Read Achang 1 SUNGSON 20 Bible Online

1 SUNGSON 20 - Achang bible

1 SUNGSON 20

¹Zvn thaiq las hwankti jens jeszan das shishenh jweh los lyis Yoab gas jesphung lyis shwih las Amon mau lyis zan das xiklyis wvng loh. Nghuot laus eq Dawi gas Yerusalem mas dvnyeis. Nyamoq gas Raba wus lyis loh lhaink las yoh zan yoeus.

²Dawi Raba wus mas jweh lyis nyang gas Amon hwankti dah uhloms mas buismuk yoeus tyamp las Dawi nyah dah uhloms mas tsungh toh. Hauh buismuk lyis xing yah kuot las phauhdap luk yah saiq toh, 75 paung lyei. Hauh yvlyis Dawi gas nyah uhloms mas tsungh toh. Dawi gas hauh wus mas dah lvnyhvp vboms dom eq yoeus los.

³Nyang wus mas bang lyis shwih thuq las kywizoe kywi muh, thyeq yah kuot muh, wuzung yah kuot muh kuot nhang toh. Housoeh Dawi gas gohtoeu Amon wus jens mas bang lyis eq dvyhangteh kuot. Lholha nyang yahge nyah dius jens gas Yerusalem pheh tauh loh.

⁴Hauh thang lhyi Philisti jens yah Gezer mas jeszan goh. Housoeh nyamoq zan-goh uhlyis Hushat mas soeu Sibekhai ka dam[17] vnyau Sipai lyis sat. Housoeh las Philisti jens jeszan somh loh.

⁵Philisti jens yah jes doms zan-goh uhlyis Yair lo Ehanan ka Gat wus dius Goliat dah vnoeuh Lami lyis yoh sat. Lami gas lham yau yoqmuh iq bos dah lham chi.

⁶Gat mas jeszan pwe dvkoeuq doms bos. Houmha nyhang lha loq dvshot khyuk nyhauh nyhauh, khyei dvshot khyuk nyhauh nyhauh dap soeu dvyuk bos. Nyang gas gohnhamp dah dam jens dah vnyau vshih nghuot.

⁷Nyang Israel jens lyis jwangh las Dawi dah vmang Shimea lo Yonathan ka nyang lyis sat.

⁸Haih bang somh yuk gas Gat wus mas dam vnyau vshih masyah khoeu los. Nyamoq gas Dawi yahge nyah dius loq mas gyoh.