Read Achang 2 SUNGSON 36 Bible Online

2 SUNGSON 36 - Achang bible

2 SUNGSON 36

¹Hauh thang lhyi Yuda dius jens gas Yosia dah loloeu Yoahaz lyis khyen yoeus las hwankti duot das xiklyis Yerusalem mas coeu juot dyei.

²Yoahaz nyenhkyi aiqci somh zvn bos lyis Yuda hwankti bweh los. Nghuot laus eq nyang lhamhmuh somh khyvp kyingh dvguon.

³Hauh thang lhyi nyang lyis Egutu Hwankti Neko ka hwankti masyah khyoq tyamp. Neko ka Yuda jens lyis khoengh ngwis 7,500 paung yahge xing 75 paung sang.

⁴Egutu hwankti Neko ka Yoahaz dah vmang Eliakim lyis Yuda yahge Yerusalem dah hwankti kuot las Yehoiakim ge nyings thaiq nyhink. Hauh thang lhyi Neko ka Yoahaz lyis Egutu pheh shwih loh.

⁵Yehoakim ka nyang hwankti bweh los uhlyis aiqci oeng zvn nghuot. Nyang Yerusalem mas dvci dvzvn guon khoq. Nyang gas YHENSAIN nyah Mangso dah nyoqlvtjvng mas ma gis zis kuot.

⁶Babilon hwankti Nebukhaneza gas Yuda mau mas nyhenh wvng los. Nyang Yehoiakim lyis nyhik las Babilon mau pheh Shamjvng yah she loh.

⁷Nebukhaneza gas YHENSAIN dah Yhenmuh mas joq dah zisyos dvkhamh lyis eq Babilon mau pheh yoeus loh las nyah hwankti yhen mha toh.

⁸Yehoiakim guon yoq lyis bweh cho, nyah ma gis cho, nyang lyis tyi cho nyet shih goeu dvnganh lyis Israel yahge Yuda Hwankti jens dah Buk mas lhaih toh. Hauh thang lhyi nyah joqyos mas nyah loloeu Yehoiakhin guon khoq.

⁹Yehoiakhin ka nyang hwankti bweh los uhlyis dvci xet zvn nghuot. Nyang Yerusalem mas lhamhmuh somh khyvp dvci nyeih guon khoq. Yehoiakhin gas YHENSAIN nyah Mangso dah nyoqlvtjvng mas ma gis zis kuot.

¹⁰Nungs zvn, zvn wvng zoh lyis Yehoiakhin lhyi hwankti Nebukhaneza yah Babilon pheh khi kat zis xauh. Hauh uhlyis Yhenmuh mas dah zisyos nyoshoq lyis eq Babilon mau pheh yoeus loh. Housoeh las Nebukhaneza gas Yehoiakhin dah phvlvt Zedekia lyis Yuda yahge Yerusalem mas guon das xiklyis hwankti toh.

¹¹Zedekia gas nyang guon xi uhlyis aiqci dvzvn nghuot. Nyang Yerusalem mas dvci dvzvn guon.

¹²Nyang gas YHENSAIN nyah Mangso dah nyoqlvtjvng mas ma gis zis kuot. YHENSAIN nhuot masyah taiq soeu Lvpe Yeremia xikkhonh mas nyah nhaiqlom ma khyoq.

¹³Zedekia gas lomluk das ge Mangso dah nyings yah yangh, kyamptang (dangthoengh dyei) toh dah Nebukhaneza lyis eq tyi lha gomloeus toq. Nyang gas YHENSAIN, Israel Mangso jyank tauh loh das xiklyis he dah yau las nhaiqlom than vbusbih dvyuk nghuot.

¹⁴Phudyei bang yahge dius jens dah uhshe bang dvnganh gas zes zes lomluk cho ma bos bweh los. Nyamoq gas vyvm vwi dius nyau jens dah ma jyoeng mangso lhyi paiq cho chank las Yerusalem mas joq YHENSAIN dah Yhenmuh gyingshang joqyos lyis ma phauh ma nyang kuot.

¹⁵Nyah dius yahge nyah Yhenmuh lyis nhaiqnyen, ma dyoqbis nhang mes gvng mas YHENSAIN, nyamoq dah phauh thyeih moq dah Mangso ka nyah loeuskyoh bang lyis nhang lha nyamoq lyis vlhain lhain, puk las puk las zaih nhang goeus.

¹⁶Nghuot laus eq dius jens gas Mangso dah loeuskyoh bang lyis jwangh, Mangso dah dang lyis neheqgoq kuot. Mangso nyah nhaiqlom dyis cho ma yoh zain toh lo shoq nyamoq gas lvpe jens lyis jwangh nyhap gvng mas phang tamh joqyos ma bos lo dah dyoqbis zainsmuh nyamoq jyank jweh los.

¹⁷Housoeh YHENSAIN ka Babilon hwankti lhyi shwih kat las nyamoq lyis tyi. Babilon[19] jens gas Yuda wotyamh jens lyis sat, Yhenmuh khau mha yangh chank khat. Nyamoq gas dius jens lyis nhaiqnyen cho ma bos, wotyamh yahge manglo, vbusbih yahge vmesbih, yanghzan bang yahge nos bang dvnganh lyis sat. Mangso ka nyamoq dvnganh lyis Nebukhaneza loq mas kyauh.

¹⁸Hwankti ka Mangso dah Yhenmuh mas joq kyahsoe ngis, kuh dvnganh, YHENSAIN dah Yhenmuh yahge hwankti yhen mha joq phauhdap zisyos dvnganh lyis eq Babilon nyah yhen pheh yoeus loh. Hwankti loloeu jens dvnganh lyis eq nyang yah dvgeh shwih loh.

¹⁹Nyang gas Mangso dah Yhenmuh lyis ngheq, Yerusalem wusciank lyis khyop, hwankti yhen dvnganh lyis ngheq las phauhdap zisyos[20] dvnganh lyis tyeihsop mhont tyamp.

²⁰Dvyhamh nyet nyeis shih bang lyis eq Babilon mau pheh shwih loh las nyamoq gas Persia munghdan yombos los shoq Babilon hwankti yahge nyah loloeu jens dah jyeidwis bweh loh.

²¹Housoeh las Yeremia lyis yah taiq dah YHENSAIN loeus dang nyuk los. Lvpe taiq toh zis yah dvyhangteh, thang thank lyis Yuda mau gas nyah Yuda No Buisnyeis lyis pyo nyeis, nyhetci zvn tsingtsam nghuot joq.

²²Persia Hwankti Kuru guon yoq cangxeih vzvn[21] lyis, YHENSAIN ka Kuru dah ehnyet lyis haih taiq hoeuh cho lhaih las nyah munghdan gonh tyo kat das xiklyis nhauh kat las Yeremia dah lvpe dang nyuk nhang.

²³Haih zis gas Persia Hwankti Kuru taiq zis nghuot: YHENSAIN Maukhung dah Mangso ka nyeisjvng thoq mas dah munghdan dvnganh ngos lyis dyei goeus. Nyang gas Yuda mau Yerusalem mas nyah xiklyis Yhenmuh tsuk das zis ngos lyis toeuq toh goeus. Haih muh xiklyis YHENSAIN dah dius dvnganh gas Israel mau pheh tauh loh geh. YHENSAIN, namoq dah Mangso ka namoq yah dvgeh nghuot bas jungh, ge.