Read Achang NEHEMIA 4 Bible Online

NEHEMIA 4 - Achang bible

NEHEMIA 4

¹Sanbalat gas ngamoq Yuda dius jens wusciank tsuk xi loh nyeis zis xauhgyo lyis nhaiqyo las heisoeh ge jwangh.

²Yom ma bos dah Yuda jens cha kuot nyeis? Wusciank doms yoh ci das ge namoq nghamh lhyeh? Namoq Mangso lhyi tham shoq phudyei lyis gas dvnyeih dvm lyis hauh wusciank doms yoh ci das oen nghamh lhyeh? Khyomp boms mas dah wusciank lyis doms yoh ci das lah? Nyah dyenschangh jens yahge Samari jeslo jens xikkhonh mas housoeh ge jwangh.

³Nyah nvm mas yap joq dah Amon dius Tobia eq, Nyamoq ci dah wusciank thoq mas womkhuih doq lyis yangh gyop das, ge jwangh.

⁴Housoeh las ngos vkyuh dung zis gas, Ngamoq dah Mangso eh, nyamoq ngamoq lyis heisoeh jwangh nyeis zis jenh gyo dyei shih aq. Ngamoq lyis jwangh gvng masyah nyamoq joeng zis xauh bas jungh. Nyamoq dah zisyos dvnganh gohnyau bang lhuot loh las nyamoq eq gohmau pheh jonsdoeus loh bas jungh.

⁵Nyamoq dah kwai cho lhyi yobos vkhyuot dyei, nyamoq dah yobos lyis comh toh dyei aq. Khasoeh ge lyis nyamoq gas ngamoq wusciank ci nyeis bang lyis goes sang, ngamoq lyis jwangh.

⁶Nghuot laus eq wusciank nyhang choeu dvchink dye tsuk ci loh nyeis goeus. Khasoeh ge lyis muh zwi bang dvnganhmoq gas muh lvnyap dye das xiklyis yomkat nyeis.

⁷Sanbalat, Tobi yahge Arab, Ashdod, Amon mau mas bang gas, Yerusalem wusciank svsoh yoh ci loh goeus cho yahge wusciank bangh jens lyis yoh cheiq goeus ge cho xauhgyo lyis nhaiqyo.

⁸Nyamoq gas Yerusalem lyis zan las wusciank ci muh tomp tyamp das ge tsain xamxonh.

⁹Hauh gvng mas ngamoq gas ngamoq dah Mangso jyank vkyuh dung las nyeih nyenh zungh das dius khyoq toh.

¹⁰Nghuot laus eq wusciank ci nyeis dah Yuda jens gas yomgyau las heisoeh ge, Ngamoq muh zwi das yom ma bos lo, thauh tyamp das mhotkhyot eq nyoshoq zungs toh shih, haih wusciank lyis ngamoq ma yoh tyeh ci lo das, ge.

¹¹Yuda jens dah nghamhtoeuq cho ma ung shoq ngamoq gas Yuda jens lyis loh zan sat las muh ma yoh tsoq kuot shoq loeu nhunk cho dyei chah, ge ngamoq dah jeswus jens taiq.

¹²Jeswus jens yah dvgeh nyeis dah Yuda jens gas, ngamoq jyank mas dvci lhain ma gah los las jeswus jens gas nyamoq nyeis dah joqyos khanghmuh masyah jes toq los las Yuda jens zan ung das ge taiq.

¹³Housoeh las ngos gas wusciank nyhen thank yvmas nyang nyau nyang lyis zungh das xiklyis sham, lham, lyei chi dah dius khyoq toh.

¹⁴Zungh das dius dye tsain khyoq toh zis lyis vlhomuh yoeuh thang lhyi, uhshe bang yahge dius jens lyis ngos heisoeh oen taiq, Yah jeswus lyis vgyuk goh, yah Mangso ka kuh thank las yombos soeu nghuot. Mangso yang lyis bos pangh das zis nghuot oen loms toh las, yah dius nyau, yah lo doeus, yah yhen xiklyis zan goh bas, oen yomdyei.

¹⁵Ngamoq dah jeswus jens gas nyamoq sont cho lhyi ngamoq seq goeus ge, bon lyis, Mangso ka nyamoq sont cho lhyi tomp tyamp dyei, ge. Housoeh las ngamoq eq wusciank ci muh lyis doms zwi loh.

¹⁶Nghuot laus eq hauh nyeihyo masyah ngah dius jens dvgohyih lyis muh zwi nhang lha dvgohyih lyis gas jes dyi wuot, lham chi, gos chi, lyei chi lha zungh nhang toh. Yuda uhshe bang lyis eq jeswus los zan lyis lvnyap loh shwih zan das xiklyis nyah jyeidwis jens yah dvgeh nyhei toh.

¹⁷Wusciank ci kyahsoe dvng bang eq dvloq gas wusciank ci kyahsoe dvng, dvloq mas gas kyonhkhyi chi toh.

¹⁸Wusciank ci nyeis bang eq thyikdom mas sham nyhap chi lha muh zwi. Dius jens lyis zaih nhang dah lvbuh muot soeu ka ngos yah dvgeh nyeis.

¹⁹Housoeh las dius jens yahge zau bang, uhshe bang lyis ngos heisoeh oen taiq. Yah loqzoh gas wusciank dvkoeuq gonh nghuot las dvyuk dvyuk we goh joq.

²⁰Housoeh las lvbuh thwe xauhgyo lyis lvbuh muot dah joqyos mas lvnyap los las ngos yah dvgeh jeswus lyis zan goh. Mangso ka yang yah dvgeh jeszan das.

²¹Nyamoq gas muh zwi khank nyeis. Dius dvgohyih gas nyoq nyvng masyah kyi thuq shoq lham tsain chi toh.

²²Ngos Yerusalem vyvm vwi mas nyeis bang eq cheq bos dah wusciank ci bang dvnganhmoq lyis nyenhyo lyis Yerusalem wusciank khau mha nyeis das xiklyis taiq toh. Khasoeh ge lyis nyamoq gas nyeihyo lyis muh zwi yhangteh nyenh lyis eq wus lyis yoh bos zungh bas jungh.

²³Ngah jyeidwis, nghuot ya zungh bang, nghuot ya ngvnyang eq nyenh lyis dyimis ma thaiq. Ngamoq gas loq mas kyonhkhyi chi lha yhet.