Read Achang EZRA 7 Bible Online

EZRA 7 - Achang bible

EZRA 7

¹Zvn lom nyoshoq nyangh thang lhyi, Persia hwankti Artaxerxes guon zaih lyis, Ezra ge soeu dvyuk nyeis. Haih zis gas nyah dah dius caiq lyis phudyei zainsmuh Aron jweh shoq shap loh cho nghuot. Ezra gas Serai lo, Serai gas Azaria lo, Azaria gas Hikia lo,

²Hikia gas Shalum lo, Shalum gas Zadok lo, Zadok gas Ahitub lo,

³Ahitub gas Amaria lo, Amaria gas Araria lo, Araria gas Meraiot lo,

⁴Meraiot gas Zarahia lo, Zarahia gas Uzi lo, Uzi gas Buki lo,

⁵Buki gas Abishua lo, Abishua gas Phineha lo, Phineha gas Eleaza lo, Eleaza gas phudyei uhjyung Aron dah lo nghuot.

⁶Hai Ezra gas Babilon masyah thuq los. Nyang gas YHENSAIN, Israel Mangso dyei toh, Moshe dah lyi mas lyes dah jyauh soeu nghuot. YHENSAIN, nyah Mangso dah shvmanh gas nyang yah nghuot las hwankti ka nyang cha sang cha dyei.

⁷Artaxerxes hwankti guon zis nyhet vzvn lyis phudyei bang, Lewi jens, chunghthwe kat bang, khyam khomh zungh bang yahge yhenmuh jyeidwis jens bos dah Israel dius jens dvyhamh eq Yerusalem mas nyang yah dvgeh jweh los.

⁸Artaxerxes Hwankti tsung zis nyhet vzvn, oeng vkhyvp lyis Ezra gas Yerusalem mas jweh los.

⁹Cangxeih vkhyvp, das vnyeih lyis Babilon masyah toq las, oeng vkhyvp, das vnyeih lyis nyah Mangso dah jyehjuh gvng mas Yerusalem mas jweh los.

¹⁰Ezra gas YHENSAIN dah lyi lyis xo lha chank das, Israel mas tyingtoh dang yahge lyi jyauh das ge nyah ehnyet mas sont toh.

¹¹Heika Hwankti Artaxerxes, Israel dius jens lyis YHENSAIN taiq toh dang yahge lyi lyis xuq las jyauh dah jyauh soeu, phudyei soeu Ezra lyis huon maussauh nghuot.

¹²Hwankti jens[7] dah hwankti Artaxerxes gas Maukhung Mangso dah Lyi jyauh soeu, phudyei soeu Ezra, nyenstap nyeis bas jungh oen lha lhaih kat. pi

¹³Ngos zaudang khyoq shih zis gas, Ngah mau mas nyeis, Israel jens, phudyei bang, Lewi jens mas xihhonh ehnyet yah Yerusalem pheh doq loh mes bang nvng yah yoh loh.

¹⁴Nvng lyis kyauh toh, nah Mangso dah lyi lyis, Yuda mau yahge Yerusalem mas bang khanyhoq khasoeh chank nyeis cho seq das nyhenshang hau nyei gyo yoeuh das xiklyis, hwankti yahge nyah xamchangh nyhet yuk moq gas nvng lyis nhang.

¹⁵Yerusalem mas nyeis, Israel Mangso dah nyhenshang, hwankti yahge nyah xamchangh nyhet yuk xihhonh ehnyet yah dyei dah ngwis xing yoeus loh aq.

¹⁶Babilon mau masyah nvng xauh yoeus dah ngwis xing dvnganh yah dvgeh Israel jens yahge phudyei bang gas Yerusalem mas nyeis, nyamoq dah Mangso yhen xiklyis xihhonh zis yah dyei jyungshuk lyis nvng yoh wons loh.

¹⁷Housoeh las haih ngwis yah noeulu, yvnglus, yvnglo jens yahge jyo jyungshuk yahge shukphoh jyungshuk wis las Yerusalem mas joq nah Mangso dah Yhenmuh mas dah phon mha yoh phudyei shoq zaih aq.

¹⁸Nyet dah ngwis xing lhyi ka, nvng yahge nah boekyis jens kuot mes khyvlyis, Mangso o zis yah dvyhangteh kuot geh.

¹⁹Nah Mangso dah yhen mha dah phuqsoe muh xiklyis nvng lyis kyauh toh kyahsoe lhyi eq, Yerusalem, Mangso xikkhonh mas kyauh toh aq.

²⁰Nah Mangso Yhenmuh nyhenshang yhung chah shih dah kyahsoe lhyi eq hwankti ziskwi mhayah yoeus las wis aq.

²¹Ngos hwankti Artaxerxes nyang, Uphrat lvng buiswvng tvp mas ziszom bang lyis heisoeh taiq toh: Maukhung Mangso dah Lyi joeu soeu, phudyei Ezra sang zis yah dvyhangteh lvnyap dyei geh.

²²Ngwis 7,500 paung, sunghso 3.4 metrik tan, zvbiq 550 galan, tsanlun coeu 550 galan yahge coh chah nyhoq dvnganh nghuot.

²³Maukhung Mangso taiq toh zis yah dvyhangteh, hau Mangso Yhenmuh xiklyis jyuk yang kuot bas jungh. Hwankti yahge nyah lo jens dah munghdan thoq mas nhaiqyo cho chamus jweh nhang das lah?

²⁴Phudyei bang Lewi jens, chunghthwe kat bang, khyam khomh zungh bang, yhenmuh jyeidwis jens yahge Mangso dah yhenmuh kuot bang lyis khoenghdaus, jyungshuk, vkhoq kui das zis lyi ma bos oen eq taiq.

²⁵Nvng Ezra eq nah Mangso dah joeui nvng lyis dyei toh zis yah dvyhangteh, nah Mangso Lyi seq dah, Uphrat lvng buiswvng tvp mas nyeis bang lyis guon das xiklyis zau jens, soetuon bang lyis toeuq toh aq. Nvng gas hauh Lyi ma seq shih bang yuk khanghmuh lyis hauh Lyi jyauh chah.

²⁶Nah Mangso dah lyi nghuot ya hwankti dang lyis ngoek soeu ka, sat zis, khat thuq zis, zisyos thyoq loh zis, thung lhunk ge dah soetuon zis dvja ja lvnyap xauh bas jungh, ge.

²⁷Yerusalem mas joq YHENSAIN Yhenmuh lyis yungh nhang das xiklyis hwankti ehnyet mas kat dyei, ngamoq phauh thyeih moq dah YHENSAIN Mangso ka ngelhoq bas jungh.

²⁸Hwankti yahge nyah xamchangh jens xikkhonh mas, hwankti dah yomsoq bos zau jens xikkhonh mas ngos lyis nyah nhaiqnyen cho, mathank magons jyetdap cho dyei. Housoeh YHENSAIN, ngah Mangso dah loq gas ngos yah dvgeh nghuot. Ngos yombos zis yah ngos yah dvgeh loh das dah Israel uhjyung jens lyis khi tsainh.