Read Achang 2 SUNGSON 28 Bible Online

2 SUNGSON 28 - Achang bible

2 SUNGSON 28

¹Ahaz nyenhkyi aiqci zvn bos lyis hwankti bweh los las Yerusalem mas dvci khyuk zvn guon. Nyang gas nyah phauh thyeih Hwankti Dawi dah gis yikhyoh ma chank las nyang kuot cho ka YHENSAIN dah nhaiqdoeus cho ma nghuot.

²Nyang gas Israel hwankti jens dah cho mha chank suh las Bala ngwis xing gungslho kuot.

³Ahaz gas, YHENSAIN ka Israel jens dah xikkhonh masyah khat tyamp goeus, gohnyau bang dah vwot v-oeu cho chank las Hinom Langhkhau mha xangh ngheq dyei, nyah loloeu jens lyis eq ngheq phudyei.

⁴Nyang gas jing thoq mas ma jyoeng dah mangso lhyi paiq joqyos khanghmuh yahge, saiq nyaus zains khyei khanghmuh mas phudyei cho kuot, xangh ngheq dyei.

⁵Hwankti Ahaz yaunos kuot gvng mas YHENSAIN nyah Mangso ka nyang lyis Siria hwankti lhyi yah ung nhang lha Yuda dius jens nyoshoq Damasku pheh thung dius khyvlyis shwih loh nhang. YHENSAIN ka Remalia dah lo Israel hwankti Peka lyis eq Ahaz lyis ung nhang las dvnyeih dvm lyis womh dah Yuda jeslo 120,000 yuk lyis sat nhang. YHENSAIN nyamoq dah phauh thyeih Mangso ka haih cho bweh nhang goeus khasoeh ge lyis Yuda dius jens gas nyang lyis tyamp toh.

⁷Ephraim yombos thoeuqzoe Zikhri ka Hwankti Ahaz dah loloeu Maseia, hwankti yhen guon zau Azrikam yahge hwankti o mha soeu Ekana moq lyis sat.

⁸Israel jens gas nyamoq dah boekyis vmesbih, loshang jens aiq sens shwih jons loh. Nyamoq jyank masyah lvnyhvp nyoshoq eq khyom lha Samari pheh yoeus loh.

⁹Samari wus mas Oded ge, YHENSAIN dah lvpe dvyuk nyeis. Nyang gas wus pheh wvng los nyeis dah Yuda thung dius eq bos dah Israel jesphung xikkhonh mas loh las taiq zis gas, Yoeuh aq YHENSAIN namoq dah phauh thyeih moq dah Mangso ka Yuda jens lyis nhaiqyo las nyamoq lyis namoq loq mas kyauh goeus. Nghuot laus eq namoq gas maukhung thuk shoq nhaiqyo zis yah nyamoq lyis sat goeus cho nyang xauhgyo goeus.

¹⁰Gvshih namoq gas Yuda mau yahge Yerusalem mas dah vbusbih vmesbih jens lyis jons kuot das ge sont. Housoeh kuot lyis YHENSAIN, namoq dah Mangso lhyi cu zis nghuot cho lhyi namoq ma seq goh lhyeh?

¹¹Housoeh las namoq gvshih ngah dang gyo geh. Haih thung dius jens gas namoq dah boekyis jens nghuot. Nyamoq lyis kat kat geh, ma nghuot lyis YHENSAIN dah gyukphoh nhaiqyo zis yah namoq lyis joeng das, ge.

¹²Hauh uhlyis Ephraim jens dah uhshe bang dvyhamh, Yohanan lo Azaria, Meshilemot lo Berekhia, Shalum lo Yehizkia yahge Hadlai lo Amasa, jeszan masyah los bang lyis tyi lha toq yap las,

¹³taiq zis gas, Namoq jonsdoeus bang lyis heimha ma gis shwih los: khasoeh ge lyis yang YHENSAIN lhyi yobos kuot goeus, yang lyis joeng das iq nyang lyis yang nhaiqyo nhang goeus. Gvshih namoq gas yah yobos zes nyo los shoq kuot mes, ge.

¹⁴Housoeh jesphung ka jonsdoeus bang lyis eq, lvnyhvp lyis eq dius jens yahge nyamoq dah uhshe bang xikkhonh mas toh khoq.

¹⁵Vkhang nyings yoeus toh nyei yuk gas lvnyhvp lyis toq yoeus las, jonsdoeus bang mas shohchen nghuot bang lyis hau lvnyhvp mas zis gvm huot, thyvkoq gvm koq, zo shuk zis dyei, dvm mas tsanlun coeu juot dyei las, yomnhuk bang lyis mauhlyihzoe mas ji nhang. Housoeh nyamoq dah boekyis lyis dyoms zains wus ge, Yerikho wus Yuda mau mas shwih kat las Samari pheh tauh loh.

¹⁶Edom bang Yuda lyis los doms zan las dius jens lyis shwih jons loh. Hauh shishenh mas hwankti Ahaz ka Asiria hwankti zainsmuh Tiglat Pileser jyank mas nyang lyis pangh das xiklyis sang nhang kat.

¹⁸Hauh shishenh mas Philisti jens eq buiswvng jing khyei wus jens yahge Yuda mautyi chink pheh wvng zan las Betsheme, Aiyalon, Gederot, Sokho wus yahge wuxom wukhau jens, Timna yahge nyah wuxom wukhau jens, Gimzo wus eq nyah wuxom wukhau eq zan yoeus las nyamoq houmha nyeis.

¹⁹Yuda Hwankti Ahaz gas nyah dius jens lyis yaunos kuot das cho yomdyei, nyang nyang eq Mangso lhyi lomluk cho dvtsiq eq ma bos gvng mas YHENSAIN ka Yuda lyis khyoq tyamp.

²⁰Nyah jyank mas Asiria hwankti Tiglat Pileser los laus eq nyang lyis ma pangh, yau dvzes dyei.

²¹Ahaz gas YHENSAIN yhen mha eq, hwankti yhen mas yahge nyah zau jens dah yhen mha eq zisyos yoeus las Asiria hwankti lhyi dyei. Nghuot laus eq nyah xiklyis vkyuh ma bos.

²²Hwankti Ahaz ka haih shishenh lyis hei iq yaukyenh shanghsenh laus eq YHENSAIN lhyi zes lom ma luk kuot.

²³Nyang gas, Siria hwankti jens dah mangso jens gas nyamoq lyis pangh yvmvyah, ngos lyis eq pangh bas jungh, ngos nyamoq lyis phudyei das ge, nyang lyis ung dah Damasku wus dah mangso jens lyis phudyei. Nghuot laus eq, hauh zis gas nyah xiklyis eq, Israel dvnganh xiklyis eq dyoqbis cho dvnghuot.

²⁴Ahaz gas Mangso yhenmuh mha dah vyhang lhyi khyom lha vdoeus doeus thyet, YHENSAIN dah yhenmuh khomh kyank tyamp las Yerusalem wus vthunk vyoq khanghmuh mas phon tsain ci toh.

²⁵Hauh thoq lyis gohtoeu mangso jens lyis xangh ngheq dyei das xiklyis Yuda wus khanghmuh mas ma jyoeng mangso jens lyis paiq joqyos kuot las nyah phauh thyeih moq dah Mangso lhyi nhaiq lhoq yo.

²⁶Nyah muh nyet shih goeu vpom zis vthyoh Yuda yahge Israel hwankti Sungson mha lhaih toh.

²⁷Hwankti Ahaz shei lha Yerusalem wus mas nyhop. Nghuot laus eq nyang lyis hwankti jens dah lop mas ma nyhop. Nyah lo Hezekia gas nyah joqyos mas guon khoq.