Read Achang 2 SUNGSON 26 Bible Online

2 SUNGSON 26 - Achang bible

2 SUNGSON 26

¹Yuda dius jens dvnganh gas dvci khyuk zvn bos dah Uzia lyis shwih yoeus las nyah uwus Amazia gungsthaiq hwankti toh.

²(Hwankti Uzia nyah uwus shei thang lhyi Yuda mau mas dah Elot wus yoh doms zan yoeus las doms tsuk.)

³Nyang hwankti bweh los uhlyis nyah nyenhkyi dvci khyuk zvn nghuot las Yerusalem mas oengci aiq zvn guon khoq. Nyah ungwes gas Yerusalem mas dah Yekholia nghuot.

⁴Nyang gas nyah uwus Amazia kuot khoq vgus YHENSAIN dah nyoqlvtjvng mas jus khyvlyis kuot.

⁵Nyang gas Mangso lhyi gyukwoms das cho taiq shet nyeis dah Zekharia nyeis dvchank Mangso lhyi xo. Nyang Mangso lhyi xo dvchank Mangso ka nyang lyis ung cho dyei.

⁶Nyang Philisti jens lyis loh zan las Gat, Yabne yahge Ashdod wusciank jens lyis thyoq tyamp las Ashdod wus nvm mas goengtoenk wus tsuk teh Philisti mau goh joqyos mas eq tsuk.

⁷Mangso ka Philisti jens, Meun jens yahge Gurbal mas nyeis Arab jens lyis zan ung das xiklyis nyang lyis pangh.

⁸Amon jens Uzia lyis khoengh kat, las nyang gas svsoh yom bos los las Egutu jweh shoq nyah nyings hoeuh jyangh toh.

⁹Uzia gas Yerusalem mas tyoeuqzvm lyis Vthunk Khomh mas, Langhkhau Khomh mas yahge wusciank thunk mas tsuk las hauh zis dvnganh lyis goengtoenk nhang.

¹⁰Nyang gas mhanhdyvp mas eq goengtoenk tyoeuqzvm jens lyis tsuk, jeis dwang eq nyoshoq doeu, khasoeh ge lyis nyang gas buiswvng pheh dah jing khyei, pa mha gaunyhauq nyoshoq nyhoeu. Nyang tsunghzo tsunghshuk cho lhyi ngwis gvng mas, dius jens lyis boms mau mas zvbiq khyam kuot das cho yahge nyeiscoeu bos yvmas zwizo das xiklyis yomdyei.

¹¹Uzia gas vphung phung, jeskhyomp pheh loh das xiklyis cicont nghuot, vlhomuh puot toh goeus jes thoeuqzoe jens bos dah jesphung yoh. Haih jesphung zainsmuh mas dah jeszan bang lyis tsainh, gvn dah aiq yuk gas lhaih soeu Yeiel yahge Maseia nghuot. Nyah aiq yuk gas hwankti dah zau jens mas dvyuk nghuot dah Hanania dah loq khau mha muh zwi.

¹²Vhuh uhshe bang aiq khyoengh khyuk xo yuk gas jes thoeuqzoe lyes bang bos dah haih svsoh kuh dah jesphung lyis uhshe.

¹³Nyamoq dah vmingh o mha ka hwankti lhyi nyah jeswus lyis zvn las pangh thuq das yom bos, jeszan khyomp xiklyis puot toh goeus, dius 307,500 yuk bos thoenkgus jesdvp joq.

¹⁴Hwankti Uzia gas thoenkgus jesdvp gonh lyis gos, lham, jesuhkyop, jesdyi, lyei yahge nyho dyei.

¹⁵Nyang gas Yerusalem tyoeuqzvm yahge wusciank thunk masyah nyo, luklom kuh baiq kat das xiklyis jak tsuk toh. Hauh jak lyis lyes bang kuot thuq toh. Nyah nyings svsoh hoeuh jyangh toh: khasoeh ge lyis YHENSAIN ka nyang svsoh yombos los shoq mauhphoh cho yah nyang lyis pangh toh.

¹⁶Nghuot laus eq Uzia gas nyang svsoh yom bos los lyis nyang khwank cho ka nyang lyis dyoqbis cho pheh shwih loh goeus. Nyang gas YHENSAIN nyah Mangso lhyi lom ma luk, xangh phon thoq mas xangh ngheq das xiklyis YHENSAIN dah Yhenmuh mas wvng loh.

¹⁷Phudyei Azaria yahge YHENSAIN dah womh dah phudyei bang xetci yuk nyah thang mha chank wvng loh.

¹⁸Nyamoq gas Hwankti Uzia yah xauhgoh las taiq zis gas, Uzia nvng gas YHENSAIN lhyi xangh ngheq dyei soeu ma nghuot. Xangh ngheq das bang gas hauh xiklyis toeuq toh dah Aron dah vnyau vshih phudyei bang kyingh dvnghuot. Haih gyingshang joqyos masyah thuq loh aq, khasoeh ge lyis nvng yaunos kuot goeus. Haih gvng mas YHENSAIN Mangso ka nvng lyis nyoqnho ngelang dyei das zis ma nghuot, ge.

¹⁹Uzia gas Yhenmuh khau xangh phon xikkhonh mas xangh ngheq zis chi lha yap joq. Nyang phudyei bang lyis nhaiqyo las hauh uhlyis nyang nyah ngelang mas gyukphoh dah dvmjot thuq los goeus.

²⁰Phudyei Zainsmuh Azaria yahge gohtoeu phudyei bang nyang lyis yoeuh kat lyis nyah ngelang mas gyukphoh dvmjot jot joq zis lyis nyvng, housoeh las nyamoq nyang lyis lvnyap khat thuq kat. YHENSAIN joeng goeus las nyang eq lvnyap thuq loh.

²¹Hwankti Uzia gas nyang shei buisnyeis jweh shoq gyukphoh dvmjot juot. Gyukphoh dvmjot gvng mas nyang kyingh dvyhen nyeis. YHENSAIN dah Yhenmuh mas eq ma gis loh lo. Nyah lo Yotham hwankti yvwons yoeus las dius lyis guon.

²²Uzia guon yoq lyis bweh cho nyet shih goeu vsaiq masyah thank shoq lyis Amoz lo lvpe Esaia lhaih toh.

²³Uzia gas shei lha Dawi dah wus mas nyah phauh thyeih moq dah lop nvm, hwankti jens wis toh lop-yos mas nyhop zis xauh, khasoeh ge lyis nyang gas gyukphoh dvmjot jot las hwankti lop mas nyhop zis ma xauh. Nyah gungsthaiq nyah lo Yotham guon khoq.