Read Achang 1 SUNGSON 28 Bible Online

1 SUNGSON 28 - Achang bible

1 SUNGSON 28

¹Hwankti Dawi gas Israel uhshe bang dvnganh lyis Yerusalem mas zophuom das xiklyis vmingh dyei. Housoeh las Israel vnyau khanghmuh mas dah zau jens, hwankti dah muh wons wuq zau jens, vkoq uhshe bang, hwankti ziszom, hwankti loloeu jens dah ziszom, hwankti yhen mha muh wons bang, jeslo jens uhshe bang yahge yhaugyen bang gas Yerusalem mas zain boms.

²Dawi gas nyamoq dah xikkhonh mas toq yap las taiq zis gas, Ngah mau dius jens eh! Ngos gas Thanghchvp Kwi xiklyis ma thuot ma lhank dah yhen yahge YHENSAIN yah Mangso dah nangte tsuk mes. Ngos gas nyang lyis phauh nyang das xiklyis yhenmuh dvlom tsuk das xiklyis sont goeus.

³Nghuot laus eq nyang gas ngos lyis hauh yhenmuh tsuk das xiklyis tomp, khasoeh ge lyis ngos gas jeslo nghuot las suih svsoh huot goeus.

⁴Yhensain Israel Mangso ka ngos yahge ngah vnyau vshih lyis Israel lyis vcaiq vto guon das xiklyis khyen toh goeus. Nyang gas uhshe bang thuq los das xiklyis Yuda vnyau lyis khyen toh goeus las Yuda vnyau masyah ngah uwus yhenbang lyis doms khyen. Hauh yhenbang dvnganh masyah nyah nhaiqdoeus khyvlyis ngos lyis khyen yoeus las ngos lyis Israel dvnganh thoq mas dah hwankti toh goeus.

⁵Nyang ngos lyis loloeu jens nyoshoq dyei las hauh loloeu jens masyah Solomon lyis YHENSAIN dah hwankti munghdan, Israel thoq mas guon das xiklyis khyen toh goeus.

⁶YHENSAIN ngos lyis taiq, Nah loloeu Solomon gas Ngah Yhenmuh tsuk das soeu nghuot. Khasoeh ge lyis Ngos nyang lyis ngah loloeu oen khyen toh goeus las Ngos gas nyah uwus duot das.

⁷Nyang ngah lyi yahge ngah tyingdang lyis gvshih teh tsoq las vlhomuh chank lyis gas Ngos gas nyah hwankti munghdan lyis vcaiq vto goeng joq nhang das, ge.

⁸Housoeh las ngah dius jens eh, gvshih, yah Mangso dah xikkhonh mas eq, YHENSAIN dah dius, haih Israel moqphung dvnganh dah xikkhonh mas eq, ngos gas namoq YHENSAIN, yah Mangso tyingtoh dang dvnganh lyis domsyos vlhomuh gyo das xiklyis namoq lyis joeu, housoeh lyis namoq gas YHENSAIN namoq lyis dyei toh dah haih mau gis lyis tsoq las xauh sain das las namoq dah lo jens dah vcaiq vto vso mau duot das.

⁹Tsai, nyang Solomon lyis taiq, Nah uwus dah Mangso lhyi seq aq. Wontang dah nhaiqlom, mes dah ehnyet yah nyang lyis phuqsoe aq, oen ngos nvng lyis joeu. Khasoeh ge lyis YHENSAIN ka yah ehnyet nhaiqlom dvnganh, yang nghamh cho dvnganh lyis seq. Nvng nyang lyis xo lhyi nyvng das, nyang lyis tyamp lyis nvng lyis vcaiq vto tyamp das.

¹⁰YHENSAIN ka nyah gyingshang Yhenmuh tsuk das xiklyis nvng lyis khyen yoeus goeus cho lhyi sohseq aq. Gvshih hauh Yhenmuh lhyi tsuk aq - yomhuont las kuot loh aq, ge.

¹¹Hauh thang lhyi Dawi gas nyah lo Solomon lyis Yhenmuh yahge ganthoq pheh dah yhen, ngwis jyi, nyhang tsank yvp, vkhau pheh vyvp, yaunos khyuot dyei dah joqyos nghuot dah Gyingshang Thank Yvp eq bos dah toeuq toh cho lhyi dyei.

¹²Dawi gas Solomon lyis thyeq zains jens, hauh vyvm mas yvp jens, Yhenmuh kyahsoe yahge YHENSAIN lhyi kyauh jyungshuk toh jyi jens xiklyis nyang nghamh toeuq toh cho lhyi eq kyauh.

¹³Nyang gas Solomon lyis YHENSAIN dah Yhenmuh mas Phudyei bang, Lewi jens wons wuq vvng muh dvnganh yah sen lha eq, YHENSAIN dah Yhenmuh mas zoppaiq uhlyis, phudyei uhlyis yhung das auhkhuq dvnganh dah cho lhyi eq jeihjyvp taiq shet.

¹⁴Dawi gas auhkhuq nyituonh gus yahge nyitoengh koeuq khanghmuh, ngwis kihgus jens, yahge Mangso lhyi kyangh ohlhyoq kih das xing kihgus jens shonh das xiklyis ngwis xing khanyhoq yhung chah cho lhyi taiq shet.

¹⁷Nyang gas shohjwi jens, lang jens, khuq jens shonh das xiklyis yhung chah xing gyingh khanyhoq, auhkhuq shonh yvmas yhung chah ngwis xing, xangh kih ngheq dah phon kuot das xiklyis xing gyingh yahge dungs lhywa lha YHENSAIN dah Thanghchvp Kwi lhyi nghop dah Kherubim lhyingh xiklyis xing khanyhoq chah cho lhyi eq taiq shet.

¹⁹Hwankti Dawi taiq zis gas, Haih zis dvnganh gas kuot thuq kat das xiklyis Yhensain nyang ngos lyis taiq shet khyvlyis lhaih toh dah toeuq cho mha bos zis nghuot, ge.

²⁰Hwankti Dawi nyah lo Solomon lyis taiq. Yom huont las womh womh kuot aq. Yhenmuh tsuk xi lo aq. Nvng muh lyis yoeuh las vgyuk, yom vshuon, khasoeh ge lyis YHENSAIN Mangso, ngah Mangso ka nvng yah dvgeh nghuot. Nvng lyis YHENSAIN doeuh tyamp toh das zis ma nghuot. Nvng YHENSAIN dah Yhenmuh yah sen dah muh dvnganh dye kuot shoq nyang nvng yah dvgeh nyeis das.

²¹Phudyei bang yahge Lewi jens lyis Yhenmuh mas muh wons wuq das xiklyis vphung phung gvm toh goeus. Lyes cho vja ja bos dah muh zwi bang gas nvng lyis pangh das zis cicont nghuot. Dius jens dvnganh yahge nyamoq dah uhshe bang gas nvng taiq dang chank kuot das, ge.