Read Achang EZRA 6 Bible Online

EZRA 6 - Achang bible

EZRA 6

¹Housoeh hwankti Dari dang yah, nyamoq Babilon wus ziskwi mha kat toh dah comh maussauh tsain xo yoeuh.

²Mede mau Ebatana wusmuh mas lom toh dah maussauh dvdain tsain nyvng. Hauh yvmas comh toh zis gas,

³Hwankti Kuru guon xi dah zvn lyis hwankti Kuru gas, Yerusalem Yhenmuh yah sen lha dang kyoh kat. Nyamoq phudyei dah joqyos mas Yhenmuh doms kuot bas jungh. Hauh yhenpom lyis goeng goeng kuot las, nyhang choeu gauci pe, lvm choeu gauci pe bos chah.

⁴Tsan toh luk somh jens yvm toh thoq mas thyeh dvjens puk yvm aq. Housoeh yhung dah zis gas hwankti zisyos masyah yoeus aq.

⁵Yerusalem Yhenmuh masyah Nebukhaneza yoeus las Babilon mas chi loh, Mangso Yhenmuh yah sen dah ngwis xing kyahsoe jens lyis doms dyei las, hau nyang koeuq nyang lyis Yerusalem mas dah Yhenmuh, Mangso dah yhen mha nyah joqyos mas doms toh bas jungh, ge.

⁶Housoeh las Hwankti Dari haih loeus kyoh kat: Uphrat lvng buiswvng tvp mas dah mungh zau Tatenai, Shetha Bozenai yahge nah dyenschangh jens, Uphrat lvng buiswvng tvp mas nyeis dah zau jens gas hou Yhenmuh masyah we we nyeis geh.

⁷Haih Mangso Yhenmuh tsuk muh lyis vbos lhoeu nhunk. Yuda jens dah mungh zau yahge Yuda logis jens Mangso dah Yhenmuh lyis nyah yhen-yos mas kuot bas jungh.

⁸Hauh thoq lyis hai Mangso Yhenmuh tsuk bang Yuda logis jens lyis namoq khasoeh yoh pangh das cho, ngos taiq toh shih bah. Nyamoq pahkai zis ma xauh bas jungh, Uphrat lvng buiswvng tvp pheh khywi dah khoengh ge, hwankti dah zisyos nyamoq lyis lvnyap dyei geh.

⁹Maukhung Mangso lhyi ngheq phudyei dah noeukyoh jens, yvnglus jens, yvnglo jens, sunghso, coh, zvbiq yahge tsanlun coeu Yerusalem mas dah phudyei bang sang zis yah dvyhangteh nyeih yau nyeih ma i lo dyei bas jungh.

¹⁰Haih cho kuot chah, housoeh lyis nyamoq gas maukhung Mangso lhyi nhaiqdoeus nhang dah ngheq phudyei cho yoh kuot las, hwankti yahge nyah lo jens nyeis gis yap lhoq das xiklyis shvmanh yoh dung das.

¹¹Haih taiq toh dang ma chank soeu ka nyah yhen mha dah zains nuot cuk las houmha lhangh toh zis xauh bas jungh. Hauh gvng mas nyah yhen eq mhotkhyot zungs bweh bas jungh oen lha eq ngos vmingh dyei.

¹²Yerusalem mas joq Mangso Yhenmuh nghuot ya haih vmingh lyis lhoeu thyoq das ge nyah loq toeu dah hwankti nghuot ya, dius nyau hank lyis laus eq hauh joqyos mas nyah nyings toh dah Mangso ka nyamoq lyis mhont bas jungh. Ngos Dari nyang hauh cho taiq toh. Hauh zis lvnyap kuot bas jungh, ge lhaih kat.

¹³Hauh thang lhyi Uphrat buiswvng tvp mungh zau Tatenai, Shetha Bozenai yahge nyamoq dah zauchangh jens gas, hwankti Dari tying kat vgus lvnyap kuot.

¹⁴Yuda logis jens gas lvpe Hagai yahge Ido vnyau vshih Zekharia yomdyei zis yah dvyhangteh hau Yhenmuh tsuk las ung los. Nyamoq gas Israel Mangso tyingtoh dang yahge Persia hwankti Kuru, Dari yahge Artaxerxes taiq toh vgus Yhenmuh lyis tsuk las dye.

¹⁵Hauh Yhenmuh gas hwankti Dari guon zis khyuk vzvn, Adar khyvp somh vnyeih lyis dye.

¹⁶Hauh thang lhyi Israel dius- phudyei bang yahge Lewi jens, jonsdoeus loh masyah tauh los bang dvnganh gas gaus zis yah Mangso dah Yhenmuh wvng.

¹⁷Nyamoq gas hai Mangso dah Yhenmuh wvng lyis, noeujungs lu dvxo, yvnglus aiqxo, yvnglo nyeixo; Israel dvci aiq nyau khyvlyis Israel dvnyau gonh dah yobos khyuot phudyei xiklyis beqlus dvci aiq doeu phudyei.

¹⁸Moshe dah buk mas lhaih toh zis yah dvyhangteh, Yerusalem mas Mangso lhyi phuqsoe das xiklyis nyamoq gas phudyei bang lyis nyang phung nyang, Lewi eq nyang phung nyang toh.

¹⁹Jonsdoeus loh masyah tauh los bang gas nungs zvn cangxeih vkhyvp dvci nyei vnyeih lyis Lhuiq Kat Pwe kuot.

²⁰Phudyei bang yahge Lewi jens dvnganh gas nyamoq gungs lyis dvgeh tsain cheihshang lha lhoqshang goeus. Lewi jens gas nyamoq nyhenshang eq, phudyei changh jens yahge jonsdoeus loh masyah tauh los bang nyhenshang Lhuiq Kat Pwe yvnglo tsain sat.

²¹Jonsdoeus loh masyah tauh los dah Israel jens gas YHENSAIN, Israel Mangso lhyi paiq das ge chank xo bang yahge, nyamoq gungs lyis hau mau mas nyeis, ma jyoeng mangso lyis paiq bang dah vwot v-oeu cho mhayah jhank bang dvnganh yah hauh zis lyis dvgeh zo.

²²Nyamoq gas gausyis zis yah nyhet nyeih top bicheih ma kat ohlhyoq zo pwe kuot. Nyamoq gas svsoh gauslaus, khasoeh ge lyis YHENSAIN ka Asiria hwankti dah ehnyet lyis nyamoq jyank pheh lhain los nhang. Housoeh las nyang gas Israel Mangso dah Yhenmuh doms tsuk yvmas nyamoq lyis pangh thuk.