Read Achang 2 HWANKTI 8 Bible Online

2 HWANKTI 8 - Achang bible

2 HWANKTI 8

¹Elisha gas nyang kang dwis los nhang loshang dah ungwes, Shunem vmesbih lyis taiq zis gas, Nvng eq nah yhenbang eq toq las loh geh. Yoh khau nyeis das joqyos khamha laus eq loh khau nyeis geh. YHENSAIN ka phanghkhauq khi kat goeus. Mau gonh mas nyhet zvn gyoh das, ge.

²Hauh vmesbih gas Elisha taiq zis yah dvyhangteh nyang nyah yhenbang eq cheq Philisti mau mas nyhet zvn e khau nyeis.

³Nyhet zvn bos lyis Israel mau pheh doms los las, nyah yhen, nyah maunyeis doms yoh das xiklyis dung das ge hwankti jyank mas e.

⁴Hwankti ka Elisha dah mauh loqmuh lyis seq mes las Elisha dah jyeidwis Gehazi yah jis goh nyeis zis lyis nyang loh nyvng.

⁵Housoeh Gehazi gas hwankti lhyi Elisha ka shei soeu lhyi dwis los nhang cho taiq kyoh nyeis lyis, hau vmesbih gas hwankti lhyi nyah yhen eq nyah maunyeis eq los sang. Gehazi taiq zis gas, Ngah Hwankti eh! Elisha gas shei mhayah dwis los nhang dah lo ungwes gas haih vmesbih nyang nghuot, ge.

⁶Hwankti ka hauh vmesbih lyis nyei las, nyang eq Gehazi jus cho taiq ge kanghjyoeng kat. Housoeh hwankti ka hauh vmesbih xiklyis zauguon dvyuk toeuq dyei las taiq zis gas, Nyang thuq loh nyeih masyah khvnyhik jweh shoq nyah yos mas thuq zis dvnganh eq cheq nyah zisyos dvnganh, nyang lyis dyei aq, ge.

⁷Elisha Damasku pheh loh uhlyis Siria hwankti Benhadad nos nyeis. Hwankti lhyi Elisha jweh los ge taiq kyoh los lyis,

⁸hwankti ka nyah zau jens mas dvyuk nghuot Hazael lyis taiq zis gas, Nvng jyungshuk chi lha lvpe yah loh xauhgoh aq, ngos hai nos masyah vgis los das lah, oen YHENSAIN lhyi bos nyei dyei aq, oen loh sang aq, ge.

⁹Hazael gas Damasku mas dah zisyos gis ja jyungshuk gola-u nyeici mha thuq las Elisha lyis loh xauhgoh. Hazael gas nyang yah xauhgoh las nyang lyis taiq zis gas, Nah jyeidwis Siria hwankti Benhadad gas: Ngos haih nos masyah vgis los das lah, ge nyei das nyhenshang ngos lyis nah jyank mas nhang kat, ge.

¹⁰Elisha nyang lyis taiq zis gas, YHENSAIN ngos lyis chixoeuq zis gas nyang shei das ge; nghuot laus eq nvng nyah jyank loh las: Nvng gis los das oen; taiq aq, ge.

¹¹Lholha Elisha gas Hazael lyis yoeuh tsuk toh las Hazael gas xoq loh. Nyetlos nyettant Elisha ngaus thuq los.

¹²Hazael nyei zis gas, Ngah yhensain chamus ngaus, ge. Elisha phuk taiq zis gas, Nvng Israel dius jens lyis tyi lha gyukphoh cho kuot das yvlyis ngos seq yvmvyah nghuot. Nvng nyamoq dah khaugus lyis nyi ngheq das, nyamoq dah loyvm jens lyis moengsa yah sat das, loshang jens lyis thungh sat das, loshang gungs lyis chi bang dah womdau tsain khoq das zis ngos nyvng las ngaus, ge.

¹³Hazael gas, Ngos cha ma nghuot soeu, hei iq kuh dah cho lhyi kuot das lah, ge nyei. Elisha phuk taiq zis gas, Nvng Siria hwankti xauh duot das cho YHENSAIN ngos lyis chixoeuq, ge.

¹⁴Hazael gas Banhadad jyank tauh loh. Nyah yhensain Banhadad nyang lyis nyei zis gas, Elisha khasoeh taiq, ge. Nvng nos masyah gis los das ge, nyang taiq, ge toeuh.

¹⁵Nghuot laus eq nungs nyeih lyis Hazael mis dvkhyvp lyis jeis mas yoeus jen las hwankti dah nyoqnho mha loh nghop las hwankti lhyi sat. Housoeh las Banhadad dah joqyos mas Hazael guon.

¹⁶Israel hwankti Ahab dah lo Yoram Israel lyis guon zis oeng vzvn lyis Yehoshaphat dah lo Yehoram gas Yuda hwankti bweh los.

¹⁷Nyang hwankti bweh los uhlyis somhci aiq zvn bos goeus. Nyang Yerusalem mas xet zvn guon.

¹⁸Nyang gas Ahab dah lonyi yoeus las, Israel hwankti jens chank ma gis cho mha Ahab yhenbang kuot teh kuot. Nyang gas YHENSAIN lhyi tyi lha yaunos kuot.

¹⁹Nghuot laus eq YHENSAIN ka nyah jyeidwis Dawi masyah nyah lo jens vcaiq caiq lyis guon nhang das ge Dawi lyis dangthoengh toh zis yah dvyhangteh Yuda mau lyis ma mes lhoq thyoq tyamp.

²⁰Yehoram zaih lyis Edom jens gas Yuda mau dah vmingh lyis toeu nghank las nyamoq nyang hwankti toh.

²¹Housoeh las Yehoram gas nyah jeslhyingh dvnganh yah Zair pheh loh. Edom jens gas nyang yahge nyah jeslhyingh zau jens lyis lhaink toh. Nghuot laus eq nyang yahge nyah jeslhyingh zau jens nyenh lyis zan thuq las luiq loh. Nyah jeslo jens gas nyamoq dah yhen pheh dyos loh.

²²Hauh nyeih masyah Edom jens gas Yuda loq masyah luiq goeus. Hauh uhlyis Libna wus bang eq gomloeus toq.

²³Yehoram kuot khoq gohtoeu nyet shih goeu dvnganh gas Yuda Hwankti jens Mvnyei Buk mas lhaih toh.

²⁴Yehoram shei las Dawi dah wus, hwankti lop-yos mas nyhop. Nyah lo Ahazia gas nyah joqyos mas guon.

²⁵Ahab lo Yoram Israel mau hwankti guon zis dvci aiq vzvn lyis Yehoram lo Ahazia gas Yuda hwankti bweh los.

²⁶Ahazia hwankti bweh los lyis nyang aiqci aiq zvn bos goeus. Nyang Yerusalem mas dvzvn guon khoq. Nyah ungwes gas Israel hwankti Omri dah nyeilo, Ahab dah lonyi Athalia nghuot.

²⁷Ahazia gas Ahab yhenbang dah lomoq nghuot yvmvyah, Ahab yhenbang dah cho chank las Ahab yhenbang kuot khoq teh YHENSAIN dah nyoqlvtjvng mas yaunos kuot.

²⁸Hwankti Ahazia gas Siria hwankti Hazael yah jeszan goh yvmas Israel Hwankti Yoram yah loh. Ramot Gilead mas jes jens zan-goh las hauh jeszan khyomp mas Yoram lyis dvmtap kat.

²⁹Yoram gas nyah dvm yhoh gis das xiklyis Yezrel wus pheh tauh loh. Ahazia gas Yezrel mas nyang lyis nos loh komh.