Read Achang NEHEMIA 3 Bible Online

NEHEMIA 3 - Achang bible

NEHEMIA 3

¹Phudyei Zainsmuh Eliashib gas nyah phudyei changh jens yah Yvng khomh lyis soq tsuk xi loh. Nyamoq gas hauh khomh xiklyis Mangso lhyi kyauh toh las khomh tsuk. Nyamoq gas Yvng khomh yahge Tyoeuqzvm Dvxo jo mas dah wusciank lyis eq soq ci lha Mangso lhyi kyauh toh. Hauh thoq lyis ma goh nyamoq gas Hananel Tyoeuqzvm jweh shoq wusciank lyis ci.

²Hauh thang vdoeus lyis gas Yerikho mau masyah los bang tsain soq ci. Hauh thang mha Imri lo Zakhu soq ci.

³Hasena vhuh gas oengdoq khomh lyis tsuk las khomh yoh kyank toh das xiklyis nyamoq gas khomh shan, khomh no, khomh kyank lyis eq tsain kat.

⁴Hauh thang mha Hakoz dah nyeilo Uria lo Meremot gas wusciank lyis soq ci. Nyah thang mha Meshezabia nyeilo Bereki lo Meshulam soq ci. Nyah thang mha Bana dah lo Zadok soq ci.

⁵Hauh thang vdoeus lyis Tekoa mau mas bang soq ci. Nghuot laus eq nyamoq dah uhshe bang gas nyamoq dah yhensain jens taiq khyvlyis ma kuot.

⁶Khomh Cauh lyis gas Pase lo Yoiada, Besodi lo Meshulam tsain soq tsuk las khomhtank kat, khomh yoh kyank toh das xiklyis khomh shan, khomh no, khomh kyank lyis tsain kat.

⁷Gibeon dius Melatia yahge Meronot dius Yadon yahge Gibeon yah Mizpha mau masyah los bang gas Uphrat lvng buiswvng mau guon soeu nyeis dah joqyos jweh shoq wusciank lyis soq ci.

⁸Hauh bang thang mha ka xing shonh soeu Hahaia lo Uziel tsoq ci. Hauh thang mha xangh kuot soeu Hanani wusciank lyis tsoq ci. Nyamoq gas Yerusalem wusciank thoeu jweh shoq soq.

⁹Yerusalem wuxom dvgohyih lyis guon dah Hu dah lo Rephai ka thang mha vdoeus lyis soq ci.

¹⁰Nyah thang mha ka Harumap lo Yedaia gas nyah yhen twi twi wusciank lyis soq ci. Nyah thang mha vdoeus lyis gas Hashabneia lo Hatu soq ci.

¹¹Harim lo Makiya yahge Pahat Moab lo Hashu gas Tsau Tyoeuqzvm yahge thang mha dah wusciank lyis soq ci.

¹²Yerusalem wuxom dvgohyih lyis guon soeu Halohesh lo Shalum gas nyah lonyi jens bos pangh zis yah wusciank lyis soq ci.

¹³Hauh thang mha Hanun yahge Zano wukhau mha dah bang dvyhamh gas Langhkhau Khomh lyis soq tsuk. Hauh khomh shan, khomh no, khomh kyank lyis nyamoq nyang tsain kat. Hauh thoq lyis, Jenh khomh jweh shoq loqbon dvkhyoengh xing dah wusciank lyis soq ci.

¹⁴Bet Hakerem wuxom guon soeu Reka lo Makiya gas Jenh khomh lyis soq tsuk lha nyah khomh shan, khomh bungs, khomh kyank, khomh no lyis tap.

¹⁵Mizpa wuxom guon soeu Ko Hoze lo Shalum gas Jeis thuq khomh lyis soq tsuk, khomh lyis mau, khomh shan, khomh no, khomh kyank lyis kat. Nyang gas hwankti khyam nvm mas dah Shiloam jeis thomh mas zis Dawi dah wus pheh doq loh dah zvmlhangh jweh shoq eq soq ci.

¹⁶Betzu wuxom dvgohyih lyis guon soeu Abuk lo Nehemia gas Dawi dah lop twi twi masyah doeu toh jeis thomh yahge jes thoeuqzoe jens yhen jweh dah wusciank lyis soq ci.

¹⁷Nyah thang mha Bani lo Rehum ka Lewi jens lyis uhshe lha soq ci. Hauh thang mha Keila wuxom dvchink lyis guon soeu Hashamia gas nyah mau dius gungsthaiq soq ci.

¹⁸Nyah thang mha nyamoq boekyis, Keila wuxom dvgohyih lyis guon soeu Henadad dah lo Binnui soq ci.

¹⁹Mizpa guon soeu Yeshua lo Eza gas jes kyonhkhyi jyi ganthoq mas dah wusciank lyis soq ci. Nyang gas wusciank thunk jweh shoq soq ci.

²⁰Zabai lo Baruk gas wusciank thunk mas zis phudyei zainsmuh Eliashib dah yhen khomh jweh shoq yomkat ohhont las soq ci.

²¹Nyah thang mha ci soeu ka Hakoz nyeilo, Uri lo Meremot nghuot las Eliashib dah yhen gan thoq khomh mas zis gan thung jweh shoq soq ci.

²²Lewi jens thang mha ci bang gas Yerusalem vyvm vwi mas nyeis dah phudyei bang nghuot.

²³Benyamin yahge Hashu ka nyamoq dah yhen nvm mas zis ci. Hauh bang thang mha Anani nyeilo Masei lo Azari eq nyah yhen nvm mas dah wusciank lyis ci.

²⁴Nyah thang mha Henadad lo Binnui gas Azaria yhen mha zis wusciank thunk jweh shoq soq ci.

²⁵Hauh thang mha vdoeus lyis Uzai lo Pala gas hwankti yhen thoq chink yahge thung ganthoq, tyoeuqzvm joq dah wusciank thunk masyah ci loh. Parosh lo Pedai gas, Ophel jing mha nyeis yhenmuh jyeidwis jens yah dvgeh Jeis Khomh buisthuq mas zis thuq joq Tyoeuqzvm jweh shoq soq ci.

²⁷Tekoa wukhau bang gas thuq joq Tyoeuqzvm kuh mas zis Ophel jing thang lhyi lhaink toh dah wusciank jweh shoq eq soq ci.

²⁸Phudyei dvphung gas mautsung pheh Nyang Khomh masyah hank eq hank nyang dah yhen ganthoq mas dah wusciank lyis tsain soq ci loh.

²⁹Nyamoq thang mha Ima lo Zado gas nyah yhen nvm mas zis soq ci. Buisthuq Khomh zungh soeu Shekani lo Shemai gas hauh thang mha vdoeus soq ci.

³⁰Nyah thang mha Shelemi lo Hanani yahge Zalap lo khyuk vyuk Hanun gas gohtoeu vdoeus lyis soq ci. Nyamoq thang mas Beriki lo Meshulam gas nyah yhen xik mas dah wusciank lyis soq ci.

³¹Xing shonh soeu Makiya gas hauh thang mha vdoeus nghuot dah Mipkad[1] Khomh twi twi mha dah yhenmuh jyeidwis jens yahge soenghi kuot bang nyeis dah yhen jens jweh dah vdoeus lyis soq ci lha buisthuq mautsung wusciank thunk thoq mas joq dah yvp jweh shoq nyang tsoq ci loh.

³²Gohtoeu xing shonh bang yahge soenghi kuot bang dvyhamh gas wusciank thunk thoq yvp yahge Yvng khomh vjo, thang thank nyet joq dah wusciank lyis soq ci.