Read Achang 2 SUNGSON 6 Bible Online

2 SUNGSON 6 - Achang bible

2 SUNGSON 6

¹Hauh thang lhyi Hwankti Solomon vkyuh dung, YHENSAIN eh! Nvng gas jyommauh yahge chuot yvmas nyeis das xiklyis khyen toh goeus.

²Gvshih ngos gas nah xiklyis vcaiq vto nyeis das xiklyis, kuh thank dah yhenmuh dvlom tsuk dyei goeus.

³Israel dius dvnganh gas houmha yap joq. Hwankti ka nyamoq jyank pheh xoeu lha nyamoq xiklyis Mangso dah shvmanh dung dyei.

⁴Nyang taiq,YHENSAINIsrael dah Mangso lhyi chungh geh! Nyang gas ngah uwus Dawi lyis toh dah dangthoengh lyis jyoeng nhang. Hauh zis gas,

⁵Ngos ngah dius jens lyis Egutu mau masyah shwih los buisnyeis lyis yah khvnyhik jweh shoq, ngos lyis paiq das joqyos yhenmuh tsuk das xiklyis Israel wus khawus lyis eq ngos ma khyen, ngah dius Israel lyis guon das xiklyis eq ngos hank lyis eq ma khyen.

⁶Nghuot laus eq gvshih ngos lyis paiq das xiklyis ngos Yerusalem lyis khyen goeus, ngah dius Israel jens lyis guon das xiklyis nvng Dawi lyis khyen goeus, ge.

⁷Solomon tsoq taiq zis gas, Ngah uwus Hwankti Dawi gas YHENSAIN, Israel dah Mangso lhyi paiq das nyhenshang Yhenmuh tsuk das xiklyis sont.

⁸Nghuot laus eq YHENSAIN nyang lyis taiq zis gas, Nvng ngah xiklyis yhenmuh tsuk das ge zis gas gis,

⁹laus eq hauh zis lyis nvng ma yoh tsuk das. Nvng masyah yaus dah nah loloeu dvyuk ngah yhenmuh tsuk das.

¹⁰Gvshih YHENSAIN ka nyah dangthoengh lyis jyoeng nhang goeus: Ngos ngah uwus Hwankti Dawi gungsthaiq Israel hwankti xauh kuot las YHENSAIN, Israel dah Mangso lhyi paiq das Yhenmuh eq yoh tsuk goeus.

¹¹Ngos gas YHENSAIN ka Israel dius jens yah thoengh toh dah Thanghchvp luk lhywaq aiq lhywaq bos dah Thanghchvp Kwi lhyi eq Yhenmuh khau mha kat toh goeus.

¹²Lholhyi Solomon gas, Israel moqhuom nyeis yvmas loh las YHENSAIN dah phon xikkhonh mas maukhung pheh loq lvm las yap.

¹³(Solomon gas lvm choeu 7 pe dvkhyamh, xing choeu 7 pe dvkhyamh, nyhang choeu 4 pe dvkhyamh bos dah thunk gyamh dvkoeuq shonh las yhenmuh ganthoq vgungs mas toh. Nyang gas hauh gyamh thoq mas doq loh las moqphung dvnganhmoq yoh nyvng yvmas phvluk gyuis, loq lhywa lha,)

¹⁴vkyuh dung, YHENSAIN, Israel dah Mangso eh, maukhung mas eq, nyeisjvng mha eq nvng yah doeus dah Mangso ma bos. Nhaiqlom dvnganh yah nah xikkhonh mas chank kuot dah nah domsyos gyo bang dvnganh lyis nvng dangthoengh jyoeng nhang, nvng nhaiqnyen cho chixoeuq.

¹⁵Nvng nah jyeidwis ngah uwus Dawi lyis nah dangthoengh yah dvyhangteh kuot dyei. Nvng nah nhuot yah hauh dangthoengh lyis toh las khvnyhik nah loq yah hauh zis lyis doengs nhang.

¹⁶Housoeh las YHENSAIN, Israel dah Mangso eh, nvng gas, Nvng ngah xikkhonh mas chank kuot zis yah dvyhangteh, nah lo jens gas ngah xikkhonh mas chank kuot mes zis yah nyamoq loh cho lhyi zaih lyis ngah xikkhonh mas Israel munghdan dah hwankti tank mas tsung das hwankti vnyau ma dyet ge, nvng nah jyeidwis Dawi lyis toh dah dangthoengh eq gvshih doengs nhang aq.

¹⁷YHENSAIN Israel dah Mangso eh, nah jyeidwis, ngah uwus Dawi lyis taiq toh dang dvnganh gvshih jenh bweh los nhang aq.

¹⁸Nghuot laus eq Mangso ka vbusbih vmesbih jens yah dvgeh nyeisjvng thoq mas nyeis das lah? Yoeuh aq, maukhung yahge maukhung dvnganh dah nyhang thank maukhung ka nvng lyis ma yoh lungh joq nhang. Ngos tsuk dah Yhenmuh gas kha iq zes ngis lah?

¹⁹YHENSAIN, ngah Mangso eh, ngos vkyuh dung dang yahge sang dang lyis gyo yoeus aq. Khvnyhik nah jyeidwis nah xikkhonh mas kaiq las shvmanh dung dah dang lyis gyo aq.

²⁰Haih joqyos mas ngah nyings joq chah ge las taiq zis yah dvyhangteh, haih joqyos yahge haih Yhenmuh lyis nyeih nyenh yoeuh gomh aq. Nah jyeidwis ngos gas haih joqyos pheh xoeu lha shvmanh dung dah dang lyis gyo yoeus dyei aq.

²¹Ngos yahge nah dius Israel jens haih joqyos pheh xoeu lha nyhen mha gyoh las svsoh chah zis yah sang dah shvmanh dung dang lyis gyo dyei aq. Nvng nyeis dah maukhung mhayah ngamoq lyis gyo yoeus las yobos khyuot dyei aq.

²²Dius dvyuk gas dvyuk lyis cu lha haih Yhenmuh, YHENSAIN dah phon xik mas, yobos ma bos cho kyamptang chah lyis,

²³maukhung mhayah gyo dyei las nah jyeidwis jens lyis soetuon aq. Yaunos bos soeu lhyi nyah yobos yah dvyhangteh, joeng aq. Yaunos ma bos soeu lhyi dan khyvlyis vkyuh dyei aq.

²⁴Nah dius Israel jens gas nvng lyis cu lha jeswus yah ung zis xauh uhlyis nyamoq nah jyank lhain los las yobos khyuot dyei zis xauh das xiklyis nhaiqlom nyhen mha gyo zis yah haih Yhenmuh mas los las nvng lyis shvmanh dung lyis,

²⁵nvng maukhung mhayah gyo yoeus dyei las nah vnyau Israel lyis yobos khyuot dyei zis yah, nvng nyamoq dah phauh thyeih moq lyis dyei toh vso maunyeis mas nyamoq lyis doms los nhang aq.

²⁶Nvng lyis cu dah yobos gvng mas maukhung nyheih las mau ma wus nhang nyamoq lyis yobos dyei lyis, nyamoq gas haih Yhenmuh pheh xoeu lha nhaiqlom nyhen mha gyo zis yah shvmanh dung las nah nyings lyis rhen lha nyamoq yobos lyis tyamp lyis,

²⁷maukhung mhayah gyo yoeus dyei las nah dius Israel jens yahge hwankti lyis yobos khyuot dyei aq. Nyamoq jus cho chank das xiklyis jyauh las nvng nah dius nyau lyis nyamoq dah vso maunyeis khyvlyis dyei toh dah nah mau mas mauwus nhang aq.

²⁸Mau khau mha phanghkhauq gyoh, yomh gyoh, guk bop, bau bau, janghgyik zo, tungde zo lyis eq; nyamoq jeswus gas nyamoq dah mau, nyamoq wus lyis los lhaink toh lyis eq chah yaukyenh shanghsenh cho bos laus eq,

²⁹nah dius Israel jens nyamoq dah yaukyenh cho nghuot ya kuk cho yah sen lha haih Yhenmuh pheh xoeu lha loq toeu shvmanh dung lyis,

³⁰Nvng gas nvng nyeis dah maukhung thoq masyah gyo yoeus dyei aq. Nvng gas dius nhaiqlom seq dyei zis yah dvyhangteh, yobos khyuot dyei las dvyuk yah dvyuk lyis nyamoq dah muhzoh khyvlyis tauh dyei aq. Nvng kyingh cangsoeu dius dvnganh dah nhaiqlom lyis seq.

³¹Housoeh nyamoq gas nvng ngamoq dah phauh thyeih moq lyis dyei toh mau mas nyeis gyo lyis nvng lyis gyukwoms las nvng o khyvlyis kang dwis das.

³²Hou lholha gohnyau bang nah cho xauhgyo las, nyamoq gas we mau masyah nah nyings lyis los paiq das: khasoeh ge lyis nyamoq gas nah dah yomzains mauh loqmuh yahge phunk lyis xauhgyo las nyamoq haih Yhenmuh mas los las shvmanh dung lyis,

³³Nvng nyeis joqyos maukhung mhayah gyo yoeus las nyamoq dung zis lyis dyei aq. Housoeh nah dius Israel jens teh, nyeisjvng thoq mas dius dvnganh gas nvng lyis seq las gyukwoms los das. Nyamoq eq hai ngos tsuk Yhenmuh gas nah nyings wons yvlyis seq los das.

³⁴Nvng nhang lha nah dius jens gas jeswus nyeis yvpheh jes toq uhlyis nvng khyen toh dah wus pheh xoeu, nah nyings xiklyis ngos tsuk toh dah Yhenmuh pheh xoeu lha YHENSAIN lhyi shvmanh dung lyis,

³⁵Nvng maukhung mhayah nyamoq dah sang cho, dung cho xauhgyo las nyamoq lyis ung cho yoh nhang aq.

³⁶Yaunos ma kuot soeu hank ma bos las nah dius jens gas nvng lyis tyi dah yaunos kuot gvng mas nvng nhaiqyo zis yah jeswus loq mas kyauh las jeswus gas mauwe mauni gohtoeu jeswus mau pheh shwih loh.

³⁷Nyamoq jweh las houmha thung lungh nyeis uhlyis, ehnyet thaiq las, Ngamoq cu goeus, ma dan cho kuot goeus ge rhen lha,

³⁸ehnyet gungs dyos dvnganh yah nah jyank mas tauh los las nvng nyamoq phauh thyeih moq lyis dyei dah mau, nvng khyen toh dah wus, ngos nah nyings xiklyis tsuk toh dah Yhenmuh pheh shvmanh dung lyis,

³⁹Nvng nyeis dah maukhung mha nyamoq sang cho, dung dang xauhgyo las pangh dyei aq. Nah dius jens nvng lyis tyi lha gomloeus toq cho, nvng lyis cu dah yobos dvnganh khyuot dyei aq.

⁴⁰Ngah Mangso eh! Gvshih, ngamoq lyis yoeuh aq, haih joqyos mas ngamoq dung dah dang lyis gyo dyei aq.

⁴¹YHENSAIN Mangso eh! Gvshih toq las nah yomsoq nghuot dah Thanghchvp Kwi yah dvgeh Yhenmuh khau mha wvng loh las houmha vcaiq vto nyeis aq. Nah phudyei bang kuot cho dvnganh mas shvmanh aq. Housoeh lyis nvng nyamoq lyis gis cho dyei gvng mas dius jens dvnganh gauslaus das.

⁴²YHENSAIN Mangso eh! Nvng khyen toh goeus dah hwankti lhyi vjenh peq tyamp. Nvng nah jyeidwis Dawi lyis jyet dah jyetdap cho lhyi soh aq.