Read Achang NEHEMIA 5 Bible Online

NEHEMIA 5 - Achang bible

NEHEMIA 5

¹Hauh thang ma nyangh lyis, Yuda jens gas nyah Yuda changh lyis heisoeh ge tsain lop.

²Ngamoq gas loloeu lonyi jens eq cheq nyoshoq nghuot. Kang dwis das xiklyis wom chah, ge bang bos.

³Dvyhamh bang los taiq zis gas, Ngamoq kang dwis das xiklyis wom yoh das nyhenshang ngamoq dah danh, zvbiq khyam, yhen dye tank toh goeus, ge.

⁴Dvyhamh bang los taiq shih zis gas, Ngamoq gas ngwis jyeih las hwankti lyis danh yahge zvbiq khyam xiklyis khoengh kat chah nyeis, hauh gvng mas ngamoq ngwis jyen shauh.

⁵Dvyhamh bang los taiq shih zis gas, Ngamoq gas Yuda dius nghuot, ngamoq dah lo jens eq Yuda vnyau nghuot. Nghuot laus eq ngamoq kang dwis das xiklyis ngamoq dah lo lyis jons duot nhang chah. Gvshih yangh lonyi jens dvyhamh gas jons duot nyeis goeus. Ngamoq gas shohjyen, chah nyoqnho ngelang ma bos, yomsoq ma bos: khasoeh ge lyis ngamoq dah danh svbih dvzwi zo nyeis, ge.

⁶Housoeh teh nyamoq lop nyeis cho yahge bweh nyeis cho lhyi ngos xauhgyo las, svsoh nhaiqyo.

⁷Ngos cha kuot das zis vlhomuh nghamh yoeuh thang lhyi Yuda uhshe bang yahge zau jens lyis heisoeh oen taiq. Namoq gas namoq nyang dah Yuda changh lyis gyvzaiq gyvnang kuot. Ngos haih dah soe xiklyis moqphung lhyi khi tsainh toh las ngos moqphung xikkhonh mas nyamoq lyis taiq zis gas,

⁸Ngamoq gas gohnyau jyank jons duot nyeis dah Yuda jens lyis wis. Nghuot laus eq namoq gas doms unghzo, housoeh las ngamoq gas nyamoq lyis doms khyuot chah goeus. Ngos Yuda uhshe bang lyis housoeh oen tsuk cho nyamoq nyang xauhgyo lyis cha ma yoh phuk taiq, samlo tsain nyeis.

⁹Ngos doms tsoq taiq shih zis gas, lai loh uhlyis namoq gas svsoh cu cho kuot goeus. Hauh gungsthaiq namoq Mangso dah domsyos gyo chah, housoeh lyis namoq dah gohnyau jeswus jens gas namoq lyis jwangh das zis ma nghuot.

¹⁰Ngos eq ngah jyeidwis jens eq, ngah dyenschangh jens eq Yuda jens lyis guk eq, ngwis eq tsain jyeih dyei toh. Gvshih yang gas nyamoq jyank masyah doms yoeus das oen ma nghamh lo goh.

¹¹Namoq eq nyamoq los tank toh dah yhen, zvbiq khyam, tsanlun yos, danh lyis lvnyap doms dyei geh. Lhyi xiklyis namoq yoeus toh dah ngwis, zvbiq, tsanlun coeu lhyi doms tauh dyei geh.

¹²Ngos housoeh oen sang lhyi nyamoq gas, Nvng taiq khyvlyis ngamoq doms kuot das. Ngamoq gas nyamoq dah zisyos lyis cha eq ma sang doms dyei das, ge. Housoeh las ngos eq phudyei bang lyis khi lha haih Yuda uhshe bang nyamoq nyang dangthoengh dyei zis yah dvyhangteh jyoeng joq bas jungh, kanghjyoeng kat nhang.

¹³Hou lholha nap toh dah ngah shanhzoe lyis ko khyoq las Mangso ka vsainnyang dah dangthoengh ma jyoeng bang dah zisyos lyis nyamoq nyang jyank masyah heisoeh ko khyoq bas jungh, oen taiq. Housoeh nyamoq eq, Bweh bas jungh, ge sang las Mangso lhyi zop paiq. Nyamoq nyang kuot das ge zis yah dvyhangteh tsain kuot loh.

¹⁴Hauh thoq lyis hwankti Artaxerxes ka nyang guon zaih aiqci zvn masyah somhci aiq zvn gyo lyis ngos lyis Yerusalem mungh zau toeuq toh uhlyis ngos eq ngah dius jens eq mungh zau zokho lhyi ma zo.

¹⁵Ngah xik lyis dah mungh zau jens gas dius jens lyis suih jyop. Mungh zau zokho nghuot dah wom, zvbiq lyis yoeus zo thoq lyis magoh, ngwis nyeici shekel doms sang. Nyah jyeidwis jens eq dius jens lyis gyvzaiq gyvnang kuot. Nghuot laus eq ngos gas Mangso lhyi phauh nyang mes gvng mas houteh phyiqkhyi ma chi.

¹⁶Hauh thoq lyis ma goh, ngos gas wusciank ci dah muh mas yomkat mes las ngah xiklyis danh ma wis. Ngah jyeidwis dvnganh eq wusciank ci dah muh mas yomkat.

¹⁷Yerusalem vyvm vwi masyah los dah gohnyau boengh, zau jens yahge Yuda zau dvxo oengci yuk gas ngah womjus mas vjangh bos zo.

¹⁸Ngos ngah jyeidwis jens lyis nyeih yau nyeih noeukuh dvdoeu, nyhuk toh yvng khyuk doeu yahge gyoq nyoshoq sat das xiklyis toeuq toh. Ci nyeih lyis dvlhain zvbiq vja ja zis lyis nyamoq tyink dyei. Nghuot laus eq dius jens gas nyamoq nyang nyeih yau nyeih kang dwis das xiklyis svsoh yvwons lyei nyeis zis ngos nyvng las ngos yoh vvng dah mungh zau zokho lhyi ma sang.

¹⁹Uwus Mangso eh, ngos haih dius jens lyis gis zis kuot gvng mas ngos lyis shvmanh dyei aq, oen ngos heisoeh vkyuh dung.