Read Achang EZRA 3 Bible Online

EZRA 3 - Achang bible

EZRA 3

¹Lhamhmuh nyhet vkhyvp jweh lyis Israel jens gas wus jens mas nyeis joqyos dye yoeus goeus las Yerusalem mas dvyih dvyot los huom.

²Hauh uhlyis Yozadak lo Yoshua yahge nyah boekyis phudyei bang eq, Shealtiel lo Zerubabe yahge nyah boekyis jens eq toq las Mangso dah dius Moshe dah Lyi mas lhaih toh zis yah dvyhangteh, ngheq phudyei das zis Israel Mangso dah phon ci.

³Vyvm vwi mas dah dius jens lyis gyuk laus eq, nyamoq gas phon lhyi nyah joqyos mas doms ci lha YHENSAIN xiklyis nyenhthang nvpyo dah ngheq phudyei lyis tsain ngheq phudyei.

⁴Lholha lhaih toh zis yah dvyhangteh, nyamoq gas phunk pwe eq kuot las, hauh pwe yoq lyis dah nyeih yau nyeih ngheq phudyei cho lhyi, chah nyhoq sonzoh tyink zis yah phudyei.

⁵Hauh thang lhyi nyamoq gas vjangh ngheq dyei jyungshuk, lohcanh nyeih lyis phudyei jyungshuk, YHENSAIN xiklyis gyingshang nhang, toeuq toh pwe nyeih lyis eq phudyei. Nyamoq gas xihhonh ehnyet yah phudyei dah jyungshuk lyis eq Yhensain lhyi tsain ngheq phudyei.

⁶YHENSAIN dah Yhenmuh yhenpom ma ci shih laus eq nyamoq gas lhamhmuh nyhet vkhyvp cangxeih vnyeih masyah YHENSAIN lhyi ngheq dyei jyungshuk ngheq phudyei xi.

⁷Hauh thang lhyi nyamoq gas luk tsan bang yahge soehfuh jens lyis ngwis dyei, Persia hwankti Kuru dah vmingh yah dvyhangteh, Yopa goeukhanh jweh shoq Lebanon boms mas dah arit saiq yoeus nyhoeuh das dah Sidon yahge Taire jens lyis zonoms shukphoh yahge coeu dyei.

⁸Yerusalem, Mangso dah yhen mha jweh zis aiq vzvn, aiq vkhyvp lyis Shealtiel lo Zerubabe, Yozadak lo Yoshua yahge nyamoq dah boekyis, phudyei bang yahge Lewi jens, jonsdoeus loh masyah Yerusalem mas tauh jweh los bang dvnganh gas, muh xi lha YHENSAIN dah Yhenmuh lyis yoeuh gomh das xiklyis, Lewi jens aiqci zvn bos bang yahge thoq pheh bang lyis toeuq toh.

⁹Yeshua, nyah lo jens, vmang vnoeuh moq, Kadmiel, nyah lo jens, Hodawia vnyau vshih moq dvnganh gas Yhenmuh tsuk bang lyis yoeuh guon. Lewi vnyau Henadad yhenbang gas nyamoq lyis hauh muh mas pangh.

¹⁰Yhen tsuk bang YHENSAIN dah Yhenmuh vpom xi lhyi, Israel hwankti Dawi taiq toh zis yah dvyhangteh, YHENSAIN lhyi chungh das xiklyis phudyei dyimis wuot las lvbuh chi dah phudyei bang yahge janghau chi dah Lewi vnyau Asap vhuh jens gas nyang yuk nyangtoeu joqyos yoeus.

¹¹Nyamoq gas, Nyang gas gis, nyah nhaiqnyen cho Israel mas vcaiq vto joq, ge dvphung dvphuk YHENSAIN lhyi chungh zis yah nhaiqshoqlang sang. YHENSAIN dah yhenpom yoh xi toh yvmvyah, dius jens dvnganh gas YHENSAIN lhyi yomkat las kaiq chungh.

¹²Nghuot laus eq nyenhkyi bos las xikpheh dah Yhenmuh lhyi nyvng ku dah phudyei bang, Lewi jens yahge vhuh jens dah uhshe bang gas, haih yhenpom xi yvlyis yoeuh las nyamoq svsoh tsain ngaus. Gohtoeu nyoshoq gas gausyis zis yah kaiq.

¹³Housoeh dius jens gas gaus las kaiq lah, nhaiqngis las ngaus dah thwe lah zis lyis ma seqgyo lo: khasoeh ge lyis dius jens gas svsoh kaiq hoeu lha, hau thwe ka we mas, dvkhau yah xauhgyo.