Read Achang 2 SUNGSON 12 Bible Online

2 SUNGSON 12 - Achang bible

2 SUNGSON 12

¹Gvshih Rehoboam dah munghdan goeng los zis yah nyang yombos los goeus ya, nyang yahge nyah dius jens dvnganh YHENSAIN dah lyi lyis toh tyamp.

²Housoeh YHENSAIN lhyi cu yvmvyah Rehoboam hwankti kuot dah oeng vzvn lyis, Egutu hwankti Shishak gas Yerusalem lyis zan das ge,

³jeslhyingh 1,200, nyang ji bang 60,000, ma thoq suon lo dah Egutu dius Libya, Sukim yahge Ethiopia jens yah dvgeh doq los.

⁴Housoeh Yuda mau mas dah ciankci wus jens lyis zan yoeus thang lhyi Yerusalem lyis zan das ge jweh los.

⁵Shishak gvng mas Yerusalem mas huom nyeis dah Yuda uhshe bang yahge Rehoboam jyank mas lvpe Shemai los taiq zis gas, YHENSAIN heisoeh ge: Namoq ngos lyis tyamp yvmvyah ngos eq namoq lyis Shishak loq mas kyauh tyamp, ge.

⁶Israel uhshe bang yahge hwankti ka nyamoq ehnyet nyhen mha gyoh las YHENSAIN ka dan, tsain ge.

⁷Gvshih nyamoq nyhen mha gyoh zis YHENSAIN nyvng lyis, YHENSAIN dah dang Shemai jyank jweh taiq zis gas, Nyamoq ehnyet nyhen mha gyoh goeus las ngos nyamoq lyis ma mhont das, nyamoq luiq das cho dvtsiq dyei das, ngos nhaiqyo cho, Shishak loq lyis yah Yerusalem mas ma huot khyoq das.

⁸Nghuot laus eq ngos lyis phuqsoe cho yahge dius nyau jens dah munghdan guon bang lyis phuqsoe cho seq gvn das xiklyis nyamoq lyis nyah jons duot nhang das, ge.

⁹Housoeh Egutu hwankti Shishak gas Yerusalem mas jweh las YHENSAIN dah Yhenmuh mas dah ngwis xing yahge hwankti yhen mha dah ngwis xing yoeus loh. Nyang gas Hwankti Solomon kuot toh dah xing gos jens eq cheq, vyhang dvnganh yoeus loh.

¹⁰Hwankti Rehoboam gas xing gos jens gungsthaiq thunk gos kuot las hwankti yhen khyam khomh zungh dah uhjyung jens loq mas kyauh toh.

¹¹Hwankti YHENSAIN dah Yhenmuh mas wvng loh khanghmuh, zungh bang hauh gos lyis chi lho lha zungh bang yvp mas los doms kat toh.

¹²Nyang nyah gungs lyis nyhen mha gyoh las YHENSAIN dah nhaiqlom dyis zis gas nyang lyis shank shoq ma mhont. Yuda mau gis joq shih.

¹³Rehoboam gas Yerusalem mas yombos los zis yah guon nyeis. Rehoboam gas nyang hwankti bweh los uhlyis 41 zvn bos goeus. YHENSAIN ka nyang lyis paiq das joqyos xiklyis Israel mau gonh masyah khyen toh dah Yerusalem mas Rehoboam 17 zvn guon. Nyah ungwes gas Amon mau dius Nama nghuot.

¹⁴Nyah nhaiqlom mas YHENSAIN o cho xo das nhaiq ma nghamh yvmvyah nyang ma gis cho kuot nyeis.

¹⁵Rehoboam kuot cho vpom zis vthyoh Lvpe Shemai maussauh yahge nyvng soeu Ido lhaih toh, locaiq ehchen mvnyei mas lhaih toh. Rehoboam yahge Yeroboam jo mas nyah aiq yuk dah caiq gonh jeszan goh.

¹⁶Rehoboam gas shei lha Dawi dah wus hwankti lop mas xauh nyhop. Nyah lo Abiya gas nyah joqyos mas hwankti guon khoq.