Read Achang 1 SUNGSON 14 Bible Online

1 SUNGSON 14 - Achang bible

1 SUNGSON 14

¹Taire hwankti Hiram gas Dawi lyis hwankti yhen tsuk dyei das ge, loeuskyoh bang yah dvgeh Arit saiq, luktsan bang yahge soehfuh jens lyis nyah jyank mas nhang kat.

²Housoeh las Dawi gas YHENSAIN nyang lyis Israel jens dah hwankti kuot nhang zis yahge nyah dius nyau Israel gvng mas nyah munghdan kuhxing jelvm los nhang nyeis zis sohseq.

³Lholha Dawi gas Yerusalem mas nyi yoeus lung las nyang loloeu lonyi jens nyoshoq yoh.

⁴O mha Dawi dah lo jens gas Yerusalem mas khoeu zo bang nghuot: Shamua, Shoba, Nathan, Solomon,

⁵Ibha, Elishua, Elpelet,

⁶Noga, Nepheg, Yaphia,

⁷Elishama, Beliada, Eliphelet moq nghuot.

⁸Dawi gas Israel dvnyau gonh thoq mas hwankti duot das xiklyis coeu juot kham ge cho Philisti jens xauhgyo lyis, nyamoq Dawi lyis nyhik das ge los. Housoeh las Dawi gas nyamoq yah xauhgoh das xiklyis jens thuq loh.

⁹Philisti jens gas Rephaim langhkhau mha jweh los las zan lhuot xi loh.

¹⁰Dawi Mangso lhyi nyei zis gas, Ngos Philisti jens lyis vzan das lah? Nvng ngos lyis ung cho vdyei das lah, ge. YHENSAIN toeuh zis gas, Zan aq! Ngos nvng lyis ung cho dyei das, ge.

¹¹Housoeh las Dawi gas nyamoq yah Bala Perazim mas jeszan goh las nyamoq lyis zan ung. Dawi gas, Mangso ka ngah loq yah kvkhyot khyot teh ngah jeswus lyis shuq tyamp, ge. Housoeh las hauh joqyos lyis Bala Perazim[9] ge nyhink.

¹²Philisti jens hauh joqyos masyah phang loh uhlyis, nyamoq dah mangso jens[10] toh khoq las Dawi gas hauh yvlyis ngheq das xiklyis taiq kat.

¹³Ma nyangh lyis Philisti jens gas hau langhkhau mha tauh los las dvlhain doms zan lhuot xi loh.

¹⁴Dawi gas Mangso lhyi doms nyei lyis Mangso taiq zis gas, Nvng nyamoq lyis hei mhayah vzan, nyamoq lyis lhain loh las thyihtvp pheh nyvngzains jens dah xik masyah dvlhom zan aq.

¹⁵Nvng nyvngzains thyoh mas jes, jens loh sam gyo lyis zan aq, khasoeh oen lhyi Philisti thoenkgus jesdvp lyis zan das xiklyis ngos nah xik mas jens loh das.

¹⁶Dawi gas Mangso nyang lyis taiq toh vgus kuot las, Gibeon masyah Gezer jweh shoq Philisti jens lyis khat tangh tyamp.

¹⁷Dawi dah nyings hoeuh cho mau khanghmuh mas jweh las YHENSAIN ka dius nyau khanghmuh nyang lyis gyukwoms das cho kuot dyei.