Read Achang 1 SUNGSON 23 Bible Online

1 SUNGSON 23 - Achang bible

1 SUNGSON 23

¹Dawi gas buisnyeis dyingh las mang loh lyis, Nyang nyah lo Solomon lyis Israel thoq mas hwankti toh.

²Nyang gas Israel jens dah uhshe bang lyis phudyei bang yahge Lewi jens yah dvgeh khi tsainh toh.

³Gvshih Lewi jens somhci zvn masyah thoq pheh bang lyis suon lhyi yukgis somhmons xet khyoengh nghuot.

⁴Dawi gas hauh bang mas aiqmons nyei khyoengh gas YHENSAIN dah Yhenmuh mas muhwons chah, khyuk khyoengh gas muhwons logis jens yahge soetuon bang kuot chah.

⁵Nyei khyoengh gas khyam khomh zungh chah, nyei khyoengh gas ngos Dawi dyei toh toenk khvlhank yah YHENSAIN lhyi chungh chah, ge taiq.

⁶Dawi gas Lewi dius jens lyis Lewi dah loloeu jens, Gashon, Kohat, Merari khyvlyis somh phung khyoq.

⁷Gashon gas Ladan yahge Shimei ge dah lo aiq yuk bos.

⁸Ladan loloeu jens, loxeih Yebiel, thang lyis Zetham yahge Yoel - somh yuk bos.

⁹Nyamoq gas Ladan vhuh jens dah uhshe bang bweh loh. (Shimei dah loloeu jens Shelomot, Haziel, Haran)[19] somh yuk.

¹⁰Shimei lo jens Yahat, Zina, Yeush yahge Beria - haih bang gas Shimei loloeu jens nyei yuk nghuot.

¹¹Yahat gas lomons, Ziza gas aiq vyuk: nghuot laus eq Yeush yahge Bera gas loloeu jens ma nyo las nyamoq lyis dvhuh khyvlyis kat toh.

¹²Kohat loloeu jens gas, Amram, Izhara, Hebron yahge Uziel - nyei yuk nghuot.

¹³Amram loloeu jens gas, Aron yahge Moshe. Aron yahge nyah vnyau vshih jens gas gyingshang zisyos lyis yoeuh gomh das xiklyis vcaiq vto toeuq toh zis xauh. Nyamoq gas YHENSAIN lhyi paiq uhlyis xangh ngheq, nyang lyis phuqsoe, nyah nyings mas dius jens lyis shvmanh.

¹⁴Mangso dah dius Moshe dah lo jens gas Lewi vkoq mas bos suon tap.

¹⁵Moshe loloeu tang ka Gashom yahge Elieza nghuot.

¹⁶Gashom loloeu jens mas Shubael gas uhshe soeu nghuot.

¹⁷Elieza gas Rehabia ge loloeu dvyuk kyingh yoh. Nghuot laus eq Rehabia mas vnyau vshih nyoshoq bos.

¹⁸Kohat dah loloeu aiq vyuk Izha gas vkoq uhshe soeu Shelomit ge dah loloeu dvyuk yoh.

¹⁹Kohat dah loloeu somh vyuk Hebron mas loloeu nyei yuk bos, Yeria, Amaria, Yahaziel yahge Yekameam tsain nghuot.

²⁰Kohat dah loloeu nyei vyuk Uziel mas Mikha yahge Ishia ge loloeu aiq yuk bos.

²¹Merari lotang ka Mali yahge Mushi. Mali lotang ka Eleaza yahge Kish nghuot.

²²Nghuot laus eq Eleaza gas loloeu ma bos, lonyi jens kyingh dvbos, shei loh. Nyang lonyi jens gas nyamoq dah mungs Kish loloeu jens jyank yhen loh.

²³Mushi loloeu jens gas, Mali, Eda, Yeremot ge somh yuk nghuot.

²⁴Haih bang gas vkoq, yhenbang khyvlyis yah yuk khanghmuh nyings vlhomuh kat toh dah Lewi vnyau vshih jens tsain nghuot. Lewi vnyau vshih aiqci zvn thoq pheh bang yuk khanghmuh gas YHENSAIN dah Yhenmuh mas muh wonswuq das toeuh yoh.

²⁵Dawi taiq, YHENSAIN, Israel dah Mangso nyah dius jens lyis nyenstap cho dyei goeus las YHENSAIN nyang Yerusalem mas vcaiq vto nyeis das.

²⁶Housoeh Lewi jens eq YHENSAIN nyeis dah Zvng yahge zoppaiq uhlyis yhung dah kyahsoe lhyi dvjoqyos masyah dvjoqyos mas ma dvng lo noh, ge.

²⁷Dawi dah thang thank jyauh dang gvng mas Lewi jens dvnganh gas nyenhkyi aiqci zvn jweh lyis Yhenmuh mas muh wons wuq das xiklyis nyings kat chah.

²⁸Lewi jens dah muh gas yhenmuh zoppaiq yvmas Aron vnyau vshih phudyei bang lyis pangh muh nghuot. Nyamoq gas Yhenmuh khyam yahge vyvm yvp jens lyis eq yoeuh gomh, tsingh-kan cho kuot dah muh mas eq pangh, Mangso dah yhen mha gohtoeu cho nyoshoq yah phuqsoe.

²⁹Nyamoq gas kihgus thoq mas toh dah chixoeuq ohlhyoq, jyo jyungshuk xiklyis khyen toh sunghso mons, bicheih ma kat ohlhyoq, kyap dah ohlhyoq, tsanlun coeu yah lhoeuq sunghso mons lyis yoeuh gomh; yhenmuh phudyei zis dvnganh lyis laiq.

³⁰Nyamoq gas nvp yau nvp, nyens yau nyens YHENSAIN dah xikkhonh mas yap las nyang lyis nhaiqshoqlang sang chunghthwe, chungh chunghthwe kat.

³¹Nyamoq gas Thanghchvp yah dvyhangteh, no nyeih, lohcanh, toeuq toh pwe nyeih lyis YHENSAIN xikkhonh ngheq phudyei yvmas pangh. Lewi jens geh ko ka vjangh yah, nyamoq lyis toeuq toh buisnyeis lyis chank las vzoh yah, YHENSAIN dah xikkhonh mas phuqsoe.

³²Nyamoq lyis YHENSAIN nyeis dah Zvng, Gyingshang Joqyos yoeuh gomh das muh mas, nyamoq dah boekyis Aron vnyau vshih jens lyis yhenmuh zoppaiq cho mha pangh das xiklyis, toeuq toh.