Read Achang 2 SUNGSON 30 Bible Online

2 SUNGSON 30 - Achang bible

2 SUNGSON 30

¹Hauh thoq lyis Hezekia gas Israel yahge Yuda mau gonh dius nhang lha, Ephraim yahge Manase mau pheh eq maussauh lhaih las, Yerusalem wus YHENSAIN dah Yhenmuh mas YHENSAIN, Israel Mangso dah Lhuiq Kat Pwe zo das zis khi kat.

²Khasoeh ge lyis lhamhmuh aiq vkhyvp lyis hau Lhuiq Kat Pwe zo das xiklyis, hwankti eq nyah uhshe bang eq, Yerusalem mas dah moqphung dvnganh eq xam nyoq goeus.

³Khasoeh ge lyis vsainnyang gungs lyis yoh cheihshang dah phudyei bang ma nyo shih, moqphung eq Yerusalem mas ma yoh huom shih las cangxeih lhamhmuh khyvp mas ma yoh kuot.

⁴Hauh Lhuiq Kat Pwe kuot cho ka hwankti yahge moq dvphung gonh xiklyis gis joq.

⁵Housoeh las nyamoq gas Yerusalem mas YHENSAIN, Israel dah Mangso dah Lhuiq Kat Pwe zo das zis dvnganhmoq los bas jungh ge, Israel mau gonh mautyi vthang Besheba masyah mautsung vthang Dan wus jweh shoq khi maussauh huon das ge dang toh. Khasoeh ge lyis Lhuiq Kat Pwe lhyi lhaih toh khyvlyis dius nyoshoq yah ma xauh kuot zis nyangh goeus.

⁶Hwankti yahge uhshe bang dah maussauh dih bang gas Israel mau, Yuda mau gonh mas loh las: Hwankti taiq toh zis yah dvyhangteh, haih maussauh gas, Israel jens eh, Asiria hwankti dah loq masyah yoh luiq las nyet shih bang namoq jyank mas YHENSAIN, Abraham, Isak yahge Yakop dah Mangso lhain los bas jungh, namoq eq nyah jyank mas ehnyet nhaiqlom lhain los geh.

⁷YHENSAIN, phauh thyeih moq dah Mangso lhyi lom ma luk bang, namoq dah phauh thyeih moq yahge boekyis Israel jens teh vkuot goh; namoq nyvng nyeis zis yah dvyhangteh, nyamoq lyis dyoqbis yvpheh kyauh tyamp goeus.

⁸Namoq dah phauh thyeih moq teh nhaiqlom than dah vnyau vkuot goh. YHENSAIN xikkhonh mas nhaiqlom nyhen mha gyoh las, nyah nhaiqyo cho ka namoq masyah lhaiq loh bas jungh. Nyang vcaiq vto xiklyis cheihshang toh, nyah yhenmuh mas wvng las YHENSAIN, namoq dah Mangso lhyi paiq geh.

⁹Namoq YHENSAIN jyank pheh lhain los lyis namoq dah boekyis yahge lo jens lyis shwih jons loh bang, nyamoq lyis nhaiqnyen las haih mau mas yoh doms tauh los das: khasoeh ge lyis YHENSAIN, namoq dah Mangso ka jyehjuh yahge nhaiqnyen cho bos las, namoq nyah jyank mas lhain los lyis nyang namoq lyis lhom yoeus das, ge.

¹⁰Housoeh maussauh dih bang gas Ephraim yahge Manase wuxom gonh, mautsung pheh nyeis Zebulun vkoq bang jyank jweh shoq dvwus thang lhyi dvwus loh. Nghuot laus eq hauh bang gas nyamoq lyis yis zis yah jwangh.

¹¹Nghuot laus eq Asher, Manase yahge Zebulun mas bang nain lo gas ehnyet nyhen mha gyoh las Yerusalem pheh loh.

¹²YHENSAIN taiq toh dang chank kuot dah hwankti yahge uhshe bang taiq kat zis yah dvyhangteh, Yuda mau bang gas ehnyet dvlom yah yoh chank shoq YHENSAIN dah loq gas nyamoq thoq mas joq.

¹³Gvshih lhamhmuh aiq vkhyvp lyis bicheih ma kat ohlhyoq zo pwe kuot das xiklyis moqphung zainsmuh Yerusalem mas huom toh.

¹⁴Nyamoq gas Yerusalem wus mas joq, ma jyoeng mangso jens dah phon jens lyis yoeus tyamp. Nyamoq gas xangh phon dvnganh lyis yoeus tyamp las Kidron langhkhau mha e doeuh tyamp.

¹⁵Hauh thang lhyi aiq vkhyvp, dvci nyei vnyeih lyis Lhuiq Kat Pwe yvnglo tsain sat. Phudyei bang yahge Lewi jens gas xoqphuh las nyamoq gungs lyis cheihshang lha ngheq dyei jyungshuk YHENSAIN Yhenmuh mas tsain chi los.

¹⁶Tsai, nyamoq gas Mangso dah dius Moshe lyi mas taiq toh joqyos mas yap las Lewi jens dah loq masyah suih lhom yoeus las phon thoq mas doeuh gyuon.

¹⁷Khasoeh ge lyis vsainnyang gungs lyis ma cheihshang shih bang nyoshoq hauh moqphung mha bos las, Lewi jens gas lyi bos khyvlyis vsainnyang gungs lyis cheihshang cho ma kuot las Yhensain lhyi Yvnglo ma yoh kyauh dyei dah bang xiklyis Lhuiq Kat Pwe Yvnglo sat dyei.

¹⁸Ephraim, Manase, Isakha yahge Zebulun mau bang nyoshoq vsainnyang gungs lyis ma cheih ma shang, lhaih toh khyvlyis ma kuot, Lhuiq Kat Pwe tsain zo. Nghuot laus eq Hezekia nyamoq xiklyis dung zis gas, Gis dah YHENSAIN eh, yuk khanghmuh lyis mehoq tamp dyei aq.

¹⁹Gyingshang joqyos lyi khyvlyis cheihshang cho ma kuot laus eq vsainnyang nhaiqlom mas YHENSAIN, nyah phauh thyeih moq dah Mangso lhyi xo das ge sont soeu khanghmuh lyis yobos khyuot dyei aq, ge.

²⁰YHENSAIN ka Hezekia dah vkyuh dung dang lyis gyo dyei las dius jens lyis gis los nhang.

²¹Housoeh Yerusalem mas zain nyeis dah Israel jens gas gausyis ehnyet yah nyhet nyeih bicheih ma kat ohlhyoq zo pwe kuot. Lewi jens yahge phudyei bang gas YHENSAIN lhyi chungh toenk khvlhank yah chunghthwe kat las, dvnyeih thang lhyi dvnyeih YHENSAIN lhyi tsain chungh.

²²Hezekia gas YHENSAIN lhyi paiq cho wontang seq dah Lewi jens dvnganh lyis yomdyei. Housoeh nyhet nyeih, nyamoq gas nyamoq xiklyis toeuq toh zo shuk zo, nyenstap jyungshuk phudyei las YHENSAIN, nyamoq phauh thyeih moq dah Mangso lhyi chungh.

²³Huom nyeis bang gas pwe nyhet nyeih tsoq kuot goh ge xamxonh las gausyis zis yah pwe nyhet nyeih tsoq kuot.

²⁴Yuda hwankti Hezekia gas moqphung xiklyis noeulu dvkhyoengh, yvng nyhet khyoengh dyei. Uhshe bang eq moqphung lhyi noeulu dvkhyoengh, yvng dvmons dyei. Nyoshoq dah phudyei bang eq vsainnyang gungs lyis cheihshang.

²⁵Phudyei bang yahge Lewi jens yah dvgeh Yuda moqphung, Israel mau masyah jweh los dah moqphung dvnganh, Israel yahge Yuda mau mas khau nyeis boenghwus dvnganh gas gausyis nyeis.

²⁶Housoeh Yerusalem mas gausyis zainsmuh nghuot. Israel hwankti, Dawi lo, Solomon dah zaih masyah gvshih jweh shoq hou iq gausyis cho ma bos ku lo.

²⁷Phudyei bang yahge Lewi jens gas dius jens xiklyis YHENSAIN jyank shvmanh dung. Nyamoq dung dang lyis nyang nyeis, maukhung mha Mangso xauhgyo las lhom yoeus.