis eq hauh zis ma gis bweh das, ge. Elisha gas, Nvng nah nyoqjeih yah hauh bweh cho lhyi nyvng das laus eq, nvng hauh zis lyis ma xauh zo das, ge.

³Housoeh hauh wus khomh nghe mas svsoh gyukphoh dvm juot juot dah dius nyei yuk nyeis. Nyamoq dvyuk yah dvyuk taiq goh zis gas, Yang shei shoq chamus heimha tsung toh das lah?

⁴Wus vkhau mha wvng lyis wom yuot las shei das. Yang heimha tsung toh lyis eq shei das. Housoeh las Siria dvp pheh loh goh. Nyamoq yang lyis yoh kuot dah ma gis thank cho ka kang khyoq cho nghuot laus eq, nyamoq yah kang lhyi lhuiq kat mvbeh.

⁵Housoeh nyamoq gas mau chuot zoh lyis toq las Siria thoenggus pheh e loh. Nyamoq dah thoenggus mas jweh lyis, hank eq ma nyeis.

⁶Khasoeh ge lyis YHENSAIN ka hau Siria jens lyis lhyingh thwe, nyang thwe xauhgyo nhang. Hauh thwe ka jesphung zainsmuh dah thwe nghuot. Housoeh nyamoq nyang changh taiq goh zis gas, Yoeuh aq, Israel hwankti ka Hiti hwankti, Egutu hwankti yahge nyamoq dah jesphung jens lyis lhung lha yang lyis zan los, ge.

⁷Housoeh yvmvyah hauh nyenhthang Siria jens gas kang luiq shoq, nyamoq dah zvng, nyang, mauhlyihzoe tyamp las thoenggus dvkoeuq gonh lyis phang toh khoq.

⁸Haih dius nyei yuk Siria jens dah thoenggus ganthoq mas jweh lyis dvzvng mas wvng zo shuk lho lha houmha dah ngwis xing, dyimis yoeus las loh shung toh. Nyamoq gohtoeu dvzvng mas doms wvng las vgus housoeh kuot.

⁹Nghuot laus eq ma nyangh lyis nyamoq nyang changh taiq goh zis gas, Yang gas jus khyvlyis ma kuot. Khvnyhik gas loeus gis kyoh nyeih nghuot zis yang tsoek yah nyeis. Haih loeus kyoh das zis yang nyoq nyvng shot langh nyeis lyis gas yah thoq mas yobos los das. Housoeh las gvshih nyang, hwankti dah zau jens lyis yang loh kyoh goh, ge.

¹⁰Housoeh las nyamoq gas wus khomh zungh bang lyis loh taiq zis gas, Ngamoq Siria thoenggus mas loh khoq lyis hank eq ma nyeis, dius sam ma gyo, nyang jens yahge mauhlyihzoe jens kyingh dvtwih toh, thoenggus gas Siria jens toh khoq vgus nghuot joq, ge.

¹¹Khyam khomh zungh bang hauh loeus tsain lui taiq goh las hwankti yhen jweh shoq taiq kyoh loh.

¹²Nyoq ma nyvng shih, nghuot laus eq hwankti toq las nyah zau jens lyis taiq zis gas, Siria jens yang lyis khasoeh toeuq zis ngos namoq lyis taiq bah. Nyamoq gas yang yuot shet zis seq las wus nghe pheh thuq loh bang lyis vdwis nyhik las, wus lyis yoeus das ge, nyamoq nyang dah thoenggus masyah thuq las mhanhdyvp mas tamh joq, ge.

¹³Nyah zau jens mas dvyuk phuk taiq zis gas, Wus khau mha nyeis bang gas shei goeus bang teh nghuot nyeis goeus. Housoeh las dius dvyhamh yahge nyet joq dah nyang 5 doeu lyis nhang kat goh. Houlhyi cha bweh goeus zis lyis yang yoh xo nyvng das, ge.[2]

¹⁴Nyamoq dius dvyhamh lyis khyen, lha hwankti ka Siria jesphung cha bweh goeus cho lhyi loh xo yoeuh das xiklyis nyamoq lyis lhyingh 2 koeuq yah nhang kat.

¹⁵Nyamoq eq Yodan lvng jweh shoq loh yoeuh lyis Siria jens phang wuih uhlyis she nyhauq khoq dah dyimis yahge kyonhkhyi lhyi dvcho gonh nyvng. Nyamoq gas hauh cho hwankti lhyi los tsain taiq kyoh.

¹⁶Samari dius jens wuih thuq los las Siria thoenggus lyis thyoq. YHENSAIN taiq toh zis yah dvyhangteh sunghso mons 6 paung nghuot ya bali 12 paung lyis ngwis kyvp das kyvp yah ungh.

¹⁷Israel Hwankti ka nyang lyis pangh dah zau lyis wus khomh zungh das zis toeuq toh vvng loh. Hwankti ka Elisha jyank mas loh dah uhlyis Elisha taiq zis yah dvyhangteh dius jens gas nyang lyis nang las nyang shei loh.

¹⁸Housoeh las Elisha gas hwankti lhyi, Nvpyo haih uhlyis Samari wus khomh mas bali 12 paung nghuot ya sunghso mons 6 paung lyis ngwis kyvp das kyvp yah yoh wis das ge taiq toh zis yah dvyhangteh bweh los.

¹⁹Hauh zau ka Elisha lyis taiq zis gas, YHENSAIN maukhung khomhbaiq phank lyis eq hauh zis ma gis bweh das, ge. Elisha gas, Nvng nah nyoqjeih yah hauh bweh cho lhyi nyvng das laus eq, nvng hauh wom lyis ma xauh zo das, ge toeuh toh zis yah dvyhangteh,

²⁰wus khomh mas hauh zau gas dius jens yah nang nheh zis xauh las shei loh.