Read Achang 1 SUNGSON 22 Bible Online

1 SUNGSON 22 - Achang bible

1 SUNGSON 22

¹Housoeh Dawi gas, Heimha YHENSAIN Mangso dah Yhenmuh joq dah joqyos nghuot los das, haih phon ka Israel jens ngheq phudyei dah phon nghuot das, ge.

²Hwankti Dawi gas, Israel mau mas nyeis dah gohnyau jens lyis tsainh toh das zis vmingh dyei las nyang nyamoq lyis muh zwi nhang. Nyamoq mas dvyhamh bang gas Mangso dah Yhenmuh tsuk das xiklyis luk tsan.

³Dawi gas, tyinghzoe kuot das xiklyis thyeq nyoshoq, saiqkhomh xiklyis nyvp yahge ma thoq taiq lo shoq dah thunk lyis cvvq toh.

⁴Nyang gas Sidon yahge Taire dius jens lyis Arit saiq nyoshoq chi los dyei das xiklyis toeuq toh.

⁵Dawi nghamh zis gas, Ngah lo Solomon ngis las cha ma seq shih. YHENSAIN xiklyis tsuk das Yhenmuh gas munghdan khanghmuh mas phunk nyoqnho ngelang hoeuh tsuk toh dah Yhenmuh nghuot das. Housoeh las ngos hauh Yhenmuh xiklyis sont toh das, ge. Dawi gas nyang ma shei shih lyis nyoshoq sont toh.

⁶Hauh thang lhyi nyang nyah lo Solomon lyis khi lha YHENSAIN, Israel dah Mangso xiklyis yhen kuot das yvwons dyei.

⁷Dawi Solomon lyis taiq, Ngah lo, ngos YHENSAIN, ngah Mangso lhyi phauh nyang das xiklyis Yhenmuh tsuk das oen nghamh toh.

⁸Nghuot laus eq Mangso ngos lyis taiq zis gas, Nvng jes nyoshoq zan las dius nyoshoq sat goeus. Nyeisjvng thoq ngah xikkhonh mas suih nyoshoq huot goeus yvmvyah nvng ngah nyings xiklyis Yhenmuh ma yoh tsuk.

⁹Nghuot laus eq nyang ngos lyis dangthoengh dvkoeuq dyei. Nyang taiq, Nyenstap cho yah yoh guon das lo dvyuk nvng yoh das, khasoeh ge lyis ngos gas nyang lyis nyah jeswus dvnganh masyah nyenstap cho dyei das. Nyah nyings gas Solomon[18] nghuot, khasoeh ge lyis nyang guon yoq lyis Israel mau mas nyenstap cho, jesluiq cho lhyi ngos dyei das.

¹⁰Nyang ngah xiklyis yhenmuh tsuk das. Nyang gas ngah lo duot das las ngos gas nyah uwus nghuot das. Israel thoq mas nyah hwankti vkoq gas vcaiq vto guon das.

¹¹Dawi tsoq las taiq zis gas, Gvshih ngah lo, YHENSAIN ka nvng yah nghuot bas jungh. Nvng lyis nyah xiklyis yhenmuh tsuk das ung cho yoh nhang das ge nyah dangthoengh lyis jyoeng nhang bas jungh.

¹²Nvng Israel jens lyis nyah Lyi chank yah yoh guon bas jungh, YHENSAIN, nah Mangso ka nvng lyis seqgyo cho yahge joeui dyei bas jungh.

¹³Nvng gas YHENSAIN Israel jens xiklyis Moshe lhyi yah dyei toh dah lyi dvnganh lyis chank nghuot lyis gas ung cho yoh das. Yom huont aq, womh womh kuot aq: Vgyuk, ehnyet eq vdyet.

¹⁴Ngos gas Yhenmuh tsuk das xiklyis xing nyei khyoengh tan ko, ngwis nyei mons tan ko yahge mathoq laiq lo shoq dah thyeq, thunk lyis yomkat ohhont las tsain toh goeus. Ngos gas yvm das xiklyis saiq yahge luk eq sont toh, nvng chah yvmas lung aq.

¹⁵Nvng mas Luk khwih bang, soehfuh jens, luktsan bang, chah muh mas eq lyes dah loqmuh dap bang nyoshoq nyeis.

¹⁶Nyamoq gas ngwis, xing, thunk yahge thyeq shonh lyes bang nghuot. Gvshih muh xi lo aq, YHENSAIN nvng yah dvgeh nghuot bas jungh, ge.

¹⁷Dawi gas nyah lo Solomon lyis pangh das xiklyis Israel uhshe bang dvnganh lyis eq vmingh dyei.

¹⁸Nyang taiq zis gas, YHENSAIN namoq dah Mangso ka namoq yah nghuot las shot khanghmuh masyah namoq lyis nyenstap cho dyei. Nyang gas ngos lyis haih mau mas gyangh nyeis dah dius nyau jens dvnganh dah thoq mas ung nhang goeus las gvshih nyamoq gas YHENSAIN yahge Israel dius jens dah nyhen mha gyoh nyeis.

¹⁹Gvshih YHENSAIN, namoq dah Mangso lhyi vsainnyang ehnyet, gungs dyos dvnganh yah phuqsoe geh. Yhenmuh tsuk xi loh geh, housoeh lyis houmha YHENSAIN dah Thanghchvp Kwi yahge nyang lyis zoppaiq uhlyis yhung dah gohtoeu zisyos dvnganh yoh toh das, ge.