Read Achang 2 SUNGSON 24 Bible Online

2 SUNGSON 24 - Achang bible

2 SUNGSON 24

¹Yoash ka nyang hwankti bweh los uhlyis nyenhkyi nyhet zvn nghuot las Yerusalem mas nyeici zvn guon khoq. Nyah ungwes gas Besheba mas dah Zibia nghuot.

²Yoash ka phudyei Yehoiada dvzaih gonh YHENSAIN dah nyoqlvtjvng mas jus zis kuot.

³Yehoiada nyang lyis yhensain nyhiq aiq yuk yoeus dyei las, nyang mas lonyi loloeu jens bos.

⁴Yoash hwankti kuot thang ma nyangh lyis nyang gas Yhenmuh soq dyvng das ge nghamh thyet.

⁵Nyang gas phudyei bang yahge Lewi jens lyis dvgeh khi tsainh toh las taiq zis gas, Yhenmuh soq das xiklyis namoq Yuda wus jens mas gvshih nyang loh las Israel jens jyank masyah dvzvn dvzvn kat chah ngwis tsainh, ge. Nghuot laus eq Lewi jens lvnyap ma kuot.

⁶Housoeh las hwankti ka phudyei uhjyung Yehoiada lyis khi taiq zis gas, Kanghjyoeng kat dah zvng xiklyis YHENSAIN dah jyeidwis Moshe yahge huom dah Israel moqphung kuot teh, Lewi jens gas Yerusalem wus masyah Yuda mau dvkhauyah dah ngwis tsainh chi los das cho nvng chamus ma doengs toh, ge.

⁷Lai loh goeus zvnlom jens lyis lhung dah vmesbih Athalia dah thang chank bang gas, YHENSAIN dah Yhenmuh lhyi thyoq, kyauh toh gyingshang vyhang dvnganh yoeus las Bala lyis paiq yvmas yhung, ge.

⁸Housoeh hwankti taiq kat las, Lewi jens gas vlu kat das xiklyis kwi kuot las yhenmuh khyam khomh nghe thaq toh.

⁹Nyamoq gas Mangso dah jyeidwis Moshe ka mhanhdyvp mas Israel vnyau masyah cangxeih vlhain sang goeus dah khoengh lyis YHENSAIN xiklyis chi los chah ge, Yerusalem wus, Yuda mau dvkhau yah kyoh kat.

¹⁰Dius jens yahge nyamoq dah uhshe bang dvnganh gausyis zis yah khoengh ngwis chi los las hauh kwi mha dyingh shoq tsain kat toh.

¹¹Gvshih hau kwi mha ngwis nyoshoq bos las Lewi jens gas hauh kwi lyis hwankti dah jyeidwis jens jyank mas hwank kat lyis, hwankti dah lhaih soeu yahge phudyei zainsmuh dah jyeidwis jens gas kwi nghat lho lha nyah joqyos mas doms toh. Housoeh nyeih yau nyeih kuot las ngwis vbomsdom tsainh toh.

¹²Hwankti yahge Yehoiada gas hauh yvlyis Yhenmuh mas muh zwi bang lyis kyauh toh. Nyamoq gas Yhenmuh soq das zis luk tsan bang, soehfuh jens, thyeq shonh bang, thunk shonh bang lyis nghoh.

¹³Muh zwi bang yomkat las muh dye loh. Nyamoq gas Yhenmuh vkhang vgus goeng shoq doms kuot toh.

¹⁴Nyamoq dye kuot goeus ya, nyet dah ngwis lyis hwankti yahge Yehoiada jyank mas chi los. Nyah aiq yuk hauh ngwis yah Yhenmuh mas phudyei muh xiklyis mot, ngwis khuq, xing khuq tsain shonh. Housoeh phudyei Yehoiada zaih lyis nyamoq gas Yhenmuh mas vjangh ngheq phudyei.

¹⁵Yehoiada gas nyah buisnyeis dyingh, mang las dvxo somhci zvn lyis shei.

¹⁶Nyang gas Israel jens xiklyis eq, Mangso xiklyis eq, nyah yhen xiklyis eq gis khyvlyis kuot goeus yvmvyah, Dawi dah wus hwankti lop mas nyhop zis xauh.

¹⁷Gvshih Yehoiada shei thang lhyi Yuda uhshe bang gas hwankti lhyi los mhuih. Hwankti eq nyamoq dah dang gyo dyei.

¹⁸Housoeh yvmvyah dius jens gas nyamoq phauh thyeih moq dah YHENSAIN Mangso lhyi toh khoq las gywesnyhiq Ashera gungslho, silho lhyi paiq loh. Nyamoq cu gvng mas YHENSAIN dah nhaiqyo cho ka Yuda yahge Yerusalem bang thoq mas jweh.

¹⁹YHENSAIN ka nyamoq lyis nyah jyank pheh shwih tauh los das xiklyis lvpe jens lyis nhang lha, nyamoq kanghjyoeng kat laus eq nyamoq ma gyo.

²⁰Mangso dah Dyos gas phudyei Yehoiada lo Zekharia thoq mas jweh las, nyang gas dius dvnganhmoq nyvng dah vthoq mas yap las taiq zis gas, Mangso heisoeh ge: Namoq YHENSAIN nyvng dah tyingtoh dang lyis chamus lhyweq? Housoeh las namoq ma jebais. Namoq YHENSAIN lhyi tyamp yvmvyah YHENSAIN eq namoq lyis tyamp, ge.

²¹Nyamoq gas nyang lyis ma gis khyvlyis lhaink las, hwankti dah vmingh yah Yhenmuh khyam mas lukzains yah doeuh sat.

²²Hwankti Yoash ka Zekharia dah uwus Yehoiada gas nyang lyis hwankti bweh los shoq kuot goeus cho lhyi ma soh, nyah lo lyis sat. Zekharia shei yeis lyis taiq zis gas, YHENSAIN hauh yvlyis yoeuh las cap bas jungh, ge.

²³Hauh zvn thang mha, Siria jesphung jens gas Yoash lyis zan das zis doq los. Hauh jesphung ka Yuda mau yahge Yerusalem mas wvng zan las uhshe bang dvnganh lyis sat. Nyamoq gas lvnyhvp dvnganh lyis Damasku pheh, nyamoq dah hwankti jyank huon kat.

²⁴Yuda jens gas nyamoq phauh thyeih moq dah Mangso lhyi tyamp yvmvyah, YHENSAIN ka nyamoq dah jesphung zainsmuh lyis, nainlo dvnghuot dah Siria jesphung loq mas kyauh tyamp. Heisoeh Yoash gas joeng zis xauh.

²⁵Nyamoq nyang lyis svsoh xungh shoq dvmtap toh khoq las thuq loh thang lhyi, nyah jyeidwis jens gas hau phudyei Yehoiada lo[15] dah suih gvng mas nyah yhetyos mas nyang lyis tsain lhaink sat las nyang shei. Nyang lyis Dawi dah wus mas nyhop laus eq hwankti lop mas ma nyhop.

²⁶Heika nyang lyis lhaink sat vzomh nghuot: Amon vmesbih Shimeat ge soeu dah lo Zabad, Moab lonyi Shimrit ge soeu dah lo Yehozabad.

²⁷Nyah lo jens yah sen cho, nyah cho pe zis yahge Yhenmuh soq cho ka hwankti jens lhaih comh maussauh mas lhaih toh. Nyah lo Amazia gas nyah joqyos mas guon khoq.