Read Achang 2 SUNGSON 16 Bible Online

2 SUNGSON 16 - Achang bible

2 SUNGSON 16

¹Hwankti Asa guon zis somhci khyuk vzvn lyis Israel hwankti Basha ka Yuda hwankti Asa jyank mas hank ma yoh wvng, ma yoh thuq bas jungh ge, Yuda mau lyis los zan las Rama wus lyis goengtoenk shoq los kuot.

²Hauh thang lhyi Asa ka Yhenmuh ziskwi yahge Hwankti yhen ziskwi mha dah ngwis xing yoeus las Damasku wus mas nyeis dah Siria Hwankti Benhadad jyank mas dius nhang lha taiq zis gas,

³Ngah uwus yahge nah uwus jo mas buisnoms joq khoq teh ngos yahge nah jo mas buisnoms toh goh. Ngos nvng lyis ngwis yahge xing huon kat. Israel hwankti ngah jyank masyah thuq loh bas jungh, nvng Israel hwankti Basha jyank masyah buisnoms thyoq aq, ge.

⁴Housoeh las Benhadad gas hwankti Asa dah dang gyo las, nyah jeszau jens lyis Israel wus jens pheh nhang kat. Nyamoq gas Ijon, Dan, Abel Maim yahge Napthali wus jens mas dah jyi joq wus jens lyis zan.

⁵Basha hauh loeus xauhgyo lyis nyang Rama wus kuot zis no tyamp.

⁶Hauh thang lhyi hwankti Asa ka Yuda mau bang dvnganh lyis khi tsainh las Rama wus mas Basha tsainh toh dah luk yahge thyeh yoeus las Geba yahge Mizpa wus kuot.

⁷Hauh shishenh lyis lvpe Hanani gas Yuda Hwankti Asa jyank mas los taiq zis gas, Nvng gas YHENSAIN, nah Mangso lhyi ma khau, Siria Hwankti lyis khau yvmvyah, Israel Hwankti dah jesphung ka nah jyank masyah phang luiq loh goeus.

⁸Sudan yahge Libya jens gas jeslhyingh nyoshoq, nyang ji bang, jesphung zainsmuh ma nghuot lhyeh? Nghuot laus eq nvng YHENSAIN lhyi khau lha, nyang hauh bang lyis nah loq mas kyauh.

⁹Khasoeh ge lyis YHENSAIN ka lomluk bang xiklyis goeng dah khaugus duot das ge, nyah nyoqjeih gas maunyeis goms shoq e los yoeuh nyeis: Nvng haih cho mha koh goeus. Housoeh las gvshih masyah nvng mas jeszan cho bos das, ge.

¹⁰Asa ka lvpe Hanani lyis nhaiqyo las thung khyoq toh. Nyang hauh shishenh lyis dius dvyhamh lyis eq nhaiqnyen cho ma bos lo shoq shoeuhshih.

¹¹Asa kuot cho vpom zis vthyoh Yuda yahge Israel Hwankti dah mvnyei maussauh mas lhaih toh.

¹²Hwankti Asa guon zis somhci gau vzvn lyis nyah khyei mha dvm bos las svsoh nos nyeis laus eq YHENSAIN lhyi ma xo, mvcheih lastsiang lyis xo nyeis.

¹³Hauh thang lhyi Asa ka nyang guon zis nyeici das vzvn lyis nyang shei loh.

¹⁴Nyamoq gas nyang lyis Dawi dah wus, nyang nyah xiklyis kyungh toh dah lop luk khyung mas nyhop. Mvcheih seq lhoeuq bang lhoeuq las xangh coeu yah dyingh dah jung mas kih toh. Nyah xiklyis nyi ngheq pwe zainsmuh kuot.