Read Achang 2 SUNGSON 31 Bible Online

2 SUNGSON 31 - Achang bible

2 SUNGSON 31

¹Haih cho dvnganh dye thang lhyi, houmha bos dah Israel dius jens gas Yuda wus khanghmuh mas loh las gyingshang luk lyis bat khyop, Ashera zains lyis bat khyauh. Nyamoq gas Yuda yahge Benyamin mau gonh, Ephraim yahge Manase mau mas dah ma jyoeng mangso jens lyis paiq joqyos yahge phon dvnganh mhont tyamp las nyamoq yhen pheh loh lo.

²Hezekia gas phudyei bang yahge Lewi jens lyis Yhenmuh khomh mas ngheq jyungshuk yahge nyenstap jyungshuk phudyei das xiklyis, zoppaiq cho yahge nhaiqshoqlang sang cho, chunghthwe kat cho kuot das xiklyis - nyamoq yuk khanghmuh dah yvwons khyvlyis phudyei bang nghuot ya Lewi jens lyis - vphung phung toeuq toh.

³Hwankti ka nvpyo yahge nyenhthang ngheq phudyei xiklyis, Yuda no nyeih, lohcanh yahge YHENSAIN dah Lyi mas lhaih toh khyvlyis toeuq toh pwe mha ngheq phudyei das xiklyis nyah gaunyhauq phung mha zis lyis gvm dyei.

⁴Hauh thoq lyis hwankti ka Yerusalem mas nyeis dius jens lyis nyamoq yoh mas zis dyei vvng dah gvm boms lyis phudyei bang yahge Lewi jens lyis dyei das xiklyis vmingh dyei, housoeh lyis nyamoq gas YHENSAIN dah Lyi yah sen dah muh mas nyamoq dah shishenh dvnganh yoh dyei das, ge vmingh dyei.

⁵Vmingh dyei kat yah dvyih Israel jens gas nyamoq dah cangxeih yhomh jyo, zvbiq saiq, tsanlun coeu, dyoyhei yahge yos dan mas thuq zis dvnganh lyis mes zis yah dyei. Nyamoq gas dvnganh mas dah ciboms dvboms lyis vboms dom chi los.

⁶Yuda wus jens mas nyeis dah Israel jens yahge Yuda jens gas noeu phung, yvng phung mas dah ciboms dvboms yahge YHENSAIN, nyamoq dah Mangso lhyi nyamoq kyauh toh dah jyungshuk vboms dom lyis eq chi los las vbomsdom los tsain boms toh.

⁷Nyamoq housoeh teh kuot zis lhamhmuh somh vkhyvp mas xi lha nyhet vkhyvp dye.

⁸Hwankti Hezekia yahge nyah zau jens nyamoq nyoshoq vtsank tsank boms tsainh toh zis lyis los nyvng lyis, nyamoq gas YHENSAIN lhyi chungh, Nyah dius Israel jens lyis eq chungh.

⁹Hwankti ka hauh zis nyvng lyis, hauh wom boms cho, phudyei bang yahge Lewi jens lyis nyei las,

¹⁰Zadok dah vnyau vshih, Phudyei Zainsmuh Azaria toeuh zis gas, Dius jens nyamoq dah jyungshuk Yhenmuh mas chi los nyeih masyah ngamoq zo das xiklyis tham lha nyoshoq nyet joq, khasoeh oen lhyi YHENSAIN ka nyah dius jens lyis shvmanh dyei gvng mas hei nyhoq nyoshoq nyet joq.

¹¹Hwankti ka Yhenmuh khyam mas jyi tsuk das xiklyis vmingh dyei las nyamoq jyi tsain tsuk,

¹²las dvnganh dah jyungshuk yahge ciboms dvboms lyis houmha gau gau tsain kat toh. Nyamoq gas Lewi dius Konania lhyi hauh muh mas kyauh las nyah vnoeuh Shimei lyis nyang lyis pangh soeu toeuq toh.

¹³Haih dah Lewi jens dvci yuk gas nyah zomh dah vmingh khau mha muh wons. Nyamoq gas Yehiel, Azazia, Nahat, Asahel, Yerimot, Yozabad, Eliel, Ismakhia, Mahat yahge Benaia nghuot. Haih cho dvnganh lyis Hwankti Hezekia yahge Phudyei Zainsmuh Azaria dah vmingh yah kuot toh.

¹⁴Yhenmuh buisthuq khomh zungh vdeq Lewi dius Imna dah loloeu, Kore lyis YHENSAIN jyank chi los dah jyungshuk lyis lhom yoeus las gvm dyei das xiklyis toeuq toh.

¹⁵Phudyei bang nyeis dah gohtoeu wus jens mas eq haih lomluk dah Lewi jens nyang lyis bos pangh. Nyamoq gas Eden, Miniamin, Yeshua, Shemai, Amaria yahge Shekania nghuot. Nyamoq gas nyamoq dah Lewi changh jens lyis nyamoq dah muhzoh lyis chank las kuh bang ngis bang dvyih wom tsain gvm dyei.

¹⁶Nyamoq gas Yhenmuh mas, vhuh yhenbang khyvlyis ma nghuot, nyamoq dah vsoenk khyvlyis nyeihyau muh oen dah vbusbih nyenhkyi somhci zvn, nghuot yah thoq pheh bang dvnganh lyis nyamoq dah gvmboms gvm dyei.

¹⁷Nyamoq gas yhenbang khyvlyis yah dius caiq comh toh dah phudyei bang yahge vsainnyang dah muh, phung khyvlyis nyings bos, nyenhkyi aiqci zvn nghuot ya thoq pheh dah Lewi jens lyis gvm dyei.

¹⁸Khah shishenh lyis eq nyamoq dah gyingshang muhzoh lyis yoh wonswuq das xiklyis nyamoq gas nyamoq dah yhensain nyhiq jens, lojens, gohtoeu los khau bang dah nyings kat toh.

¹⁹Vsainnyang dah wus jens yahge hauh wus jens dah katjang mas nyeis Aron vnyau vshih phudyei bang, xiklyis dius toeuq toh. Hauh bang gas phudyei yhenbang dvnganh yahge nyings bos dah Lewi vbusbih jens dvnganh lyis wom gvm.

²⁰Yuda mau gonh mas Hezekia ka jus cho, YHENSAIN nyah Mangso dah nhaiqdoeus cho lhyi kuot.

²¹Nyang gas jebais los, khasoeh ge lyis Yhenmuh yah sen lha kuot cho, Lyi chank cho mha nyang gas nyah ehnyet nhaiqlom dvnganh nyah Mangso lhyi lomluk luk kuot.