Read Achang 2 SUNGSON 8 Bible Online

2 SUNGSON 8 - Achang bible

2 SUNGSON 8

¹Solomon gas Yhenmuh yahge nyah hwankti yhen lhyi aiqci zvn tsuk.

²Nyang gas hwankti Hiram nyang lyis dyei dah wus jens lyis eq soq kuot las houmha Israel jens lyis toh.

³Nyang gas Hamat Zoba wus lyis loh zan yoeus las,

⁴mhanhdyvp mas Tadmor wus lyis doms tsuk. Hamat mau mas zisyos toh dah wus jens eq tsain kuot toh.

⁵Solomon gas wusciank, wus khomh, khomh kyank goeng dah Thoq Bet Horon yahge O Bet Horon wus jens kuot toh.

⁶Balat wus yahge nyang zisyos toh dah wus dvnganh, nyah jeslhyingh toh wus jens, nyang ji bang xiklyis wus jens tsuk toh. Nyang gas Yerusalem mas, Lebanon mas, nyah dvmau gonh nyang kuot toh mes nyhoq tsain kuot toh.

⁷Israel ma nghuot, Hiti, Amori, Perizi, Hiwi yahge Yebusi mas nyet joq bang,

⁸Israel jens Khanan mau mas wvng los uhlyis dvnganh ma mhont las nyet shih bang masyah yaus lyih bang lyis Solomon muh tsoengh kuot nhang. Nyamoq dah vnyau vshih gas khvnyhik jweh shoq jons nghuot.

⁹Israel jens gas muh tsoengh kuot nhang zis ma xauh, nghuot laus eq jeszan bang, jeszau jens, jeslhyingh komp bang yahge nyang ji bang khyvlyis muh wons wuq.

¹⁰Nyoshoq dah yhen tsuk muh khanh toh yvmas muh tsoengh kuot nhang cho xauh dah dius jens thoq mas guon bang 250 yuk nghuot.

¹¹Gvshih Solomon gas Pharao lonyi lyis Dawi dah wus masyah nyah xiklyis kuot toh hwankti yhen mha thuot los. Khasoeh ge lyis, nyang taiq zis gas, YHENSAIN dah Thanghchvp Kwi jweh los dah joqyos gas gyingshang yvmvyah ngah yhensain nyhiq gas Israel hwankti Dawi dah hwankti yhen mha ma gis nyeis oen nghamh, ge.

¹²Hauh thang lhyi Solomon gas Yhenmuh ganthoq mas nyang ci toh, phon mha YHENSAIN lhyi ngheq jyungshuk phudyei.

¹³Nyang gas Moshe dah lyi yah dvyhangteh toeuq toh gyingshang nyeih khanghmuh - No nyeih xiklyis, lohcanh, zvn yau zvn toeuq toh pwe somh lhain ge, bicheih ma kat ohlhyoq zo pwe, Jyo yhomh pwe, Phunk pwe - mha ngheq phudyei.

¹⁴Nyah uwus Dawi toh dah thungh yah dvyhangteh, phudyei bang yahge Lewi jens dah nyeih yau muh lyis nyah toeuh yah nyang toeuq gvm toh. Lewi jens dah muh gas dius jens lyis chunghthwe shwih kat cho yahge phudyei bang dah nyeih yau muh mas pangh cho nghuot. Mangso dah dius Dawi taiq toh vgus nyang gas khomh koeuq khanghmuh mas nyeih yau zungh das xiklyis nyang phung nyang yhenmuh zungh bang lyis toeuq toh.

¹⁵Phudyei bang yahge Lewi jens lyis Dawi taiq toh vgus chah muh laus eq, jyi yah sen cho mha laus eq nyamoq ma i lo kuot.

¹⁶Yhenmuh dah yhenpom ma xi shih masyah dye shoq Solomon kuot chah zis dvnganh dye kuot goeus las Yhenmuh kop kop nghuot goeus.

¹⁷Hauh thang lhyi Solomon gas Edom mau, Thomh Nes yvm chank sangpho no wus Ezion Geber yahge Elot pheh loh.

¹⁸Hiram gas thomh cho seq las jeis sangpho seq khomp dah nyah zau jens dah loq lyis yah Solomon jyank mas sangpho jens dyei kat. Hauh sangpho jens gas Ophira pheh Solomon dah dius jens yah dvgeh loh las houmha dah xing dvci nyhet tan ko, hwankti Solomon jyank mas chi los.