Read Achang 2 SUNGSON 13 Bible Online

2 SUNGSON 13 - Achang bible

2 SUNGSON 13

¹Hwankti Yeroboam guon zis dvci xet vzvn lyis Abiya gas Yuda hwankti bweh los.

²Nyang Yerusalem mas somh zvn guon khoq. Nyah ungwes gas Gibea dius Uriel lonyi Makha nghuot. Abiya yahge Yeroboam jo mas jeszan goh.

³Abiya gas jeszan das ge womh dah thoeuqzoe jens 400,000 khyen lha los. Yeroboam eq jes sont las womh dah thoeuqzoe jens 800,000 yah zan.

⁴Jesdvp aiq dvp Ephraim boms mau mas zop. Abiya gas Zemarim boms thoq mas yap las taiq zis gas, Yeroboam yahge Israel jens dvnganhmoq eh, gyo geh.

⁵YHENSAIN, Israel Mangso ka ma dyoq ma bis thanghchvp yah Israel munghdan lyis Dawi yahge nyah lo jens lyis vcaiq vto dyei toh yvlyis namoq seq chah ma nghuot lhyeh?

⁶Nebat lo Yeroboam gas nyah hwankti, Dawi dah lo Solomon lhyi gomloeus toq goeus.

⁷Solomon lo Rehoboam gas ma kuh shih las nhaiq ma bos shih yvmvyah nyamoq lyis ma yoh thoenk yap shih lyis phauh ma dap, ma gis bang gas Yeroboam shot pheh yap las nyang lyis tyi.

⁸Gvshih namoq gas Dawi vnyau vshih jens lyis YHENSAIN dyei toh dah hwankti yomsoq lyis khyank goh das zis tsain nghamh toeuq. Namoq mas yombos dah jesdvp yahge namoq paiq das xiklyis Yeroboam kuot toh dah noeulo lho jens joq.

⁹Namoq gas Mangso toeuq kat toh dah phudyei bang, Aron vnyau yahge Lewi dius jens lyis khat tyamp las, gohnyau bang dah lyi yah dvyhangteh, hank eq hank xiklyis phudyei bang toh goeus. Hank nghuot laus eq noeulo dvdoeu nghuot ya yvng nyhet doeu chi los lyis namoq dah mangso jens dah phudyei soeu yoh duot.

¹⁰Nghuot laus eq ngamoq xiklyis gas YHENSAIN ka ngamoq dah Mangso nghuot las ngamoq nyang lyis ma tyamp. Aron dah vnyau vshih jens kyingh YHENSAIN lhyi phuqsoe dah phudyei bang nghuot las Lewi dius jens kyingh phudyei bang lyis pangh bang nghuot.

¹¹Nyamoq gas nyenh yaus nvp yaus YHENSAIN xiklyis ngheq phudyei yahge xangh ngheq dyei. Chixoeuq ohlhyoq lyis eq gyingshang kihgus mas kih toh. Xing nyituonh gus nyens yau nyens tuonh: khasoeh ge lyis ngamoq gas YHENSAIN, ngamoq dah Mangso dah tyingtoh dang lyis chank kuot. Nghuot laus eq namoq gas nyang lyis toh tyamp.

¹²Yoeuh aq, Mangso ka ngamoq yah nghuot. Nyang gas ngamoq dah uhshe soeu nghuot. Nyah phudyei bang eq lvbuh muot las namoq lyis zan das xiklyis ngamoq lyis jeszan khyomp pheh shwih loh. Israel dius jens eh, YHENSAIN, phauh thyeih moq dah Mangso lhyi vzan goh, khasoeh ge lyis namoq somh das.

¹³Yeroboam gas Yuda jens dah thang pheh gauh los las nyang dvshot, tamh joq bang dvshot mulas Yuda jesphung lhyi lhaink toh.

¹⁴Yuda jens lhain yoeuh kat lyis, nyamoq dah xik pheh nungs pheh jes jens dyingh joq zis nyvng lyis, nyamoq gas YHENSAIN lhyi pangh aq ge kaiq dung. Houlhyi phudyei bang eq lvbuh muot kat las,

¹⁵Yuda jens tsain kaiq hoeuh lha Abiya uhshe dah Yuda jens zan; Mangso ka Yeroboam yahge Israel thoenkgus jesdvp lyis tyeihsop zan ung.

¹⁶Israel jens Yuda jens jyank masyah phang loh nghuot laus eq Mangso ka nyamoq lyis Yuda loq mas kyauh los.

¹⁷Abiya yahge nyah dius jens gas nyoshoq sat las khyen toh dah Israel jens oengsens shei.

¹⁸Hauh vlhain Israel dius jens somh. Yuda dius jens gas, YHENSAIN, nyamoq phauh thyeih moq dah Mangso lhyi nges yvmvyah ung.

¹⁹Abiya yahge nyah thoenkgus jesdvp gas Yeroboam dah jesphung lhyi khat las Bethel yah nyah wus jens, Yeshana yah nyah wus jens, Ephron yahge nyah wus jens nyah jyank masyah yoeus.

²⁰Housoeh las Abiya zaih lyis Yeroboam gas yom ma doms bos lo. YHENSAIN nyang lyis bat las shei.

²¹Abiya gas yombos los. Nyang yhensain nyhiq dvci nyei yuk yoeus las loloeu aiqci aiq yuk, lonyi dvci khyuk yuk bos.

²²Abiya dah kuot cho nyet shih goeu yahge nyah sangkhyangh gas lvpe Ido dah mvnyei maussauh mas lhaih toh.