Read Achang 2 SUNGSON 23 Bible Online

2 SUNGSON 23 - Achang bible

2 SUNGSON 23

¹Khyuk zvn langh thang lhyi phudyei soeu Yehoiada gas kuot loh chah goeus ge nghamh thyet. Nyang gas xosoe guon jeszau jens ge, Yeroham lo Azaria, Yehohanan lo Ishmael, Obed lo Azaria, Adaia lo Maseia yahge Zikhri lo Elishaphat moq yah xamxonh cho kuot.

²Nyamoq gas Yuda mau gonh mas loh las Yuda wus jens masyah Lewi jens yahge Israel jens dah vhuh uhshe bang lyis tsainh las Yerusalem mas shwih los.

³Nyamoq dvnganhmoq Yhenmuh mas zain las hwankti dah lo Yoash yah thanghchvp toh. Yehoiada nyamoq lyis taiq zis gas, Hei ka thang thank hwankti dah loloeu nghuot. YHENSAIN ka Dawi dah vnyau vshih jens lyis dangthoengh toh zis yah dvyhangteh, gvshih nyang hwankti bweh das.

⁴Heika yamoq kuot das cho nghuot. Yuda no nyeih lyis muh wons das ge wvng los dah phudyei bang yahge Lewi jens somh boms dvboms Yhenmuh khomh zungh chah.

⁵Somh boms dvboms gas hwankti yhen mha, somh boms dvboms gas Yhen-yos Khomh mas zungh chah. Dius dvnganhmoq gas Yhenmuh Khyam khau mha zain das.

⁶Muh oen phudyei bang yahge Lewi jens masyah lai las hank eq Yhenmuh khau mha vwvng. Nyamoq lyis cheihshang las gyingshang goeus las yoh wvng loh. Nyet dah dius dvnganh gas YHENSAIN taiq toh dang lyis chank las nghe pheh langh nyeis das.

⁷Lewi jens gas hank eq hank nyang sham lham chi lha hwankti lhyi lhaink toh las, yhenmuh khau mha wvng soeu hank lyis laus eq sat geh. Hwankti khalhye loh khalhye chank geh, ge toh.

⁸Housoeh Lewi jens yahge Yuda jens dvnganh gas phudyei Yehoiada vmingh dyei zis yah dvyhangteh chank kuot. Phudyei Yehoiada khaphung lyis eq ma no nhang gvng mas yuk khanghmuh gas vsainnyang dah dius: Yuda no nyeih lyis muh vvng bang yahge muh no bang lyis shwih toh.

⁹Phudyei Yehoiada gas Yhenmuh mas joq, Hwankti Dawi dah lham jens, gos kuh gos ngis lyis xosoe guon jeszau jens lyis kyauh.

¹⁰Hank eq hank nyang loq mas kyonhkhyi chi dah bang lyis hwankti yvmlhaink - yhenmuh loqyos shot masyah loqwi shot jweh shoq, phon yahge yhenmuh yvmlhaink yah toh.

¹¹Yehoiada yahge nyah loloeu jens gas hwankti dah loloeu, Yoash lyis shwih thuq las, hwankti buismuk tsungh dyei; nyamoq gas Yoash lyis Mangso dah lyi dvbuk dyei las hwankti nghuot ge taiq hoeuh. Nyamoq gas, nyang lyis coeu juot dyei las kaiq zis gas, Hwankti kang xing bas jungh, ge.

¹²Athalia gas, dius jens wuih sam yahge hwankti lhyi chungh dah thwe xauhgyo lyis, dius jens huom joq dah Yhenmuh pheh gyis jweh loh.

¹³Houmha nyang yoeuh kat lyis, hwankti saiq ka Yhenmuh khomh, hwankti jens dah senhtyau zains nvm mas yap joq, jeszau jens yahge lvbuh muot bang gas nyah vyvm mas nyeis. Dius jens dvnganh gauslaus gausseq kaiq nyeis, lvbuh muot nyeis, yhenmuh chunghthwe kat bang nyamoq dah lvbuh janghau bat las pwe shwih uhshe nyeis. Housoeh las Athalia gas nhaiqngis las nyah dyimis lang chuiq zis yah kaiq zis gas, Gomloeus, gomloeus, ge.

¹⁴Phudyei Yehoiada gas nyang lyis Yhenmuh khau mha vsat goh, nyang lyis nghe pheh shwih thuq las nyah thang chank bang dvnganh lyis eq sham yah sat geh, ge jesphung lhyi shwih dah xosoe guon jeszau jens lyis taiq.

¹⁵Housoeh las nyamoq Athalia lyis nyhik las hwankti yhen pheh loh dah Nyang Khomh dwang mas sat.

¹⁶Hauh thang lhyi Yehoiada gas nyang eq Hwankti Yoash yahge dius jens dvnganh eq YHENSAIN dah dius jens duot bas jungh ge, thanghchvp toh.

¹⁷Hauh thang lhyi nyamoq dvnganh gas Bala yhen lhyi loh thyoq tyamp. Hau phon jens yahge gungslho jens lyis khyop tyamp. Bala phudyei soeu Matan lhyi phon jens xik mas sat.

¹⁸Yehoiada gas phudyei bang yahge Lewi jens lyis Yhenmuh dah muh wons wuq das xiklyis toeuq toh. Nyamoq gas Hwankti Dawi nyamoq lyis toeuq toh dyei yvwons yahge Moshe dah Lyi mas lhaih toh,YHENSAINlhyi ngheq phudyei cho kuot chah. Nyamoq gas thwe yungh[14] yahge pwe kuot cho mha eq yvwons yoeus chah.

¹⁹Yehoiada gas Yhenmuh mas ma lhoq ma shang soeu hank laus eq ma wvng bas jungh, Yhenmuh khyam khomh jens mas zungh bang eq toh.

²⁰Jeszau jens, nyoqnho ngelang bos bang, mungh zau jens yah hauh mau mas dah dius jens gas Yehoiada yah dvgeh, hwankti lhyi Yhenmuh masyah shwih thuq las vgungs khomh cho yah hwankti yhen pheh shwih loh. Hwankti ka nyah joqyos hwankti tank mas tsung.

²¹Dius dvnganh tsain gaus. Athalia lyis sham yah sat goeus las hauh wus gas tam joq.