Read Achang 2 SUNGSON 20 Bible Online

2 SUNGSON 20 - Achang bible

2 SUNGSON 20

¹Hauh thang lhyi Moab jens, yahge Amon jens gas Meun[9] dius dvyhamh yah Yehoshaphat lyis jeszan das ge los.

²Housoeh Hwankti Yehoshaphat lyis los tsain taiq zis gas, Edom mau, Coh Thomh thyitvp mas dah svsoh nyo dah jesphung ka, nvng lyis zan das ge los. Nyamoq gas Engedi ge, Hazazon Tama mas dvp los thoeng nyeis goeus, ge.

³Housoeh Yehoshaphat gas gyuk las YHENSAIN lhyi shvmanh dung. Housoeh nyang gas Yuda mau gonh lyis womkyi nhang.

⁴Yuda jens dvnganh YHENSAIN uhshe cho dung das ge vsainnyang dah wus masyah Yerusalem pheh tsain thuq los.

⁵Nyamoq gas Yerusalem mas bang yah dvgeh Yhenmuh dah ganthoq vsaiq mas zain nyeis. Yehoshaphat gas thuq loh las hauh moqphung xikkhonh mas yap,

⁶thwe thuq vkyuh dung, Ngamoq phauh thyeih moq dah Mangso YHENSAIN eh, nvng gas maukhung mha Mangso nghuot. Nvng gas nyeisjvng thoq mas munghdan dvnganh lyis guon. Nah loq mas yomsoq yahge duot cho bos las hank eq nvng lyis ma yoh thoenk.

⁷Nvng gas haih mau mas nyeis ku dah vnyau lyis, nah vnyau Israel dah xikkhonh masyah khat tyamp las, nah dyenschangh Abraham dah lo jens lyis vcaiq vto dyei dah Mangso nghuot.

⁸Nyamoq houmha nyeis, las nah nyings xiklyis gyingshang Yhenmuh tsuk.

⁹Nah nyings gas haih Yhenmuh mas joq yvmvyah ngamoq mas sham jes, yomh, phanghkhauq dvja ja jweh las, nah nyings dyei toh dah haih Yhenmuh, nah xikkhonh mas los las yaukyenh gvng mas nvng lyis lui lyis gyo dyei las khyuot yoeus das, ge goeus.

¹⁰Gvshih Israel jens Egutu masyah thuq los lyis nvng mhont das toeuh ma dyei las ngamoq phauh thyeih moq jhank toh khoq dah Amon, Moab, Seir boms dius jens gas,

¹¹ngamoq lyis sain nhang toh vso maunyeis masyah ngamoq lyis khat thuq das ge, gvshih jyen cvp los.

¹²Ngamoq dah Mangso eh, nvng nyamoq lyis soe ma tuon lhyeh? Ngamoq lyis zan los nyeis, hei iq nyo dah jes lyis zan das zis ngamoq yomsoq ma bos, khasoeh kuot das zis ngamoq ma seq. Ngamoq gas nah pangh cho lhyi kyingh dvyoeuh nyeis, ge.

¹³Gvshih Yuda jens dvnganh nyamoq dah yhensain nyhiq jens, lo jens ngislo kuhlo Yhenmuh xik mas yap joq.

¹⁴Hauh thang lhyi moqphung vgungs mas bos, Lewi vkoq Asap vhuh, Marania dah nyei nyet, Yeila dah nyet, Benaia dah nyeilo, Zekharia dah lo Yahaziel thoq mas YHENSAIN dah dyos jweh.

¹⁵Nyang taiq zis gas, Yuda mau bang dvnganh, Yerusalem mas nyeis dyos bang dvnganh yahge nvng Hwankti Yehoshaphat eh, gyo geh, YHENSAIN namoq lyis heisoeh ge. Hou iq nyo dah jesphung gvng mas namoq vgyuk goh, ehnyet vthank goh. Hau jeszan das zis namoq muh ma nghuot, YHENSAIN muh dvnghuot.

¹⁶Nvpyo nyamoq lyis loh zan geh. Nyamoq gas Ziza langhwuq mas jweh doq los das las Yeruel mhanhdyvp langhkhau whomh mas xauhgoh das.

¹⁷Nghuot laus eq namoq ma zan noh. Yuda mau yahge Yerusalem wus bang eh, namoq tsoeklo yap joq geh. YHENSAIN namoq lyis khyuot yoeus cho lhyi yoeuh geh: Vgyuk goh, ehnyet vthank goh, nvpyo nyamoq lyis loh zan geh, YHENSAIN namoq yah dvgeh nghuot, ge.

¹⁸Hauh uhlyis Yehoshaphat gas nyeisjvng mas dupaiq las, Yuda mau bang, Yerusalem wus bang dvnganh eq YHENSAIN xikkhonh mas gop las YHENSAIN lhyi paiq.

¹⁹Lewi vkoq Kohat yahge Kora lo jens gas yap las thwe zainsmuh yah YHENSAIN, Israel Mangso lhyi chungh.

²⁰Housoeh nyamoq gas nungs nvp noq yah toq las Tekoa sihyos pheh loh. Nyamoq loh nyeis lyis Yehoshaphat gas yap las, Yuda mau bang Yerusalem wus bang eh gyo geh, YHENSAIN, namoq dah Mangso lhyi loms geh, housoeh lyis namoq yoh doengs das. Nyah lvpe jens lyis loms geh, housoeh lyis namoq yoh ung das, ge.

²¹Dius jens yah xam nyoq goeus ya, Hwankti ka chunghthwe kat bang dvyhamh lyis nyamoq gyingshang pwe yoq lyis wuot dah dyimis wuot las jesphung dah xik mas, YHENSAIN lhyi chungh geh, khasoeh ge lyis Nyah jyetdap cho ka vcaiq vto joq, oen chunghthwe kat las jens loh das xiklyis vmingh dyei.

²²Nyamoq chunghthwe kat las chungh xi loh lyis YHENSAIN ka Yuda jens lyis zan das jesphung nghuot dah Amon, Moab yahge Seir boms dius jens lyis nyang changh zan goh nhang.

²³Amon yahge Moab jesphung ka nyamoq lyis los pangh dah Seir boms mas bang lyis zan las dvyuk eq ma nyet lo shoq sat. Nyamoq Seir jesphung lhyi dye sat lyis, nyamoq nyang changh mhont goh loh.

²⁴Housoeh las Yuda jens mhanhdyvp mas joq dah tyoeuqzvm mas jweh. Hauh svsoh nyo jesphung lhyi yoeuh kat lyis, nyeisjvng mas nyamoq dah mvng dvjoq lo; hauh bang mas dvyuk eq ma luiq.

²⁵Yehoshaphat yahge nyah dius jens nyamoq dah lvnyhvp yoeus das ge los lyis, gaunyhauq[10] zokho, dyimis yahge gohtoeu phauhdap vyhang lyis vbomsdom nyvng las ma yoh wons loh lo shoq yoeus. Sunk nyo yvmvyah somh nyeih khyom.

²⁶Nyei vnyeih lyis nyamoq gas Benrakha langhkhau mha huom lha YHENSAIN lhyi tsain chungh. Housoeh yvmvyah hauh joqyos lyis khvnyhik jweh shoq Berakha[11] langhkhau ge lui.

²⁷Housoeh YHENSAIN ka nyamoq dah jeswus lyis zan shuqh tyamp yvmvyah, Yehoshaphat gas nyah jesphung lhyi ung cho yah dvgeh Yerusalem wus pheh shwih tauh loh.

²⁸Nyamoq gas toenk, khvlhank, lvbuh muot zis yah Yerusalem, Yhenmuh mas jweh loh.

²⁹YHENSAIN ka Israel jeswus lyis zan ung, ge dah cho xauhgyo dah munghdan dvnganh gas Mangso lhyi gyukwoms.

³⁰Housoeh YHENSAIN ka dvkhauyah tam nhang yvmvyah, Yehoshaphat gas nyah munghdan lyis nyenstap xauh guon.

³¹Yehoshaphat gas nyenhkyi somhci oeng zvn bos lyis Yuda Hwankti bweh los las Yerusalem mas aiqci oeng zvn guon. Nyah ungwes gas Shilhi dah lonyi Azuba nghuot.

³²Nyang gas nyah uwus Asa dah cho chank suh las cho ma whang, YHENSAIN dah nyoqlvtjvng mas jus khyvlyis kuot.

³³Nghuot laus eq ma jyoeng dah mangso lhyi paiq joqyos ma yoeus tyamp, dius jens gas nyamoq dah phauh thyeih Mangso lhyi paiq das xiklyis ehnyet nhaiqlom dvnganh yah ma tauh los.

³⁴Yehoshaphat kuot cho nyet shih goeu vpom mha zis vthyoh gas Israel hwankti jens sungson dvdoeus nghuot dah Hanani lo Yehu Sungson mha lhaih toh.

³⁵Dvshishenh lyis Yuda Hwankti Yehoshaphat gas, svsoh lhung khyvlyis kuot soeu, Israel Hwankti Ahazia yah buisnoms kuot.

³⁶Nyah aiq yuk gas Tarshi pheh loh das sangpho lhyi Ezion Geber mas tsain tsuk.

³⁷Nghuot laus eq Mareska mha dah Dodawa lo Elieza Yehoshaphat lyis tyi lha pe zis gas, Nvng Ahazia yah buisnoms kuot yvmvyah, YHENSAIN ka nah muh lyis thyoq tyamp dyei, ge. Housoeh hauh sangpho ka dyoq las Tarshi mas ma yoh jweh lo.