Read Achang 2 SUNGSON 18 Bible Online

2 SUNGSON 18 - Achang bible

2 SUNGSON 18

¹Yehoshaphat gas dis, nyoqnho ngelang eq svsoh bos. Nyang Ahab yah yukphoq lomoq eq doeusgoh.

²Zvn dvtsiq nyangh thang lhyi nyang gas Samari mas Ahab yah e xauhgoh. Ahab gas nyah xiklyis eq, nyang yah dvgeh los bang xiklyis eq yvng, noeu nyoshoq sat las lhom yoeus pwe kuot. Nyang gas Yehoshaphat lyis nyang yah dvgeh Ramot Gilead lyis loh zan goh ge yus.

³Nyang taiq zis gas, Ramot Gilead lyis loh zan das xiklyis nvng ngos yah vloh das lah, ge. Yehoshaphat phuk taiq zis gas, Ngos gas nvng teh, ngah dius jens eq nah dius jens teh nghuot. Jeszan yvmas ngamoq nvng yah loh das, ge.

⁴Nyang Israel hwankti Ahab lyis taiq shih zis gas, YHENSAIN lhyi shih nyei gyo yoeuh goh, ge.

⁵Israel hwankti ka lvpe jens nyeixo khi tsainh las nyei zis gas, Yang Ramot Gilead lyis loh gis zan das lah, ma loh gis zan das lah, ge. Nyamoq toeuh zis gas, Loh aq, Mangso ka hauh wus hwankti loq mas kyauh das, ge.

⁶Nghuot laus eq Yehoshaphat gas, Yang YHENSAIN lhyi nyeigyo das xiklyis nyah lvpe gohyuk vnyeis lo lah, ge.

⁷Ahab toeuh zis gas, YHENSAIN lhyi yoh nyeigyo das zis dvyuk nyeis shih. Nyang gas Imla dah lo Mikhaia nghuot. Nghuot laus eq nyang ngah cho khanhamp eq gis zis ma pe, dyoqbis cho zainsmuh kyingh dvtaiq dyei yvmvyah, ngos nyang lyis hoeng, ge. Yehoshaphat gas, Nvng housoeh ma gis taiq, ge.

⁸Housoeh Israel hwankti ka zau dvyuk lyis khi lha, Imla lo Mikhaia lhyi lvnyap loh shwih los aq, ge.

⁹Gvshih Israel hwankti yahge Yuda hwankti Yehoshaphat gas hwankti gungs shunk las, Samari wus khomh nghe mha joq thanjang hwankti tank mas tsain tsung toh. Lvpe jens dvnganh eq nyamoq dah xikkhonh mas pe nyeis.

¹⁰Kenana lo Zedekia gas thyeq khyau kuot las taiq zis gas, YHENSAIN heisoeh ge: Siria jens lyis yoh mhont shoq haih khyau yah nvng nyamoq lyis thungh chah, ge.

¹¹Lvpe jens dvnganh eq Ramot Gilead mas jes loh zan las ung bas jungh. YHENSAIN ka hauh zis nvng hwankti dah loq mas kyauh das, ge dvyhangteh tsain pe.

¹²Mikhaia lyis loh khi dah loeuskyoh soeu nyang lyis taiq zis gas, Yoeuh aq, lvpe jens dvnganh gas dang dvkhonh khyvlyis kyingh hwankti lhyi gis dah dang pe dyei. Nvng eq nyamoq yah dvyhangteh yomdyei aq, ge.

¹³Nghuot laus eq Mikhaia taiq zis gas, YHENSAIN nyang nyeis zis yah dvyhangteh, ngos ngah Mangso taiq zis taiq das, ge.

¹⁴Nyang hwankti jyank mas jweh las, hwankti nyang lyis nyei zis gas, Mikhaia eh, ngamoq Ramot Gilead mas jes loh zan gis lah, ma loh zan gis lah, ge. Nyang phuk taiq zis gas, Loh zan las ung los aq; hauh zis nah loq mas kyauh das, ge.

¹⁵Nghuot laus eq Hwankti nyang lyis taiq zis gas, YHENSAIN dah nyings mas dang jyoeng mha lai las ngos lyis gohtoeu cha vtaiq oen, khanyhoq lhain maukhi nhang das lah, ge.

¹⁶Mikhaia taiq zis gas, Israel dvnganh gas, yvng yoeuh soeu ma bos dah yvng jens teh boms mas dyos loh zis ngos nyvng. YHENSAIN taiq zis gas, Haih bang gas yhensain ma bos, yuk khanghmuh nyenstap zis yah nyah yhen pheh tauh loh bas jungh ge, ge.

¹⁷Israel hwankti ka Yehoshaphat lyis, Nyang ngah xiklyis gis zis ma pe, dyoqbis zainsmuh cho kyingh dvpe dyei oen, ngos nvng lyis taiq goeus ma nghuot lhyeh, ge.

¹⁸Mikhaia taiq, Housoeh las YHENSAIN dah dang gyo aq, YHENSAIN ka nyah hwankti tank mas tsung lha, maukhung jesphung dvnganh gas nyah loqwi loqyos yap joq yvlyis ngos nyvng.

¹⁹YHENSAIN taiq zis gas, Israel hwankti Ahab, Ramot Gilead jes mas doq loh las gyoh bas jungh, nyang lyis hank yah jyoeuq das lah, ge lyis dvyuk dvja tsain taiq.

²⁰Dyos dvkoeuq YHENSAIN xikkhonh mas los yap las taiq zis gas, Ngos jyoeuq das, ge. YHENSAIN ka, Nvng khasoeh jyoeuq das, ge nyei.

²¹Nyang gas, Ngos loh las nyah lvpe jens dvnganh dah nhuot mas hwah dah dyos duot das, ge. YHENSAIN ka, Nvng mhuih las yoh ung das. Loh kuot aq, ge.

²²Housoeh las YHENSAIN ka, hai nah lvpe jens dvnganh dah nhuot mas hwah dah dyos kat dyei goeus. YHENSAIN ka nah xiklyis dyoqbis cho zau dang dye khyoq goeus, ge.

²³Hauh uhlyis Kenana lo Zedekia gas Mikhaia dah bvlot loh tyuk las taiq zis gas, YHENSAIN dah dyos gas nvng yah jisgoh das zis ngah jyank masyah khanhamp thuq loh au, ge.

²⁴Mikhaia taiq zis gas, Nvng tamh das ge yvplhunk mas wvng loh nyeih lyis nyvng das, ge.

²⁵Hauh thang lhyi Israel hwankti zau dang khyoq zis gas, Mikhaia lyis nyhik las wus zau Amon yahge hwankti lo Yoash jyank shwih loh aq.

²⁶Hwankti heisoeh ge oen aq, Haih soeu lhyi thung lhunk toh aq. Ngos nyenstap zis yah doms jweh los shoq nyang lyis ohlhyoq yahge jeis kyingh dvdyei aq, ge.

²⁷Mikhaia taiq zis gas, Nvng nyenstap zis yah tauh los lyis gas, ngos taiq dang gas YHENSAIN taiq zis ma nghuot. Dius jens dvnganh eh, gyo toh geh, ge.

²⁸Housoeh Israel hwankti yahge Yuda hwankti Yehoshaphat gas Ramot Gilead lyis zan das xiklyis doq loh.

²⁹Israel hwankti ka Yehoshaphat lyis, Ngos gohtoeu gungs shunk las jeszan yvmas loh bah, nvng gas nvnyang dyixing wuot toh aq, ge. Housoeh Israel hwankti ka gohtoeu gungs shunk zis yah jeszan yvmas loh.

³⁰Siria hwankti nyah jeslhyingh zau jens lyis taiq toh zis gas, Ngislo kuhlo hank lyis eq vzan, Israel hwankti lyis kyingh dvzan geh, ge.

³¹Housoeh jeslhyingh zau jens Yehoshaphat lyis nyvng lyis, Haih zis Israel hwankti nghuot, ge. Housoeh yvmvyah nyamoq gas nyang lyis zan das zis zain los. Nghuot laus eq Yehoshaphat gas nyang lyis kyoeu das xiklyis YHENSAIN lhyi kaiq las Mangso ka nyamoq lyis gohshot lai loh nhang.

³²Housoeh hauh zis Israel hwankti ma nghuot cho jeslhyingh zau jens nyvng seq lyis, nyang lyis ma khat lo, gohshot loh.

³³Aram jeslo dvyuk nyah lyei Israel jesphung pheh mvgon baiq kat, hauh zis gas Israel hwankti dah jesgungs jyvp mas loh zangh. Housoeh nyang nyah jeslhyingh komp soeu lhyi, Ngos dvmdap goeus, tauh lo aq, ngos lyis jeszan masyah phe toh aq, ge.

³⁴Hauh nyeih lyis jeszan zis xungh los. Israel hwankti ka nyenhthang jweh shoq Siria jens jeszan los cho mha nyah lhyingh khau mha dius lyis nges tsung toh. Buiswvng loh lyis nyang shei goeus.