Read Achang 1 SUNGSON 16 Bible Online

1 SUNGSON 16 - Achang bible

1 SUNGSON 16

¹Nyamoq Thanghchvp Kwi yoeus jweh los las hauh xiklyis Dawi kuot toh dah zvng vkhau mas toh. Nyamoq gas ngheq dyei jyungshuk yahge nyenstap jyungshuk Mangso xikkhonh mas tsain phudyei.

²Dawi ngheq dyei jyungshuk yahge nyenstap jyungshuk dye phudyei lyis, nyang YHENSAIN nyings mas dius jens lyis shvmanh dyei las,

³Israel dius nyelo yukgis lo dvnganh lyis sunghso lhyoq dvkoeuq, shohkyuk dvjyoeu,[13] zvbiq kyuk gvm dyei.

⁴Dawi gas Thanghchvp Kwi xikkhonh mas, YHENSAIN, Israel dah Mangso lhyi chunghthwe kat las chungh zis yah Nyang lyis paiq yvmas uhshe das Lewi jens dvyhamh lyis toeuq toh.

⁵Asap lyis uhjyung, nyang lyis pangh soeu Zekharia lyis toeuq toh. Yeiel, Shemiramot, Yehiel, Matithia, Eliab, Benaia, Obed Edom yahge Yeiel moq gas toenk bat das xiklyis toeuq toh zis xauh. Asap gas janghau bat.

⁶Phudyei vzomh Benaia yahge Yahuziel gas Thanghchvp Kwi xikkhonh mas vjangh lvbuh muot.

⁷Hauh nyeih lyis Dawi gas Asap yahge nyah boekyis jens lyis YHENSAIN lhyi jyehjuh chungh dah yvwons cangxeih dyei.

⁸YHENSAIN lhyi nhaiqshoqlang chungh geh, nyah kuhxing cho lhyi taiq hoeuh geh: nyang kuot goeus cho, dius nyau jens lyis taiq kyoh geh.

⁹YHENSAIN lhyi chunghthwe kat las chungh geh; nyang kuot goeus dah mauhphoh cho lhyi taiq geh.

¹⁰Yang gas nyang yah sen lha gausyis geh; nyang lyis paiq bang dvnganh gauslaus bas jungh.

¹¹Pangh das xiklyis YHENSAIN jyank mas loh geh, nyang lyis vjangh tsoq paiq geh.

¹²Nyah jyeidwis Abraham dah vnyau vshih, Yakop dah lo jens, nyang khyen yoeus toh bang eh,

¹³nyang kuot khoq mauh loqmuh, nyah yomsoq muh, nyang dyei toh soetuon cho lhyi soh geh.

¹⁴YHENSAIN ka yah Mangso nghuot. Nyah vmingh gas mungkvn gonh xiklyis nghuot.

¹⁵Nyang nyah thanghchvp lyis vcaiq vto toh, nyah dangthoengh dius caiq dvkhyoengh goeng nhang das.

¹⁶Houka nyang Abraham yah xamxonh goh toh, Isak lyis dangthoengh toh cho nghuot.

¹⁷YHENSAIN ka Yakop yah thanghchvp toh, hauh zis vcaiq vto goeng joq das.

¹⁸Nyang taiq zis gas, Khanan mau ngos nvng lyis dyei das, hauh zis gas nvng sain toh das.

¹⁹Mangso dah dius jens gas ma tham, Khanan mau mas boengh dvlos duot nyeis.

²⁰Dius nyau dvnyau masyah dvnyau, munghdan dvkoeuq masyah dvkoeuq dyung yenh.

²¹Nghuot laus eq Mangso ka hank yah eq nyamoq lyis ma zaiq nhang, nyamoq lyis gos zis yah hwankti jens lyis zaih nhang.

²²Nyang taiq zis gas, Ngos khyen toh, ngah jyeidwis jens lyis vzangh goh, ngah lvpe jens lyis vtanh goh, ge.

²³Mungkvn gonh YHENSAIN lhyi chunghthwe kat geh. Nyang yang lyis khyuot yoeus goeus cho, loeus gis lyis nyeih yau taiq hoeuh geh.

²⁴Dius nyau jens lyis nyah phunk taiq hoeuh geh. Dius jens dvnganh lyis nyah yomzains muhzoh lyis kyoh geh.

²⁵YHENSAIN ka kuhxing lha, loh thank chungh mon soeu nghuot: mangso jens dvnganh thoq lyis nyang lyis zes phauh nyang chah.

²⁶Gohtoeu dius nyau jens dvnganh dah mangso jens gas phvra dvtsain nghuot: nghuot laus eq, YHENSAIN ka maukhung lhyi gvnkhanh toh.

²⁷Nyang lyis phunk yahge shoenkkhyi yah lhaink toh, yomsoq yahge gauslaus cho ka nyah Yhenmuh mas dyingh joq.

²⁸Nyeisjvng thoq mas nyeis bang dvnganh eh, YHENSAIN lhyi chungh geh; Nyah phunk yahge yomzains lyis chungh geh.

²⁹YHENSAIN dah phunk bos nyings lyis chungh geh. Jyungshuk chi lha nyah Yhenmuh mas wvng geh. Gyingshang Soeu thuq los lyis nyah xikkhonh mas dupaiq geh.

³⁰Nyeisjvng gonh nyah xikkhonh mas gyuk nvn nyeis geh. Nyang gas nyeisjvng lyis goeng goeng toh. Hauh zis ma lop ma loeh nghuot.

³¹Maukhung nyeisjvng gausyis bas jungh. YHENSAIN ka hwankti nghuot, oen dius nyau jens lyis taiq kyoh geh.

³²Thomh eh, nvng mas bos ya bos zis hoeu bas jungh. Jangpa yahge houmha nyeis ya nyeis zis dvnganh gaus nyeis bas jungh.

³³Jyom mha dah saiq dvnganh gaus gaus yis yis tsain kaiq das. Houka YHENSAIN nyeisjvng lyis los guon uhlyis nghuot das.

³⁴YHENSAIN ka gis yvmvyah nyah jyehjuh lyis chungh goh; nyah jyetdap cho ka vcaiq vto joq.

³⁵YHENSAIN, ngamoq dah Mangso eh, ngamoq lyis khyuot yoeus aq, ngamoq lyis shwih tsainh aq, ngamoq lyis dius nyau jens jyank masyah shwih tauh los aq. Housoeh lyis ngamoq nhaiqshoqlang oen nah gyingshang nyings lyis chungh das.

³⁶YHENSAIN, Israel dah Mangso lhyi chungh geh. Nyang lyis gvshih eq, vcaiq caiq eq chungh geh! Housoeh dius yuk khanghmuh, Amen, ge YHENSAIN lhyi chungh.

³⁷Hwankti Dawi gas Thanghchvp Kwi xikkhonh mas nyeih yau chah dah muh wons wuq das xiklyis Asap yahge nyah vmang vnoeuh moq lyis toeuq toh.

³⁸Yeduthun lo Obed Edom yahge nyah boekyis 68 yuk gas nyamoq lyis pangh chah. Hosa yahge Obed Edom gas khomh zungh das yvwons yoh.

³⁹Gibeon mas dah zoppaiq joqyos, YHENSAIN dah zvng xikkhonh mas phudyei Zadok yahge nyah boekyis lyis toh.

⁴⁰Nyamoq gas YHENSAIN Israel jens lyis taiq toh las lhaih toh dah Lyi yah dvyhangteh, nyenhthang nvpyo phon mha ngheq phudyei chah.

⁴¹YHENSAIN dah nhaiqnyen cho vjangh goeng joq yvmvyah, nyah jyehjuh lyis chunghthwe kat das xiklyis Heman yahge Yeduthun lyis eq, khyen yoeus yvmas bos bang lyis eq nyamoq yah dvgeh toeuq toh.

⁴²Housoeh Heman yahge Yeduthun ka Mangso lhyi chunghthwe kat das xiklyis lvbuh, janghau muot, gohtoeu toenk khvlhank lyis eq bat. Yeduthun vkoq bang gas khomh zungh das yvwons eq yoh.

⁴³Dius jens gas hank eq hank nyang yhen pheh loh. Dawi eq nyah yhenbang yah dvyoq nyeis das xiklyis nyah yhen pheh tauh loh.