Read Achang 2 SUNGSON 2 Bible Online

2 SUNGSON 2 - Achang bible

2 SUNGSON 2

¹Hwankti Solomon gas YHENSAIN lhyi paiq das joqyos, yhenmuh yahge nyah xiklyis eq hwankti yhen tsuk das ge nghamh thyet.

²Nyang gas kyahsoe dih dius nyhet mons, boms mas luk khwih dius xet mons, nyamoq lyis yoeuh das dius somh khyoengh khyukxo khyen kat.

³Solomon gas Taire hwankti Hiram jyank mas taiq nhang zis gas, Nvng ngah uwus Hwankti Dawi lyis nyah yhen tsuk das xiklyis arit saiq ungh dyei teh ngos yah eq soenghi kuot aq.

⁴Ngos YHENSAIN ngah Mangso lhyi phauh nyang khyvlyis yhenmuh dvlom tsuk das oen. Hauh yhenmuh gas ngah dius jens yahge ngos xangh ngheq las nyang lyis paiq das, nyang lyis tsoq las gyingshang sunghso lhyoq toh dyei das, nyenhthang nvpyo, No Buisnyeis, Lohcanh nyeih pwe yahge YHENSAIN, ngamoq dah Mangso lhyi phauh nyang dah gohtoeu gyingshang pwe nyeih lyis ngheq phudyei das gyingshang joqyos nghuot das.

⁵Ngamoq dah Mangso ka mangso jens dvnganh thoq lyis kuhxing yvmvyah, ngos tsuk das yhenmuh ka kuhxing das.

⁶Maukhung yahge maukhung jens dah maukhung ka nyang lyis ma yoh lhunk toh lyis gas, nyah xiklyis yhenmuh hank yoh kuot das lah? Nyah xikkhonh mas xangh ngheq nhamp thoq lyis lai las nyah xiklyis yhenmuh tsuk das zis ngos cha nghuot lah?

⁷Housoeh las ngah uwus Dawi khyen toh las Yuda mau Yerusalem mas ngos yah nyeis, ngwis xing, thunk, thyeq, seq thwang lha nesnoq seh, misnes seh, vlanh seh seq cauh dah loqmuh dap bang yah muh yoh zwi das xiklyis loqmuh lyes soeu dvyuk jenh nhang kat dyei aq.

⁸Housoeh las Lebanon boms mas dah arit saiq, shvxoeuh, shuk saiq yoeus dyei kat aq. Nah jyeidwis jens Lebanon boms mas saiq yoeus lyes cho ngos seq. Hauh gvng mas nyamoq lyis pangh das xiklyis ngah jyeidwis jens eq nhang kat das.

⁹Ngos kuot das yhenmuh gas svsoh kuh las mauhphoh nghuot das yvmvyah, saiq nyoshoq sont chah.

¹⁰Ngos nah jyeidwis jens saiq thoeuq, thyeh xeik bang lyis sunghso dvsens luh, bali dvsens luh, zvbiq dvsens dvmons galan, tsanlun coeu dvsens dvmons galan huon kat das, ge.

¹¹Taire hwankti Hiram ka Solomon jyank pheh phuk taiq maussauh huon kat. Nyang lhaih zis gas, YHENSAIN ka nyah dius jens lyis jyetdap yvmvyah nyang nvng lyis nyamoq thoq mas hwankti toh.

¹²Maukhung nyeisjvng lyis gvnkhanh toh YHENSAIN, Israel dah Mangso lhyi chungh. Nyang gas YHENSAIN xiklyis yhenmuh lyis eq, nyah hwankti yhen lhyi eq tsuk das ge, seqgyo cho yahge lyes cho dyingh las joeui bos dah lo Hwankti Dawi lyis dyei.

¹³Joeui bos las loqmuh lyes soeu Huram lyis ngos nah jyank mas nhang kat.

¹⁴Nyah ungwes gas Dan lonyi, uwus gas Taire mas soeu nghuot. Nyang gas ngwis xing, thunk, thyeq masyah vyhang seq kuot thuq. Nyang gas lukmuh eq, saiqmuh, yoq cho dvnganh lyis seq. Nyang gas misseh nesnoq, vlanh, misnes seh cauh cho yahge misyhwiq seh ze yvmas lyes. Nyang gas kuot nhang zis chah ja lyis eq phi shoq seq thwang tap soeu nghuot. Huram gas nah loqmuh dap bang yahge nah uwus ngah yhensain Hwankti Dawi toeuq toh khoq dah loqmuh dap bang yah dvgeh bos kuot das.

¹⁵Housoeh las gvshih hau nvng dangthoengh toh dah sunghso, bali, tsanlun coeu yahge zvbiq lyis ngah jyank huon kat aq.

¹⁶Lebanon boms mas ngamoq gas nvng chah ya chah arit saiq dvnganh yoeus las Yopa wus jweh shoq pauq cho nyhoeuh khyoq dyei das. Hou mhayah hauh saiq lyis nvng Yerusalem pheh dih yoeus aq, ge.

¹⁷Hauh thang lhyi Hwankti Solomon gas nyah uwus Dawi sont toh zis yah dvyhangteh Israel munghdan mas dah boenghwus jens suon lhyi 153,600 bos.

¹⁸Housoeh las nyang gas yvwons wons das zis dius 70,000, boms mas luk tsan das zis 80,000 hauh bang lyis gungh das xiklyis 3,600 lhyi toeuq toh.