Read Achang EZRA 8 Bible Online

EZRA 8 - Achang bible

EZRA 8

¹Heika hwankti Artaxerxes guon uhlyis Babilon mas jonsdoeus nyeis masyah Yerusalem pheh ngos yah dvgeh doq los, vhuh uhshe bang dah nyings nghuot.

²Phineha vhuh mas Gershom; Ithama vhuh mas Daniel; Dawi vhuh mas Shekhania dah lo Hatu; Parosh vhuh mas Zekharia yahge nyah vhuh mas bang yukgis jens dvxo oengci. (Nyamoq dah dius caiq shap toh zis eq bos.) Pahat Moab vhuh mas Zerahia lo Elihonai yah dvgeh yukgis aiqxo. Zatu vhuh mas Yahaziel lo Shekhania yah yukgis somhxo. Adin vhuh mas Yonathan lo Ebed yah yukgis oengci. Elam vhuh mas Athalia Yeshaia yah yukgis nyhetci. Shephatia vhuh mas Mikhael lo Zebadia yah yukgis xetci. Yoab vhuh mas Yehiel lo Obadia yah yukgis aiqxo dvci xet. Bani vhuh mas Yosiphia lo Shelomit yah yukgis dvxo khyukci. Bebai vhuh mas Bebai lo Zekharia yah yukgis aiqci xet yuk. Azgad vhuh mas Hakatan lo Yohanan yah yukgis dvxo dvci. Thang thank tauh los bang gas Adonikam vhuh nghuot. Nyamoq nyings gas Eliphelet, Yeuel, Shemaia - nyamoq yah yukgis khyukci. Bigwai vhuh mas Uthai, yahge Zakhu vzomh yah yukgis nyhetci.

¹⁵Ngos nyamoq lyis Ahawa wus pheh yaus loh jeislvng yvm mas tsainh toh las houmha somh nyeih thoeng. Ngos hauh dius phung mha phudyei bang lyis nyvng, nghuot laus eq Lewi jens dvyuk eq ma bos.

¹⁶Housoeh uhshe bang Elieza, Ariel, Shemaia, Elnathan, Yarib, Elnathan, Nathan, Zekharia yahge Meshulam yah jyauh tang Yoiarib yahge Elnathan moq lyis khi.

¹⁷Ngos nyamoq lyis, Khasiphi mas dah uhjyung Ido yahge nyah vmang vnoeuh, yhenmuh jyeidwis jens gas, Yhenmuh mas Mangso lhyi phuqsoe das dius ngamoq jyank mas nhang kat das zis sang das xiklyis Khasiphi mas dah uhjyung Ido jyank nhang kat.

¹⁸YHENSAIN dah jyehjuh ngamoq yah dvgeh nghuot yvmvyah, nyamoq gas Israel, Lewi dius Mali vhuh mas Sherebia ge joeui bos soeu dvyuk, nyah loloeu jens yahge vmang vnoeuh moq yukgis dvci xet yuk lyis nyamoq gas ngamoq jyank nhang kat.

¹⁹Nyamoq gas Marari vhuh mas Hashabia yahge Yeshaia yah nyah vmang vnoeuh moq yukgis aiqci yuk lyis eq nhang kat.

²⁰Hauh thoq lyis Lewi jens lyis pangh das xiklyis Hwankti Dawi yahge nyah zau jens toeuq toh, yhenmuh jyeidwis jens dah nyeinyet aiqxo aiqci yuk khi los. Hau dvnganh gas nyings bos goeus bang nghuot.

²¹Ngamoq gas ngamoq dah Mangso xikkhonh mas ehnyet nyhen mha gyo las ngamoq, ngamoq loshang jens, ngamoq yoh dah zisyos dvnganh gyung cho mha jesluiq shohluiq Mangso gomh das xiklyis Ahawa tvp yvm mas shvmanh yoh dung das xiklyis womkyi das zis taiq kat.

²²Ngamoq dah Mangso loq gas nyang lyis chank xo bang lyis pangh das, nghuot laus eq nyang lyis tyamp bang dah thoq mas nyah nhaiq gis, yo zis gas joq oen, ngos hwankti lhyi taiq goeus, yvmvyah cho mha ngamoq lyis jes kuot bang loq, masyah gomh dyei das xiklyis hwankti lhyi, jeslo jens yahge nyang ji bang sang das zis xoq.

²³Housoeh las ngamoq womkyi lha, haih cho Mangso lhyi shvmanh dung. YHENSAIN ka ngamoq dung yvlyis gyo yoeus dyei.

²⁴Housoeh ngos gas phudyei bang dah uhshe bang dvci aiq yuk - Sherebia, Hashabia yahge nyamoq yah dvgeh nghuot dah boekyis dvci yuk lyis gvm toh las

²⁵Hwankti yahge nyah xamchangh jens, uhshe bang yahge houmha nyeis dah Israel jens dvnganh, Mangso dah Yhenmuh xiklyis dyei dah ngwis xing yahge gohtoeu kyahsoe lhyi ngos laiq las nyamoq loq mas kyauh toh.

²⁶Ngos nyamoq loq mas laiq las kyauh zis gas: ngwis - 22 tan[8] ngwis kyahsoe 100 - 70 kilogram, xing - 3,400 kilogram[9] Xing khuq 20 - 8.4 kilogram Xing khuq jens iq phauh dah thunk yungh khuq aiq khyvp.

²⁸Housoeh las ngos haih phudyei bang lyis taiq zis gas, Namoq yahge haih zisyos lyis YHENSAIN xiklyis gyingshang das xiklyis toeuq toh goeus. Haih ngwis yahge xing ka YHENSAIN, yamoq dah Mangso xiklyis xihhonh jyungshuk nghuot.

²⁹Yerusalem YHENSAIN Yhenmuh khau phudyei bang, Lewi jens, Israel uhshe bang xikkhonh mas laiq yoeuh buisnyeis jweh shoq zaih zis yah zungh geh, yoeuh geh, oen.

³⁰Housoeh las phudyei bang yahge Lewi jens gas hau laiq dyei dah ngwis xing, kyahsoe lhyi Yerusalem mas joq Mangso dah Yhenmuh pheh yoeus loh das zis lhom yoeus.

³¹Ngamoq gas Yerusalem pheh loh das zis cangxeih vkhyvp dvci aiq vnyeih lyis Ahawa tvp masyah toq. Mangso ka ngamoq yah dvgeh nghuot las nyang gas jeswus jens ngamoq lyis los zan masyah eq, cho mha tamh lhom bang masyah eq ngamoq lyis dvchomuh yah gomh kat.

³²Housoeh ngamoq Yerusalem mas jweh las somh nyeih no nyeis.

³³Nyei vnyeih lyis Mangso dah Yhenmuh khau mha ngwis, xing, kyahsoe laiq las phudyei Uria dah lo Meremot, Phineha lo Eleaza yahge Lewi dius nghuot dah Yeshua lo Yozaba, yahge Binnui lo Nodi moq lyis kyauh.

³⁴Hau dvnganh lyis suon, laiq zis dvnganh hauh uhlyis nyang lhaih toh.

³⁵Jonsdoeus loh masyah tauh los bang gas Israel dvnyau gonh nyhenshang, noeulu dvci aiq doeu, yvnglus gauci khyuk doeu, yvnglo nyhetci nyhet doeu, yobos khyuot phudyei nyhenshang beqlus dvci aiq doeu yah Israel Mangso lhyi ngheq phudyei. Hau dvnganh gas YHENSAIN xiklyis ngheq phudyei tsain nghuot.

³⁶Nyamoq gas hwankti dah vmingh maussauh lyis hwankti gungsthaiq yahge Uphrat lvng buis wvng tvp mas nyeis mungh zau lyis kyauh lyis nyamoq gas dius jens lyis eq, Mangso Yhenmuh mas ngheq phudyei xiklyis eq pangh.