Read Achang 2 SUNGSON 35 Bible Online

2 SUNGSON 35 - Achang bible

2 SUNGSON 35

¹Hauh thang lhyi Yosia gas cangxeih vkhyvp dvci nyei nyeih lyis Yerusalem mas YHENSAIN dah Lhuiq Kat Pwe kuot. Lhuiq Kat Pwe yvnglo lyis hauh nyenhthang mau shomp shomp chuot los uhlyis sat.

²Yosia gas phudyei bang lyis eq nyamoq dah yvwons kyauh las YHENSAIN dah Yhenmuh mas nyamoq kuot loh cho lhyi yomdyei.

³Yosia gas YHENSAIN lhyi phuqsoe das xiklyis toeuq toh xauh bang yahge Israel mau mas jyauh bang nghuot dah Lewi jens lyis heisoeh ge vmingh dyei: Thanghchvp Kwi ka Solomon dah Yhenmuh mas doms joq goeus las namoq hauh zis lyis namoq dah kvtoq mas loh los ma wuq chah lo. Housoeh las namoq gas YHENSAIN, namoq dah Mangso yahge nyah dius nyau Israel jens lyis phuqsoe geh.

⁴Israel Hwankti Dawi taiq shet toh cho yahge nyah lo Solomon taiq shet toh lhaih toh zis lyis chank las namoq nyang yhenbang nyang Yhenmuh mas yvwons yoeus geh.

⁵Hauh thang lhyi namoq gas toeuq toh dyei gyingshang joqyos mas yap las namoq lyis kyauh toh dah yhenbang gas Yhenmuh mas jyungshuk chi los zis lhom yoeus langh geh.

⁶Lhuiq Kat Pwe yvnglo lyis sat geh, namoq nyang gungs cheihshang geh, los bang lyis pangh langh das xiklyis cicont kuot geh. YHENSAIN ka Moshe lhyi yah dyei toh dah taiq shet cho dvnganh lyis chank geh, ge.

⁷Hauh thang lhyi Yosia gas dius jens xiklyis Lhuiq Kat Pwe kuot das nyhenshang nyah dah yvng kyunk mas dah yvng lo somh mons yahge shvbeq lo dyei las noeulu eq somh khyoengh dyei.

⁸Hwankti dah zau jens eq dius jens, phudyei bang, Lewi jens lyis nyamoq yhung das xiklyis gvm dyei. Yhenmuh mas joeu dah zau jens - Helkia, Zekharia yahge Yehiel - gas phudyei bang lyis Lhuiq Kat Pwe jyungshuk khyvlyis yvnglo aiq khyoengh khyuk xo, shvbeq lo yahge noeulu somh xo dyei.

⁹Lewi uhjyung jens - Konania, yahge nyah vnoeuh moq Shemai, Nethanel, Hashabia, Yeiel, Yozabad - gas yvnglo oeng khyoengh, shvbeq yahge noeulu oengxo lhyi Lewi jens dah Lhuiq Kat Pwe jyungshuk xiklyis Lewi jens lyis dyei.

¹⁰Lhuiq Kat Pwe kuot das xiklyis dvnganh cicont nghuot goeus ya, phudyei bang, Lewi jens gas hwankti toeuq toh khyvlyis nyah vhuh yah nyang joqyos yoeus.

¹¹Lewi jens gas Lhuiq Kat Pwe yvnglo jens lyis sat las suih lyis phudyei bang lyis dyei. Lewi jens shoh ba nyeis uhlyis phudyei bang gas phon thoq mas hauh suih sanh.

¹²Moshe Lyi khyvlyis YHENSAIN lhyi yoh ngheq phudyei das xiklyis nyamoq gas nyamoq yhenbang phung jens khyvlyis ngheq jyungshuk lyis gvm. Nyamoq noeulu lyis eq houyah dvyhangteh gvm.

¹³Hauh thang lhyi taiq shet toh zis yah dvyhangteh nyamoq gas Lhuiq Kat Pwe yvnglo jens lyis kank; gyingshang phudyei jyungshuk lyis auh, cwih, auhbanh mas kat jyauq las nghe pheh lvnyap chi thuq los. Housoeh lyis dius jens hauh shoh xauh zo.

¹⁴Hauh zis dye kuot thang lhyi Lewi jens gas nyamoq nyang xiklyis yahge phudyei bang xiklyis wom dvton ba, khasoeh ge lyis phudyei bang gas nvpsangh noq masyah nyenhyo jweh shoq ngheq phudyei cho, coeu ngheq phudyei cho kuot nyeis. Lewi jens gas haih sont cho dvnganh lyis yvwons yoeus.

¹⁵Asap vnyau vshih jens toenk khvlhank muot, chunghthwe kat bang gas Dawi, Asap, Heman yahge hwankti dah nyvng soeu Yeduthun moq toeuq toh dyei, joqyos lyis yoeus. Khomh zungh bang gas khyam khomh lyis zungh nyeis. Nyamoq dah Lewi changh jens nyamoq xiklyis wom dih dyei gvng mas nyamoq gas nyamoq zungh nyeis joqyos lyis ma toh khoq noh.

¹⁶YHENSAIN dah Lhuiq Kat Pwe kuot cho dvnganh hauh nyeih lyis dye kuot. Hwankti Yosia tyingtoh zis yah dvyhangteh YHENSAIN dah phon thoq mas ngheq jyungshuk dvnganh phudyei.

¹⁷Yerusalem mas nyeis dah Israel dvnganhmoq gas YHENSAIN dah Lhuiq Kat Pwe yahge Bicheih ma kat Ohlhyoq zo pwe lhyi nyhet nyeih top kuot. Cangxeih vnyeih lyis Lhuiq Kat Pwe kuot las, nyet shih khyuk nyeih top Bicheih ma kat pwe kuot.

¹⁸Lvpe Samuel dah buisnyeis mas zis Lhuiq Kat Pwe lhyi heisoeh khanhamp eq ma kuot ku. Phudyei bang yahge Lewi jens dvnganh, Yerusalem mas nyeis bang dvnganh, yahge Yuda mau yahge Israel mau mas nyeis bang dvnganh bos dah Yosia kuot dah Lhuiq Kat Pwe teh zis lyis Israel hwankti khayuk eq ma kuot ku.

¹⁹Haih Lhuiq Kat Pwe lhyi Yosia guon zis dvci xet vzvn lyis kuot.

²⁰Yosia Yhenmuh xiklyis soq kuot chah cho dvnganh dye kuot thang lyis, Egutu Hwankti Neko gas nyah jesphung yah Egutu masyah Uphrat lvng pheh Kakhemi mas loh zan das xiklyis loh. Yosia yahge nyah jesphung ka Egutu Hwankti Neko lhyi zan das xiklyis jens loh.

²¹Nghuot laus eq Hwankti Neko ka Yosia jyank lvgyo jens lyis nhang lha haih loeus kyoh kat: Yuda hwankti eh! Nvng ngah jyank masyah cha o mes lah? Khvnyhik ngos nvng yah ma dyoq goh. Ngos gas ngos yah jeszan goh nyeis dah mau lyis kyingh zan mes. Mangso ka ngos lyis lvnyap zan aq ge goeus. Mangso ka ngos yah dvgeh nghuot las Mangso dah muh lyis vtomp, ma nghuot lyis nyang nvng lyis mhont tyamp das.

²²Nghuot laus eq Yosia gas Mangso jyoengh dang jis goeus Neko dah dang ma gyo, ma jik loh. Hauh gungsthaiq nyang gas nyah jesphung lhyi Megido jeszan khyomp pheh uhshe loh. Nyang gas nyang lyis jeswus jens ma comh bas jungh ge nyah hwankti gungs lyis thaiq tyamp.

²³Nghuot laus eq Yosia lyis jeswus jens dah lyei baiq bang dah nyo gvgis zangh las dvmdap goeus. Nyang nyah dius jens lyis, Ngos dvm svsoh dap goeus, haih jeszan khyomp masyah ngos lyis shwih thuqh loh aq, ge kaiq.

²⁴Housoeh las nyamoq gas nyang lyis nyah jeslhyingh masyah gap po yoeus las gohtoeu jeslhyingh dvkoeuq mas kat toh. Hauh thang lhyi nyamoq nyang lyis Yerusalem pheh thuq loh. Nyang Yerusalem mas shei lha hwankti lop mas nyhop. Yuda yahge Yerusalem mas nyeis bang dvnganh nyah xiklyis kuk.

²⁵Lvpe Yeremia gas Yosia xiklyis shei khyomp chunghthwe lhaih toh. Nyah shei cho, nhaiqkuk nhaiqngis chunghthwe jens lyis chunghthwe kat bang khvnyhik jweh shoq chungh. Haih nhaiqngis chunghthwe ka lyi thungh chunghthwe bweh los las Kuk Nyingh buk mas lhaih toh.

²⁶Yosia dah guon yoq lyis bweh cho yahge YHENSAIN dah lyi lhaih toh khyvlyis nyang chank kuot cho nyet shih goeu,

²⁷vpom zis vthyoh dvnganh Israel yahge Yuda Hwankti jens dah Buk mas lhaih toh.