Read Achang 2 SUNGSON 1 Bible Online

2 SUNGSON 1 - Achang bible

2 SUNGSON 1

¹Gvshih Hwankti Dawi lo Solomon gas YHENSAIN nyah Mangso yah nghuot las nyang yomsoq gvgis bos los yvmvyah nyah munghdan goengtoenk los.

²Solomon gas Israel jens dvnganh lyis khi tsainh toh. Hauh bang mas, jeslo dvkhyoengh guon zau jens, dvxo guon zau jens, soetuon bang, Israel mau uhjyung jens dvnganh, vhuh uhshe bang tsain bos.

³Hauh thang lhyi Solomon gas nyang yah dvgeh nghuot dah moqphung gonh yah dvgeh Gibeon jing mas doq loh. Khasoeh ge lyis YHENSAIN dah jyeidwis Moshe mhanhdyvp sihyos mas kuot dah Mangso zvng houmha joq.

⁴(Nghuot laus eq Thanghchvp Kwi lhyi ka Hwankti Dawi Kiriat Yearim masyah yoeus los uhlyis nyang Yerusalem mas hauh nyhenshang sont las kuot toh dah zvng mas toh.)

⁵Hu dah nyeilo, Uri dah lo Bezali kuot dah thunk phon ka YHENSAIN dah zvng xik mas joq shih las Solomon yahge moqphung gonh hauh yvmas YHENSAIN lhyi paiq.

⁶Solomon gas moq zvng, YHENSAIN xikkhonh mas joq dah thunk phon pheh loh las hauh thoq mas jyungshuk dvkhyoengh ngheq phudyei zis yah YHENSAIN lhyi paiq.

⁷Hauh nyens lyis Mangso ka Solomon lyis thuqh xoeuq las taiq zis gas, Ngos nvng lyis cha dyei das, dung aq, ge.

⁸Solomon Mangso lhyi toeuh zis gas, Nvng ngah uwus Dawi lyis nhaiqnyen jyehjuh chixoeuq las ngos lyis nyah joqyos mas hwankti kuot nhang.

⁹Gvshih YHENSAIN Mangso eh, nvng ngos lyis ma thoq suon lo shoq nyo dah dius nyau thoq mas hwankti toh yvmvyah, ngah uwus Dawi lyis toh dah dangthoengh doengs nhang aq.

¹⁰Ngos haih dius nyau lyis guon chah, joeui yahge seq cho dyei aq. Ma nghuot lyis hei iq kuhxing dah nah dius jens lyis ngos khasoeh yoh guon das lah, ge.

¹¹Mangso Solomon lyis taiq zis gas, Nah dius jens lyis pangh das cho nah ehnyet mas bos las, yohkhuiq cho, nyoqnho ngelang, nah jeswus dah kang, nah kang xing cho ma dung, ngos nvng lyis hwankti toh dah vnyau lyis yoh guon das joeui yahge seq cho dung yvmvyah,

¹²Ngos nvng lyis joeui yahge seq cho dyei. Hauh thoq lyis, nah xikpheh dah hwankti jens eq, nah thang pheh dah hwankti jens eq ma nyis shoq, ngos nvng lyis dis cho, yohkhuiq cho, nyoqnho ngelang dyei, ge.

¹³Solomon gas Gibeon mas joq YHENSAIN nyeis dah zvng masyah thuqh khoq las Yerusalem pheh loh. Hauh wus mas nyang nyeis las Israel thoq mas guon.

¹⁴Solomon gas jeslhyingh yahge nyang tsainh toh. Nyang gas jeslhyingh dvkhyoengh nyeixo, nyang jens dvmons aiq khyoengh yoh. Hauh yvlyis Yerusalem wus nvm mas dvkhamh toh las gohtoeu lyis jeslhyingh wus jens mas tsain toh.

¹⁵Nyang guon dah shishenh lyis Yerusalem mas ngwis xing ka lukgoq teh nyo joq. Phauhdap arit saiq gas Yuda jing mas yuk dah lvhomp zains nyhoq joq.

¹⁶Hwankti Solomon dah soenghi jens phauh dyei las Musri[1] yahge Cilicia[2] masyah nyang,

¹⁷Egutu masyah jeslhyingh hwank yoeus. Nyamoq gas Hiti hwankti jens yahge Siria hwankti jens lyis jeslhyingh dvkya lhyi ngwis kyvp khyukxo, nyang dvdoeu lyis ngwis kyvp dvxo oengci yah ungh dyei.