Read Achang 2 SUNGSON 34 Bible Online

2 SUNGSON 34 - Achang bible

2 SUNGSON 34

¹Yosia gas xet zvn lyis hwankti bweh los las Yerusalem mas somhci dvzvn guon khoq.

²Nyang gas YHENSAIN dah nyoqlvtjvng mas jus khyvlyis kuot. Nyah phauh thyeih Dawi dah cho chank loqwi loqyos ma i chank suh.

³Nyang guon yoq xet zvn gyo, nyang ngis shih yoq lyis Yosia gas YHENSAIN, nyah phauh thyeih Dawi dah Mangso lhyi xo xi loh. Nyang guon yoq dvci aiq vzvn lyis, nyang gas Yuda mau yahge Yerusalem mas joq dah ma jyoeng mangso jens lyis paiq joqyos dvnganh yahge Ashera zains, kyungh toh silho, shauq toh gungslho dvnganh lyis mhont zis yah cheihshang cho kuot xi.

⁴Nyang taiq shet vmingh lyis chank las nyah dius jens gas Bala gungslho jens dah phon jens yahge nyamoq dah xangh phon jens lyis bat khyop tyamp. Nyang gas Ashera zain, kyungh toh silho, shauq toh gungslho dvnganh lyis bat thyih lha hau zis lyis phudyei bang dah lop thoq mas sanh.

⁵Tsai, nyang gas ma jyoeng mangso jens lyis paiq dah phudyei bang dah shohyau lyis nyamoq dah phon thoq mas ngheq. Housoeh nyang gas Yuda yahge Yerusalem lyis cheihshang.

⁶Nyang gas Manase wus jens, Ephraim wus jens yahge Simon wus jens mas, Napthali wus jens jweh shoq yangh housoeh dvyhangteh kuot.

⁷Nyang gas ma jyoeng mangso jens dah phon yahge Ashera zains lyis thyoq las silho jens lyis vmons mhont tyamp. Nyang gas Israel mau gonh mas dah xangh phon dvnganh lyis bat khyop tyamp las Yerusalem pheh doms tauh los.

⁸Nyang guon yoq dvci xet vzvn lyis nyang munghdan mas, Yhenmuh mas cheihshang cho dye kuot thang lhyi, Yosia gas YHENSAIN nyah Mangso dah Yhenmuh soq das xiklyis dius somh yuk lyis toeuq toh. Nyamoq gas Azalia dah lo Shaphan, Yerusalem zau Maseia yahge Yoahaz lo, hwankti mvnyei seq soeu Yoa moq nghuot.

⁹Nyamoq gas phudyei zainsmuh Hilkia lyis Mangso dah Yhenmuh khomh zungh bang Lewi jens kui tsainh toh dah ngwis dyei. Hauh ngwis lyis Manase, Ephraim, yahge nyet nyeis dah Israel, Yuda mau gonh, Benyamin mau gonh yahge Yerusalem bang dvnganhmoq tsain chi los.

¹⁰Nyang gas hauh ngwis lyis YHENSAIN dah Yhenmuh soq tsuk muh lyis joeu das xiklyis toeuq toh bang loq mas kyauh. Nyamoq gas soq bang, vcauh lyis gis yungh shoq kuot bang lyis khaih.

¹¹Housoeh nyamoq gas soehfuh, luk tsan bang lyis lhung lha, yvm das xiklyis tsan toh luk, khomp das xiklyis yahge chap das xiklyis saiq wis. Nyamoq gas xik pheh dah Yuda hwankti jens dyoqbis nhang toh dah Yhenmuh lyis doms soq.

¹²Muh zwi bang gas Lewi dius Mera vhuh Yahat yahge Obadia, Lewi dius Kohat vhuh Zekharia yahge Meshulam moq dah uhshe yvmas lomluk luk zwi khank. Lewi jens, dvnganhmoq gas toenk khvlhank muot, chunghthwe kat cho mha lyes.

¹³Lewi dvyhamh gas muh vjaja mas dah zwi khank bang lyis joeu. Dvyhamh gas comh bang, zau, khomh zungh bang khyvlyis yvwons yoeus.

¹⁴Yhenmuh mas phudyei zainsmuh Helkia ka kui tsainh toh dah ngwis lyis lhaih comh nyeis lyis, Moshe lhyi yah dyei toh dah YHENSAIN dah Lyi Buk lyis nyvng.

¹⁵Helkia gas comh soeu Shaphan lhyi taiq zis gas, YHENSAIN dah Yhenmuh khau mha ngos haih Lyi Buk lyis nyvng, ge. Helkia gas Shaphan lhyi hauh sauhdain dyei.

¹⁶Shaphan ka hauh sauhdain lyis hwankti jyank yoeus loh las taiq zis gas, Nah zau jens gas nyamoq lyis toeuq dyei toh dah muh dvnganh kuot nyeis.

¹⁷YHENSAIN dah Yhenmuh mas kui tsainh toh dah ngwis lyis eq muh lyis joeu bang yahge muh zwi bang lyis dyei goeus, ge.

¹⁸Shaphan tsoq las taiq zis gas, Phudyei Helkia gas ngos lyis haih sauhdain dyei, ge. Housoeh Shaphan gas hauh zis lyis hwankti lhyi nghap kyoh.

¹⁹Hwankti ka Lyi mas lhaih toh cho lhyi xauhgyo lyis, nyang gas yomgyau las nyah dyimis lang chuiq.

²⁰Nyang gas Helkia, Shaphan dah lo Ahikam, Mikaia dah lo Akbor, hwankti yhen comh soeu Shaphan yahge hwankti nyah joeui dyei soeu Asaia moq lyis haih dah vmingh dyei:

²¹Mangso jyank loh las ngah xiklyis, nyet joq dah Israel yahge Yuda jens dvnganhmoq xiklyis YHENSAIN lhyi taiq geh. Yang xo nyvng dah sauhdain mas bos cho lhyi nyang lyis nyei geh. Yah phauh thyeih moq YHENSAIN dah dang lyis domsyos ma gyo gvng mas YHENSAIN dah nhaiq gis yo cho ka yang lyis tyi lha yah thoq mas khyoq kat goeus. Haih sauhdain mas bos, yang kuot chah cho lhyi yang ma kuot mus nyeis.

²²Housoeh las Helkia yahge hauh bang gas lvpe nyih Hulda lyis nyei gyo das xiklyis Yerusalem, Mishael vsaiq chink pheh loh. (Hulda dah yhensain phoq gas Hasra nyeilo, Tokhat lo, Yhenmuh dyixing joeu soeu, Shalum nghuot.)

²³Nyang nyamoq lyis taiq zis gas, YHENSAIN, Israel Mangso taiq! Namoq lyis nhang kat soeu jyank loh taiq aq.

²⁴Haih zis gas YHENSAIN taiq zis nghuot: Ngos haih wus yahge houmha nyeis bang lyis jyoengh nyang mhont tyamp das. Nvng nghap goeus, sauhdain mas lhaih toh dah nhoengh khonh dvnganh jyoengh bweh los das.

²⁵Yuda dius jens ngos lyis toh tyamp las ma jyoeng mangso jens lyis paiq gvng mas, nyamoq kuot cho dvnganh gvng mas ngos nyamoq lyis svsoh nhaiqyo. Ngah nhaiqyo cho ka haih joqyos lyis tyi lha jweh los das las hauh zis lyis cha yah eq ma yoh tomp toh das.

²⁶Nghuot laus eq namoq lyis nhang kat dah YHENSAIN lhyi xo soeu, Yuda hwankti lhyi loh taiq kyoh aq. Haih zis gas YHENSAIN, Israel dah Mangso ka nvng xauhgyo goeus dah loeus dang yah sen lha taiq zis nghuot.

²⁷Khasoeh ge lyis nvng gas haih wus yahge houmha nyeis bang lyis tyi lha ngos taiq toh cho lhyi xauhgyo uhlyis Mangso dah xikkhonh mas nhaiq ngis zis yahge nah nhaiqlom nyhen mha khyoq goeus. Nhaiqlom thaiq zis yah ngah xikkhonh mas nvng gas nvnyang gungs nyhen mha khyoq las yomgyau zis lyis dyimis lang chuiq las ngaus. Housoeh las, nghuot, nah shvmanh dung dang xauhgyo goeus, ge YHENSAIN taiq.

²⁸Nvng shei buisnyeis jweh las nvng nyenstap zis yah nyhop zis ma xauh shih dvchank, ngos haih wus yahge houmha nyeis bang lyis tyi lha dangthoengh toh, yaukyenh shanghsenh cho lhyi ngos ma jweh nhang das. Nvng gas ngos haih joqyos mas jweh nhang das dah yaukyenh shanghsenh cho lhyi nyvng das zis ma nghuot, ge. Housoeh nyamoq gas hauh lvpe nyih dah loeusdang lyis hwankti lhyi loh taiq kyoh.

²⁹Hauh thang lhyi hwankti ka Yuda mau yahge Yerusalem wus uhshe bang dvnganh lyis khi tsainh.

³⁰Tsai, hwankti ka Yuda mau yahge Yerusalem wus mas nyeis dius jens, phudyei bang yahge Lewi jens - kuh thank mas zis ngis thank dius jens dvnganh yah dvgeh YHENSAIN dah Yhenmuh pheh doq loh. Houmha nyamoq lyis hwankti ka YHENSAIN dah Yhenmuh mas xo nyvng dah Thanghchvp buk gonh lyis nghap kyoh.

³¹Hwankti ka nyah shoenkkhyi bos joqyos, zains nvm mas yap las YHENSAIN dah xikkhonh mas thanghchvp lyis doms kyink. Nyang gas nyah ehnyet nhaiqlom gungs dyos dvnganh yah Mangso tyingtoh cho dvnganh yahge lyi dvnganh lyis chank das ge thanghchvp chvp. Nyang gas sauhdain mas lhaih toh dah thanghchvp dangkhonh khanghmuh lyis chank das ge dangthoengh dyei.

³²Nyang gas Yerusalem mas nyeis bang yahge Benyamin dius jens dvnganhmoq lyis nyang soeh thanghchvp yoeus nhang. Yerusalem mas nyeis bang housoeh kuot zis yah, nyamoq dah phauh thyeih moq dah Mangso yah nyamoq thanghchvp lyis kyink.

³³Housoeh Yosia gas Israel dvmau gonh mas joq vchoqh vjyot silho dvnganh lyis yoeus tyamp las yuk khanghmuh lyis YHENSAIN, nyamoq dah Mangso lhyi paiq das xiklyis sang. Nyang kang dwis nyeis dvchank, nyamoq gas YHENSAIN nyamoq dah phauh thyeih moq Mangso jyank masyah ma tauh loh.