Read Achang 2 SUNGSON 10 Bible Online

2 SUNGSON 10 - Achang bible

2 SUNGSON 10

¹Rehoboam gas Israel jens dvnganh nyang lyis hwankti toq das ge zain toh dah Shekhem pheh loh.

²Nebat lo Yeroboam gas Solomon shei goeus cho xauhgyo lyis Egutu masyah tauh los. Khasoeh ge lyis nyang Hwankti Solomon jyank masyah Egutu mas e phang nyeis.

³Israel uhshe bang gas Yeroboam lyis khi yoeus lha Israel moq dvphung gonh Rehoboam jyank mas los tsain taiq.

⁴Nyamoq taiq zis gas, Nah uwus gas than dah uhshe soeu nghuot khoq. Nah uwus ngamoq lyis huon khoq dah yvwons lyei lyis siq nhang lha lyei dah khoengh lyis siq nhang aq, housoeh lyis ngamoq nvng lyis phuqsoe das, ge.

⁵Rehoboam nyamoq lyis taiq zis gas, Ngos hauh cho nghamh yoeuh das xiklyis somh nyeih shishenh dyei geh. Hauh thang lhyi ngos namoq lyis taiq das, ge. Dius jens eq dyos loh.

⁶Hwankti Rehoboam gas nyah uwus kang dwis nyeis shih yoq lyis nyah xikkhonh mas yap dah logis jens lyis xam lha nyei zis gas, Namoq joeui cha dyei das lah? Haih dius jens lyis ngos khasoeh phuk taiq das lah, ge.

⁷Nyang lyis nyamoq taiq zis gas, Nvng khvnyhik haih dius jens dah nhaiqbos soeu duot las nyamoq o cho lhyi gyo dyei nghuot lyis, nyamoq gas vjangh yah lomluk shomeh nah jyeidwis duot das, ge.

⁸Nghuot laus eq nyang gas logis jens nyang lyis dyei dah joeui lhyi peq tyamp las, hauh gungsthaiq nyang yah dvyih bes los bang nghuot dah nyah joeui dyei bang lyis joeui nyei.

⁹Nyang nyamoq lyis nyei zis gas, Namoq ngos lyis joeui cha dyei das lah? Ngah uwus huon khoq dah yvwons lyis siq nhang aq ge sang nyeis dah dius jens lyis ngos khasoeh toeuh das lah, ge nyei.

¹⁰Loyvm jens nyang lyis taiq zis gas, Heisoeh oen aq: Ngah loqlogamhthang ka ngah uwus dah thyikdom thoq lyis zes kuh das.

¹¹Ngah uwus gas namoq lyis lyei dah yvwons huon, ngos namoq lyis hauh thoq mas lung shih das. Ngah uwus gas namoq lyis lvxuk yah xuk, ngos gas gungsgauh yah joeng das oen aq, ge.

¹²Hwankti sang toh zis yah dvyhangteh somh nyeih thang lhyi Yeroboam yahge dius jens dvnganh gas Rehoboam dah nghamh thyet cho lhyi los gyo yoeus.

¹³Nghuot laus eq Rehoboam gas than than taiq. Khasoeh ge lyis nyang gas nhaiq bos bang dyei dah joeui lyis peq tyamp.

¹⁴Rehoboam ka nyang yah dvgyamh bang dyei dah joeui lhyi lhom yoeus. Nyang dius jens lyis taiq zis gas, Ngah uwus gas namoq dah yvwons lyis lyei shoq huon, ngos namoq dah yvwons thoq mas lung das. Ngah uwus gas namoq lyis lvxuk yah xuk, ngos gas gungsgauh yah joeng das, ge.

¹⁵Housoeh hwankti ka dius jens dah dang ma gyo dyei: khasoeh ge lyis hauh cho ka YHENSAIN nyang Shilo dius Ahiya nhuot masyah Nebat dah lo Yeroboam lyis taiq toh dang doengs das xiklyis YHENSAIN jyank masyah thuq los cho nghuot.

¹⁶Gvshih hwankti ka nyamoq dah dang ma gyo dyei zis Israel dvnganhmoq sohseq lyis, nyamoq hwankti lhyi phuk taiq zis gas, Ngamoq gas Dawi mas chah gvmboms yoh lah? Yese dah lo yah vso ma bos, Israel jens gas nyamoq nyang yhen pheh tauh loh goh. Dawi eh, nah yhen lhyi yoeuh aq, ge. Housoeh Israel jens gas nyamoq nyang yhen pheh loh lo.

¹⁷Nghuot laus eq Rehoboam gas Yuda wus mas nyeis dah Israel jens lyis guon nyeis.

¹⁸Hwankti Rehoboam gas uhkung jens lyis gungh soeu Adoram lyis nhang kat lyis, Israel jens yah nyang lyis luk yah doeuh sat. Hauh loeus hwankti Rehoboam jyank jweh loh lyis, hwankti Rehoboam gas nyah jeslhyingh thoq mas lvnyap doq tsung las Yerusalem pheh phang loh.

¹⁹Mautsung pheh nyeis Israel vnyau jens gas khvnyhik jweh shoq Dawi hwankti vkoq lyis tyi lha gomloeus toq.