Read Achang 2 SUNGSON 4 Bible Online

2 SUNGSON 4 - Achang bible

2 SUNGSON 4

¹Hwankti Solomon gas 15 pe nyhang lha 30 pe lvm, 30 pe xing dah thunk phon dvkoeuq kuot toh.

²Nyang gas 7 pe dvkhyamh noq, vzam dvkoeuq yah dvkoeuq 15 pe lvm las zuilhaink 45 pe bos dah thunk thomh lainh dvkoeuq kuot.

³Thomh dah vzam nghe pheh, saiq toh cho thoq pheh o pheh aiq jens bos. Hauh saiq toh cho ka thomh yah dvkoeuq teh vzoh yah dvpe mha khyuk doeu doeu shonh toh dah noeu lho jens nghuot.

⁴Hauh thomh gas nghe pheh nyoqnho xoeu toh las dvshot somh doeu doeu yap joq thunk noeulu dvci aiq doeu thoq mas kih toh.

⁵Hauh thomh gas loqwu dvtap thoeu. Nyah vzam gas khuq zam teh nghuot las anghchau ban buh khyvp teh nghe pheh xoeu lha kuih thuq joq. Hauh thomh gas jeis 16,500 galan ko wvng.

⁶Nyamoq gas Yhenmuh dah mautsung pheh oeng lang, mautyi pheh oeng lang toh das xiklyis jeislang dvci lang shonh. Houmha ngheq phudyei das gaunyhauq lyis cheih das xiklyis nghuot. Thomh mas dah jeis gas phudyei bang cheihshang das xiklyis yhung.

⁷Nyamoq gas taiq toh yikhyoh yah dvyhangteh xing nyituonh gus dvci koeuq, kihgus eq dvci koeuq kuot las vgungs yap mas dvshot dvshot mas nyituonh gus oeng koeuq, kihgus oeng koeuq toh. Nyamoq gas khuqpan dvxo koeuq eq kuot.

⁹Nyamoq gas phudyei bang xiklyis vkhau khyam yvm las nghe khyam eq yvm. Khyam aiq koeuq dah jo mas dah khomh jens lyis thunk yah kyop toh.

¹⁰Thomh lyis Yhenmuh dah buisthuq mautyi vthunk nvm mas toh.

¹¹Huram gas auh, tsohthauh yahge khuq eq shonh. Nyang gas Hwankti Solomon lyis Yhenmuh xiklyis nyang kuot das ge dangthoengh toh dah kyahsoe dvnganh dye kuot. Hauh zis gas, Zains aiq lom, Zains thyoh mas dah khuq teh dah zains tsungh aiq lom, Zains tsungh mas yoq dah thunk jvngchoh, Zains tsungh koeuq khanghmuh mas aiq jens jens saiq toh dah thunk tale nyei xo chvp, Lhyingh dvci koeuq, Jeislang dvci, Thomh, Thomh lyis thuk toh dah noeu lho dvci aiq, Auh, tsohthauh, shohthauh tsain nghuot. Loqmuh vdeq Huram gas Hwankti Solomon vmingh dyei toh zis yah dvyhangteh YHENSAIN dah Yhenmuh mas yhung das dah kyahsoe dvnganh lyis, bvng jyot dah thunk yah shonh toh.

¹⁷Hwankti ka dvnganh zis lyis Sukhot yahge Zereda vjo mas dah Yodan Langhkhau mas tsohnhih joq, shonh jang mas shonh.

¹⁸Housoeh hank eq ma thoq laiq suon dah thunk yah kyahsoe nyoshoq lyis kuot toh.

¹⁹Hwankti Solomon gas Yhenmuh mas yhung dah kyahsoe dvnganh xing yah kuot toh. Phon yahge Mangso lhyi kyangh dah sunghso lhyoq kih dah kihgus jens;

²⁰toeuq toh zis yah dvyhangteh, Gyingshang Thank Joqyos xikkhonh mas tuonh toh das dah xing gyingh nyituonh gus yahge nyitoengh;

²¹ban saiq cho, nyitoengh yahge nyvp;

²²nyitoengh sat, khuq, xangh xiklyis auhkhuq, nyigywe kat dvng das xiklyis bvn tsain nghuot. Hauh kyahsoe dvnganh lyis xing gyingh yah shonh toh. Yhenmuh nghe pheh khomh yahge Gyingshang Thank Joqyos dah khomh lyis xing yah kyop toh.