Read Achang 1 SUNGSON 19 Bible Online

1 SUNGSON 19 - Achang bible

1 SUNGSON 19

¹Hauh thang ma nyangh lyis Amon Hwankti Nahat shei lha nyah joqyos mas nyah lo Hanun guon nyeis.

²Dawi taiq, Hanun uwus Nahat gas ngos lyis jyehjuh kuot goeus yvmvyah, ngos nyah lo lyis jyehjuh chixoeuq das, ge. Housoeh Dawi gas nyah uwus yah sen lha nyang lyis nhaiqtaink das zis loeus kyoh bang lyis nhang kat. Housoeh nyamoq Amon mau mas jweh las Hwankti Hanun lhyi nhaiqtaink das ge loh lyis,

³Amon dius uhshe bang Hwankti lhyi taiq zis gas, Dawi gas nah jyank mas nhaiqtaink bang nhang yvmvyah nyang nah uwus lyis jyoengh phauh nyang oen nghamh lhyeh? Housoeh ma nghuot! Nah mau lyis joh los yoeuh, los choq las mhont das xiklyis nyamoq lyis nah jyank dvnhang kat, ge.

⁴Hanun gas Dawi dah loeuskyoh bang lyis nyhik las nhuotmi yuk tyamp dyei, nyamoq shanhzoe lyis eq dyi lyis eq chuknauh mas jweh shoq lhyamh thyet tyamp dyei las nhang kat.

⁵Nyamoq gas yhen pheh doms tauh los das zis svsoh xoq. Nyamoq mas bweh cho Dawi xauhgyo lyis nyamoq dah nhuotmi doms xing los shoq Yerikho mas nyeis lho lha tauh los das xiklyis dius nhang lha dang tying kat.

⁶Hwankti Hanun yahge Amon dius jens gas Dawi lyis nyamoq jessont goeus ge zis lyis soh seq lyis nyamoq gas nyamoq xiklyis jeslhyingh, nyang ji bang nghoh das xiklyis Mesopotamia thoq mau yahge Siria mau nghuot dah Makha yahge Zoba mas ngwis 38 tan huon kat.

⁷Nyamoq gas jeslhyingh 32,000 nghoh las hwankti Makha dah jesdvp gas Medeba yah twi twi mha los tsain thoeng nyeis. Amon dius jens eq nyamoq wus dvnganh masyah thuq los las jeszan das zis cicont nghuot.

⁸Dawi hauh cho xauhgyo lyis, Yoab yahge jesdvp dvkoeuq gonh lyis nhang.

⁹Amon dius jens gas jens los las nyamoq dah wusmuh Raba pheh wvng loh cho mas joqyos yoeus toh. Nyamoq lyis pangh das ge los dah hwankti jens gas pa mha joqyos yoeus toh. Israel jesphung ka jes aiq phung dah vgungs mas nghuot nyeis.

¹⁰Yoab gas xik pheh nungs pheh jes aiq shot bos zis nyvng lyis Israel jeslo jens mas jeszan duot bang lyis khyen lha Siria jens yah twi twi mha joqyos yoeus nhang toh.

¹¹Nyang gas nyet bang dvnganh lyis nyah vnoeuh Abishai dah loq mas kyauh las nyang gas nyamoq lyis Amon jens yah twi twi mha joqyos yoeus nhang toh.

¹²Yoab nyang lyis taiq zis gas, Siria jens than los lyis ngah shot pheh los bos pangh aq, Amon jens than los lyis, ngos nah shot pheh los bos pangh das.

¹³Womh womh kuot aq, yah dius yahge yah Mangso dah wus jens xiklyis yomkat las zan-goh. YHENSAIN nhaiqdoeus cho bweh bas jungh, ge.

¹⁴Yoab yahge nyah dius jens gas Siria jens lyis zan das zis dyvm loh las Siria jens gas nyah xikkhonh masyah phang loh.

¹⁵Siria jens phang loh zis Amon dius jens nyvng lyis, nyamoq eq Abishai dah xikkhonh masyah phang lha wus vkhau mha wvng loh. Housoeh las Yoab gas Yerusalem pheh tauh loh.

¹⁶Gvshih Siria jens gas nyamoq lyis Israel jens yah ung tyamp zis soh seq lyis, Uphrat lvng buisthuq Siria mau mas dah thoenkgus jesdvp lyis shwih los las Zoba Hwankti Hadadezer dah jeszau zainsmuh Shophak loq o mha toh.

¹⁷Hauh cho Dawi xauhgyo lyis nyang Israel jesphung dvnganh lyis khi tsainh las Yodan lvng goeu zis yah Siria jens nyeis yvmas yah twi twi mha joqyos yoeus. Jeszan goh cho xi loh.

¹⁸Housoeh las Israel jens gas Siria jens lyis khat tauh tyamp. Dawi yahge nyah dius jens gas Siria jeslhyingh komp bang nyhet khyoengh yahge khyei cho suh jeslo nyei mons lyis sat. Nyamoq gas Siria jeszau zainsmuh Shophak lyis eq yoh sat.

¹⁹Hadadezer dah loq o mha nyeis dah hwankti jens dvnganh gas nyamoq lyis Israel jens yah ung yvlyis sohseq lyis, nyamoq Dawi yah nyenstap cho kuot las nyah loq o mha nyeis. Hauh thang lhyi Siria jens gas Amon jens lyis ma womh pangh lo.