Read Achang 2 SUNGSON 17 Bible Online

2 SUNGSON 17 - Achang bible

2 SUNGSON 17

¹Hauh thang lhyi nyah lo Yehoshaphat gas nyah gungsthaiq hwankti duot las Israel jens zan los zis yoh thoenk tyamp das xiklyis Yuda mau lyis yombos nhang.

²Yuda ciankci wus dvnganh mas jeslo jens toh. Hauh thoq lyis Yuda mau yahge nyah uwus Asa zan ung toh dah Ephraim wus jens mas eq wus zungh thoenkgus jesdvp jens toh.

³Yehoshaphat gas Bala lyis ma xo, nyah phauh thyeih Dawi suh khoq dah cho chank suh yvmvyah YHENSAIN ka nyang yah dvgeh nghuot.

⁴Nyang gas Israel hwankti jens kuot yhangteh ma nghuot, nyah uwus dah Mangso lhyi xo lha nyah tyingtoh dang chank kuot.

⁵Housoeh yvmvyah YHENSAIN ka Yuda munghdan lyis Yehoshaphat loq mas doengs nhang lha, Yuda mau gonh nyang lyis jyungshuk dyei las nyang gas dis cho yahge phauh nyang cho nyoshoq yoh.

⁶Nyang gas YHENSAIN dah cho mha nhaiq wvng, yombos las Yuda mau mas dah ma jyoeng mangso paiq joqyos yahge Ashera gungslho jens lyis yoeus tyamp.

⁷Nyang guon zis somh vzvn lyis Yuda wus jens mas jyauh das xiklyis Benhail, Obadia, Zakharia, Nethanel yahge Mikhaia ge dah uhshe bang nhang kat.

⁸Nyamoq yah dvgeh Lewi jens, Shamaia, Nethania, Zebadia, Asahel, Shemiramot, Yehonathan, Adoniya, Tobiya, Tobadoniya Lewi jens, nyamoq yah dvgeh phudyei vzomh Elishama yahge Yehoram lyis nhang.

⁹Housoeh las nyamoq gas YHENSAIN dah Lyi maussauh wons las Yuda mas jyauh. Yuda mau mas dah wus jens dvkhauyah loh jyauh.

¹⁰YHENSAIN lhyi gyukwoms cho ka Yuda vyvm vwi mas dah munghdan dvnganh thoq mas jweh las, nyamoq gas Yehoshaphat lyis jeszan cho ma kuot.

¹¹Philisti dius dvyhamh, Yehoshaphat jyank mas jyungshuk yahge khoenghdaus ngwis chi los. Arab jens gas yvnglus nyhet khyoengh nyhetxo, shvbeq lus nyhet khyoengh nyhetxo chi los.

¹²Housoeh Yehoshaphat gas yom svsoh bos los las Yuda mau mas thoenkgus jesdvp eq, zisyos toh das wus jens eq tsain kuot.

¹³Nyang Yuda wus jens mas zisyos kyahsoe nyoshoq yoh. Yerusalem mas jeszan dius thoeuqzoe jens toh.

¹⁴Heika nyamoq vhuh dah sonzoh nghuot. Yuda mas jeszau zainsmuh gas Adna nghuot las nyah o mha jeslo jens somh sens bos.

¹⁵Hauh thang mha ka jeszau Yehohanan yah dvgeh aiq sens xet mons.

¹⁶Hauh thang mha Zikhri lo Amasia yah dvgeh jeslo jens aiq sens. (Amasia gas nyah gungs YHENSAIN dah muh mas kyauh tyamp soeu nghuot.)

¹⁷Benyamin vkoq mas dah yombos thoeuqzoe Eliada yah dvgeh, lyei yahge gos chi bang aiq sens.

¹⁸Nyah thang mha Yehozabad yah dvgeh jeszan das zis cicont nghuot bang dvsens xet mons.

¹⁹Haih jeslo jens gas Yerusalem mas hwankti lhyi phuqsoe bang nghuot. Hauh thoq lyis Yehoshaphat gas Yuda mau dvkhauyah ciankci wus mas eq thoenkgus jesdvp toh.