Read Achang 2 SUNGSON 11 Bible Online

2 SUNGSON 11 - Achang bible

2 SUNGSON 11

¹Gvshih Rehoboam Yerusalem mas jweh lyis nyang gas Israel lyis zan las nyah jyank mas hau munghdan doms hwank das xiklyis, Yuda yahge Benyamin mas khyen toh jes thoeuqzoe jens 180,000 tsainh toh.

²Nghuot laus eq lvpe Shimai lhyi YHENSAIN taiq zis gas,

³Yuda hwankti, Solomon lo Rehoboam, Yuda yahge Benyamin mau mas nyeis Israel dvnganh lyis taiq aq.

⁴YHENSAIN heisoeh ge: Nvng nah boekyis lyis vloh doq zan. Haih cho ka ngah jyank masyah nghuot yvmvyah hank eq hank nyang yhen pheh tauh loh nhang aq, ge. Housoeh nyamoq gas YHENSAIN dah domsyos gyo las Yeroboam lyis ma loh zan lo, tauh loh.

⁵Rehoboam gas Yerusalem mas nyeis las Yuda mau lyis khomp das xiklyis ciank bos wus jens tsuk.

⁶Nyang tsuk wus jens gas, Betlehem, Etam, Tekoa,

⁷Bet Zura, Sokho, Adulam,

⁸Gat, Maresha, Zip,

⁹Adoraim, Lakhish, Azeka,

¹⁰Zora, Aiyalon yahge Hebron tsain nghuot. Haih wus jens gas Yuda yahge Benyamin mau mas dah goeng toenk wus jens tsain nghuot.

¹¹Rehoboam gas hauh wus jens lyis goengtoenk nhang lha wus khanghmuh mas thoenkgus jesdvp eq, jeszau eq, zonoms, tsanlun coeu yahge zvbiq tsain toh.

¹²Nyang hauh wus khanghmuh mas gos eq lham eq toh zis yah zes goengtoenk nhang toh. Housoeh Yuda yahge Benyamin kyingh nyang guon.

¹³Israel mautsung vkoq jens yah dvgeh nyeis dah phudyei bang yahge Lewi jens gas nyamoq nyeis masyah hwankti jyank mas los nyeis.

¹⁴Lewi jens gas nyamoq sain dah katjang yahge zisyos lyis tyamp las Yuda mau Yerusalem mas jweh los zis gas, Yeroboam yahge nyah lo jens gas Lewi jens lyis YHENSAIN xikkhonh mas phudyei muh masyah khyoq tyamp gvng mas nghuot.

¹⁵Yeroboam gas ma jyoeng mangso lhyi paiq joqyos mas nyang kuot dah shvbeq yahge noeulo, paiq yvmas phuqsoe das xiklyis nyah dah phudyei bang lyis toh.

¹⁶Israel jens dvnganh mas nyamoq dah ehnyet mas YHENSAIN, Israel dah Mangso lhyi xo mes bang gas YHENSAIN, nyamoq phauh thyeih moq dah Mangso lhyi yoh gis phudyei dah Yerusalem pheh Lewi jens thang mha chank los.

¹⁷Housoeh nyamoq gas Yuda munghdan lyis yomdyei las Solomon dah lo Rehoboam lyis somh zvn goeng toenk nhang. Khasoeh ge lyis nyamoq Dawi yahge Solomon guon yoq lyis kuot yhangteh YHENSAIN dah domsyos gyo cho mha wontang kuot.

¹⁸Rehoboam gas Mahalat lyis yoeus, Mahalat dah uwus gas Dawi dah loloeu Yerimot nghuot. Mahalat dah ungwes gas Yese dah nyeilo, Eliab dah lonyi Abihai nghuot.

¹⁹Nyah vzomh gas Yeush, Shemaria yahge Zaham ge loloeu somh yuk bos.

²⁰Hauh thang lhyi Rehoboam gas Absalom dah nyeilo Makha lhyi yoeus las nyang eq Abiya, Atai, Ziza yahge Shelomit ge loloeu nyei yuk bos dyei.

²¹Gvshih Rehoboam gas yhensain nyhiq dvci xet yuk, nyinhungh jens 60 yoeus las loloeu 28 yuk, lonyi 60 bos. Nyang gas Makha lhyi nyah yhensain nyhiq jens, nyinhungh jens dvnganh thoq lyis zes jyet gvng mas,

²²Rehoboam gas Makha khomh mas, loloeu Abiya lyis nyah vmang vnoeuh moq mas uhjyung duot das zis toeuq toh. Nyang lyis hwankti kuot nhang mes.

²³Nyang gas joeui yah, nyah loloeu jens lyis Yuda yahge Benyamin ciankci wus khanghmuh mas tsain toh zis yah zonoms nyoshoq dyei toh. Nyamoq xiklyis yhensain nyhiq jens eq nyoshoq xo dyei.