Read Achang 2 SUNGSON 15 Bible Online

2 SUNGSON 15 - Achang bible

2 SUNGSON 15

¹Mangso dah dyos gas Oded dah lo Azaria jyank mas jweh los,

²las Hwankti Asa yah loh xauhgoh. Gyo yoeus aq Asa, ge nyang loh kaiq. Yuda yahge Benyamin jens dvnganhmoq, gyo yoeus aq. Namoq YHENSAIN yah nyeis dvchank, YHENSAIN ka namoq yah nghuot das. Namoq nyang lyis xo khanghmuh namoq nyang lyis nyvng das. Nghuot laus eq namoq nyang lyis tyamp lyis gas nyang namoq lyis tyamp das.

³Zvn lom nyoshoq Israel jens mas jyoeng dah Mangso ma bos, kang tsain dwis. Nyamoq lyis jyauh das phudyei soeu ma yoh zis yahge Mangso lyi ma bos.

⁴Nghuot laus eq yaukyenh shanghsenh xauh uhlyis nyamoq gas YHENSAIN, Israel dah Mangso jyank tauh loh las nyang lyis xo lyis nyamoq nyang lyis nyvng.

⁵Hauh buisnyeis gyo lyis gyung cho mha jes bos, khasoeh ge lyis mau khanghmuh mas nyeis bang dvnganh gas gvgis nhunk shishenh jweh nyeis.

⁶Mau yah mau, wus yah wus zan goh, khasoeh ge lyis soe vja ja zis yah namoq lyis Mangso nyang shanghsenh nhang nyeis.

⁷Nghuot laus eq namoq gas yom huont aq, yom vshuon, khasoeh ge lyis namoq kuot muhzoh gas phauh shangh zis xauh das.

⁸Asa ka Lvpe Azaria jyank masyah haih loeusdang xauhgyo lyis nyang yom yoh las Yuda mau, Benyamin mau yahge nyang zan yoeus toh dah Ephraim boms mau mas dah wus jens mas dah phvra lho dvnganh lyis yoeus tyamp. Nyang gas Yhenmuh ganthoq mas joq dah YHENSAIN dah phon lyis eq soq.

⁹Ephraim, Manase yahge Simon mas dah dius jens nyoshoq gas Asa shot pheh los las nyah hwankti mau mas los tsain nyeis. Khasoeh ge lyis nyamoq gas YHENSAIN ka nyang yah dvgeh nghuot cho lhyi nyvng goeus. Asa ka nyamoq dvnganhmoq, Yuda yahge Benyamin dius jens lyis khi tsainh.

¹⁰Asa hwankti kuot zis dvci oeng vzvn lhamhmuh somh vkhyvp lyis nyamoq gas Yerusalem mas zain.

¹¹Hauh nyeih lyis nyamoq gas Mangso lhyi nyamoq jeszan loh masyah yoh los dah lvnyhvp - noeu 700, yvng 7,000 ngheq phudyei.

¹²Nyamoq gas, YHENSAIN, nyamoq phauh thyeih moq dah Mangso lhyi ehnyet gungs dyos dvnganh yah zoppaiq das ge thanghchvp toh.

¹³Loshang logis, vbusbih vmesbih hank nghuot laus eq nyang lyis ma paiq soeu ka sat zis xauh das.

¹⁴Nyamoq gas hauh thanghchvp lyis jyoeng nhang das ge YHENSAIN dah nyings mas kyamptang lholha nyamoq gas kaiq, lvbuh muot.

¹⁵Yuda dius dvnganh gas gauslaus, khasoeh ge lyis nyamoq gas nyamoq dah ehnyet nhaiqlom dvnganh yah hauh thanghchvp yoh chvp toh goeus. Nyamoq gas YHENSAIN lhyi zoppaiq cho mha gauslaus las YHENSAIN ka nyamoq lyis lhom yoeus, shot khanghmuh masyah nyenstap cho dyei.

¹⁶Hwankti Asa ka nyah vyos Makha lyis yangh hwankti vyos toeuh masyah khyoq tyamp, khasoeh ge lyis nyang gas svsoh ma yoeuh o phoh dah gywes lonyi Ashera dah gungslho lhyi kuot goeus. Nyang hauh yvlyis bat khyop las Kidron langhkhau mha ngheq tyamp.

¹⁷Ma jyoeng dah mangso lhyi paiq dah joqyos jens dvnganh lyis Israel mau masyah ma yoeus tyamp laus eq Asa ka nyah dvcaiq gonh YHENSAIN lhyi lomluk.

¹⁸Nyang gas nyah uwus Abiya Mangso lhyi kyauh toh dah zisyos dvnganh yahge nyang nyang Mangso lhyi kyauh toh dah ngwis xing zisyos lyis Yhenmuh mas toh.

¹⁹Asa guon dah zvnlom somhci oeng jweh shoq jeszan khyomp ma bos lo.