Read Achang NEHEMIA 2 Bible Online

NEHEMIA 2 - Achang bible

NEHEMIA 2

¹Hwankti zainsmuh Artaxerxes guon zis dvci aiq vzvn Nisan lhamhmuh khyvp, hwankti wom zo nyeis lyis, ngos nyah jyank mas zvbiq chi loh. Nyang gas xikpheh ngos nyoqnho ma yungh zis khanhamp eq ma nyvng ku.

²Housoeh las nyang ngos lyis, Nvng hei iq chamus nhaiqngis, nvng ma nos ma nghuot lhyeh, nvng ehnyet ma pyo zis bos das, ge. Hauh uhlyis ngos gas dvn las,

³hwankti lhyi phuk taiq zis gas, Hwankti kang xing bas jungh, ngah phauh thyeih moq nyhop dah wus gas dyoqbis las wus khomh ngeh tyamp goeus las ngos nyoqnho ma dyoq kha soeh yoh nyeis das lah, oen.

⁴Hwankti zainsmuh nyei zis gas, Nvng o zis cha nghuot, ge. Ngos gas maukhung Mangso lhyi vkyuh dung las,

⁵hwankti lhyi heisoeh oen, Hwankti ngos lyis nhaiq doeus las ngos sang zis dyei mes lyis gas, Yuda mau ngamoq dah phauh thyeih moq nyhop toh dah wus pheh jenh loh nhang aq. Housoeh ngos hauh wus lyis yoh soq das.

⁶Hwankti ka hwankti nyhiq yah dvgeh tsung toh las ngos sang yvlyis doms kyink zis gas, Ngos khanyhank nyangh das? Khanhamp doms jweh los das, ge. Ngos doms jweh los das shishenh taiq. Ngos khanhamp doms jweh los das zis hwankti lyis taiq.

⁷Tsai, ngos hwankti lhyi doms sang zis gas, Hwankti xikkhonh mas ngos ngelhoq lyis, Uphrat lvng buiswvng mau guon bang ngos lyis Yuda mau jweh shoq jesluiq shohluiq lhuiq kat bas jungh nyamoq lyis maussauh jenh lhaih dyei aq,

⁸Yhenmuh nvm mas joq thoenkgus jesdvp khomh, wusciank yahge ngos nyeis das yhen tsuk das saiq yoh das xiklyis hwankti saiq khyam zungh soeu Asap lyis eq maussauh lhaih dyei aq. Ngah Mangso ngos lyis pangh gvng mas ngos cha sang zis hwankti dyei.

⁹Hwankti ka jeszau jens yahge nyang dvp lyis Yuda mau pheh ngos yah dvgeh nhang. Ngos eq hwankti lhaih dyei dah maussauh lyis Uphrat lvng buiswvng pheh mungh zau jens lyis loh dyei.

¹⁰Nghuot laus eq ngos kuot das cho lhyi Horon dius Sanbalat yahge Amon dius zau Tobia xauhgyo las Israel dius nyau kuhxing das cho kuot das soeu jweh los ge nyamoq ehnyet ma tap, svsoh noh.

¹¹Ngos Yerusalem jweh thang lhyi somh nyeih oen lhyi

¹²dius das aiq yuk yah wusciank yoeuh das xiklyis nyenh gungsgvm lyis thuq loh. Ngos ji dah nyang mas lai las gohtoeu nyang ma bos. Ngos gas ngah Mangso ngos lyis Yerusalem mas cha kuot nhang cho hank lyis eq ma taiq kyoh shih.

¹³Hauh nyenh, ngos gas buiswvng pheh Langhkhau khomh chank yah wus masyah thuq khoq las mautyi pheh Mvnjung jeis dwang lai las buisthuq shot pheh dah Jenh khomh pheh loh. Ngos gas loh uhjyangh dyoq joq wusciank yahge ngeh joq dah wus khomh lyis chank yoeuh.

¹⁴Jenh khomh mas zis mautsung pheh Jeis thuq khomh lai khoq las Hwankti jeis dwang jweh shoq loh. Nghuot laus eq Hwankti jeis dwang masyah tsoq las wusciank chank yah ngah nyang loh das cho ma bos yvmvyah,

¹⁵Kidron langhkhau pheh gyoh khoq las langhkhau chank yah wusciank lyis chank yoeuh. Hou mhayah tauh khoq las ngos los cho vgus Langhkhau khomh chank yah wus vkhau pheh doms wvng los.

¹⁶Gvshih jweh shoq wus zau jens gas ngos khalhye loh khoq nghuot ya ngos cha kuot sont yvlyis ma seq. Ngos gas Yuda jens, nghuot ya phudyei bang, uhshe bang, nghuot ya nhaiqbos bang hank lyis eq ma taiq kyoh shih.

¹⁷Housoeh las ngos nyamoq lyis taiq zis gas, Yang kha iq yaukyenh nyeis zis yvnyang seq. Yerusalem wusciank dyoq las wus khomh eq ngeh tyamp goeus, yang xoq ma phuh lo bas jungh, wusciank doms ci goh.

¹⁸Ngos tsoq las taiq shih zis gas, Mangso ngos lyis bos pangh cho yahge hwankti ngos lyis khasoeh taiq cho nghuot. Nyamoq gas wusciank doms ci loh das xiklyis svsoh mes las, Lyoh! Wusciank doms ci goh bas, ge ngos lyis phuk taiq.

¹⁹Nghuot laus eq ngamoq kuot das cho lhyi Sanbalat, Tobia, yahge Arab dius Geshem moq seq lyis, nyamoq ngamoq lyis heisoeh ge jwangh. Namoq cha kuot nyeis zis namoq nyang vseq lah? Hwankti, Vkuot! ge toh dah vmingh lyis namoq ngoek las hwankti lhyi gomloeus toq nyeis.

²⁰Nghuot laus eq ngos nyamoq lyis doms phuk taiq zis gas, Maukhung mha Mangso ka ngamoq lyis ung cho dyei das zis nghuot. Ngamoq gas Nyah jyeidwis jens nghuot las ngamoq dah wusmuh lyis doms ci loh das zis nghuot. Nghuot laus eq namoq gas haih Yerusalem mas chah toeuh eq ma bos, ge.