Read Achang 2 SUNGSON 33 Bible Online

2 SUNGSON 33 - Achang bible

2 SUNGSON 33

¹Manase ka nyenhkyi dvci aiq zvn lyis Yuda hwankti bweh los las Yerusalem mas oengci oeng zvn guon khoq.

²Manase ka YHENSAIN gas Israel jens dah xik lyis yah hauh mau masyah khat tyamp goeus dius nyau jens dah ma jyoeng mangso jens lyis paiq cho, vchoqh vjyot cho chank las YHENSAIN dah nyoqlvtjvng mas ma gis cho kuot.

³Nyang gas nyah uwus Hezekia mhont tyamp goeus dah ma jyoeng mangso jens lyis paiq joqyos lyis doms tsuk. Nyang gas Bala gungslho xiklyis phon tsuk, Ashera zains toeu cuk toh. Nyang gas maukhung mha dah kyi dvnganh xikkhonh mas dupaiq las paiq noq cho kuot.

⁴Nyang gas YHENSAIN ka nyah nyings xiklyis vcaiq vto phauh nyang cho kuot das ge dah joqyos, YHENSAIN dah Yhenmuh khau mha yangh ma jyoeng dah mangso jens dah phon lhyi tsuk.

⁵Nyang gas YHENSAIN dah Yhenmuh khyam khau aiq shot gonh mas maukhung mha kyi jens xiklyis hauh phon jens toh.

⁶Manase ka nyah loloeu jens lyis yangh Hinom lo dah langhkhau mha nyi[17] mas phudyei. Nyang gas botthyet, loq yoeuh, mandan muot, hweq kat, gyuiswvng cho kuot. Nyang gas YHENSAIN dah nyoqlvtjvng mas yaunos zainsmuh kuot las YHENSAIN lhyi nhaiqyo nhang.

⁷Nyang gas Yhenmuh mas gungslho lhyi toh, haih Yhenmuh yah sen lha YHENSAIN ka Dawi yahge nyah lo Solomon lyis taiq toh zis gas: Ngos lyis paiq das joqyos lyis Israel dvci aiq koq dah maunyeis dvnganh masyah haih Yerusalem Yhenmuh lyis ngos vcaiq vto xiklyis khyen yoeus.

⁸Ngos Israel jens lyis taiq toh zis yah dvyhangteh, ngah jyeidwis Moshe nyamoq lyis taiq toh dah lyi vgus chank kuot das xiklyis zaih lhyi ka, ngos namoq dah phauh thyeih moq lyis dyei toh dah mau masyah nyamoq lyis ma thuot ma lvng nhang das, ge.

⁹Manase ka Yuda dius jens lyis nyamoq dah xik lyis yah YHENSAIN ka hauh mau masyah khat thuq tyamp goeus dius nyau jens cu yaunos thoq lyis shwih cu.

¹⁰YHENSAIN ka Manase yahge nyah dius jens lyis zaih nhang laus eq, nyamoq gas dang ma gyo.

¹¹Housoeh las YHENSAIN ka nyamoq lyis tyi lha Asiria jesphung lhyi nhang kat las nyamoq gas Manase lhyi thyeq nghweh kat, thunk jvngchoh yah Babilon mau pheh thung dius khyvlyis twih she loh.

¹²Nghuot laus eq nyang svsoh yaukyenh uhlyis YHENSAIN nyah Mangso lhyi xo lha nyah nhaiqlom nyhen mha khyoq, nyah phauh thyeih moq dah Mangso lhyi pangh aq ge kaiq dung.

¹³Nyang vkyuh dung lyis YHENSAIN gyo dyei las nyang dung dah pangh cho bweh los nhang. Housoeh las YHENSAIN ka Manase lhyi Yerusalem yahge nyah hwankti mau pheh doms nhang kat. Thang thank lyis Manase ka YHENSAIN kyingh Mangso nghuot cho sohseq los.

¹⁴Haih zis bweh thang lyis Manase ka Dawi dah wus dah nghe pheh wusciank lyis doms soq ci. Hauh zis gas Kidron Langhkhau Gihon Lvnglo buiswvng masyah Oengdoq Khomh jweh las Ophel jing mas svsoh nyhang nyhang tsoq ci lhaink loh. Nyang gas goeng toenk dah Yuda wus khanghmuh mas jeszau dvyuk yuk toh.

¹⁵Manase ka jing thoq mas dah gohnyau bang dah mangso jens yahge YHENSAIN dah Yhenmuh mas dah silho lyis yoeus tyamp. Nyang gas Yhenmuh joq dah jing mas nyang tsuk toh dah phon dvnganh, Yerusalem wus mas joq phon dvnganh lyis bat khyop las wus nghe pheh doeuh tyamp.

¹⁶Hauh thang lhyi nyang gas YHENSAIN dah phon lyis doms soq ci lha nyenstap jyungshuk yahge nhaiqshoqlang jyungshuk lyis phudyei. Nyang gas Yuda jens lyis eq YHENSAIN, Israel dah Mangso lhyi paiq das xiklyis yomdyei.

¹⁷Housoeh nghuot laus eq, dius jens gas ma jyoeng dah mangso jens lyis paiq dah joqyos mas tsoq las phudyei nyeis shih, laus eq nyamoq gas, YHENSAIN, nyamoq dah Mangso lhyi kyingh phudyei.

¹⁸Manase guon yoq lyis bweh cho nyet shih goeu, nyang Mangso lhyi vkyuh dung dang, yahge nyvng bang YHENSAIN, Israel dah Mangso dah nyings mas nyang lyis taiq dang lyis Israel Hwankti jens dah sauhbuk mas lhaih comh toh.

¹⁹Manase dah vkyuh dung dang, Mangso ka nyah dah vkyuh dung dang lyis khasoeh toeuh cho, yahge nyah yaunos, nyah lom ma luk cho lhaih toh cho lhyi Nyvng bang[18] dah comh buk mas bos. Houmha nyang nhaiqlom nyhen mha ma gyoh shih yoq lyis, nyang gas ma jyoeng mangso jens paiq joqyos, Ashera zains, silho jens lyis vdeh deh mas kuot toh cho eq bos.

²⁰Manase shei lha nyang lyis nyah hwankti yhen mha nyhop. Hauh thang lhyi nyah loloeu Amon gas nyah joqyos mas hwankti kuot.

²¹Amon gas nyenhkyi aiqci aiq zvn lyis hwankti bweh los las Yerusalem mas aiq zvn guon khoq.

²²Nyang gas nyah uwus Manase teh YHENSAIN dah nyoqlvtjvng mas yaunos kuot. Nyang gas nyah uwus kuot toh dah silho dvnganh lyis paiq las phudyei las phuqsoe.

²³Nghuot laus eq nyang gas nyah uwus teh YHENSAIN dah xikkhonh mas nhaiqlom nyhen mha ma khyoq. Hauh gungsthaiq Amon gas yaunos zes kuot.

²⁴Amon dah zau jens gas, nyang lyis gomloeus toq las nyang lyis nyah hwankti yhen mha sat.

²⁵Nghuot laus eq dius jens gas Hwankti Amon lyis gomloeus toq bang lyis sat las nyamoq gas nyah lo Yosia lyis hwankti toq.