Read Achang NEHEMIA 6 Bible Online

NEHEMIA 6 - Achang bible

NEHEMIA 6

¹Sanbalat, Tobia, Arab dius Geshem yahge gohtoeu jeswus jens gas, Ngamoq wus khomh eq ma yoh kat shih lyis ngamoq wusciank dye ci goeus, wusciank bangh eq dye cheiq goeus ge xauhgyo.

²Housoeh las Sanbalat, Geshem gas ngah jyank loeus kyoh soeu nhang las ngos lyis Ono janggyon mas dah wukhau dvkoeuq mas nyamoq yah xauhgoh goh ge doengs. Nghuot laus eq nyamoq gas ngah kang lhyi lhaink las housoeh mhuih cho lhyi seq yvmvyah,

³Ngos heimha yhaugyen muh zwi nyeis las, houmha ma yoh los, namoq yah los xauhgoh das soe dvkoeuq kyingh xiklyis ngos haih muh ma yoh no toh, oen loeus doms kyoh kat.

⁴Nyamoq gas housoeh nyei lhain ngah jyank mas loeus kyoh los. Ngos eq nyei lhain loeus doms kyoh kat.

⁵Thang thank oeng vlhain lhyi Sanbalat gas ngah jyank mas nyah jyeidwis lyis yah phank toh maussauh dvkhyvp huon kat.

⁶Hauh maussauh mas, Nvng yahge Jew jens gas gomloeus toq das zis nghamh toeuq las wusciank ci nyeis cho vyvm vwi mas dah dius nyau jens taiq nyeis ge dah loeus lyis Geshem taiq kyoh las yoh seq.

⁷Nvng gas hwankti kuot mes las Yerusalem wus mas Yuda hwankti khyvlyis taiq hoeuh das zis lvpe jens yah cvvq nyeis cho lhyi eq Geshem ngos lyis taiq kyoh. Haih cho loeus lyis hwankti xauhgyo das. Housoeh las ngos yah xamgoh das zis los aq, ge bos.

⁸Ngos eq, Nvng taiq zis dvkoeuq eq ma jus. Nvng nvnyang kuot taiq zis dvnghuot, oen doms kyoh kat.

⁹Nyamoq gas ngamoq muh no das xiklyis tungh, kyuk nyeis. Nghuot laus eq Mangso eh, gvshih ngos lyis yombos nhang aq, oen dung.

¹⁰Hauh yoq lyis Mehadabi lo, Delia nyeilo Shemaia gas nyah yhen mhayah ma yoh thuq loh las ngos nyah jyank mas loh lyis nyang gas, Yang yhenmuh mas loh las Gyingshang joqyos mas tamh las khomh nyheih toh goh. Nyamoq nvng lyis los sat das. Kha nyens laus eq nvng lyis los sat das, ge.

¹¹Ngos nyang lyis phuk taiq zis gas, ngos gas phang tamh das dius ma nghuot, kang luiq das xiklyis yhenmuh mas tamh soeu oen nghamh lhyeh? Ngos yhenmuh mas ma loh, oen doms taiq.

¹²Ngos haih cho nghamh yoeuh lyis, heisoeh Shemaia ngos lyis zaih nhang zis gas, Mangso Shemaia lyis taiq zis ma nghuot. Tobia yahge Sanbalat nyang lyis khauwhot dyei las kuot nhang yvmvyah dvnghuot.

¹³Ngos yaunos kuot zis yah nyoqnho ngelang gyoh las xoqphuh shoq nyamoq gas Shemaia lyis lhung lha ngos lyis tsain kyuk tant nhang.

¹⁴Mangso eh, Sanbalat yahge Tobia kuot cho lhyi soh las, nyamoq lyis joeng aq. Ngos lyis kyuk dah lvpe nyhiq Noadia yahge gohtoeu lvpe jens dvnganh lyis soh dyei aq, oen dung.

¹⁵Elu lhamhmuh khyvp aiqci oeng vnyeih lyis wusciank dye ci. Wusciank ci dah buisnyeis gas oengci aiq nyeih nyangh.

¹⁶Vyvm vwi mau mas dah jeswus jens gas ngamoq wusciank dye ci goeus ge xauhgyo lyis nyamoq tsain xoq gyuk loh. Khasoeh ge lyis ngamoq haih wusciank dye ci zis gas Mangso bos pangh las nghuot ge zis nyamoq yoh seq yoeus.

¹⁷Haih shishenh gyo lyis Jew uhshe bang yahge Tobia gas maussauh e los lhaih goh nyeis.

¹⁸Tobia gas Ara dah lo Shekhania dah lomoq nghuot las, Jew jens nyoshoq nyah shot pheh bos. Hauh thoq lyis nyah loloeu Yehohanan eq Berekhia lo Meshulam dah lonyi lyis yoeus toh.

¹⁹Nyamoq gas Tobia dah gis cho ngos lyis los taiq kyoh teh, ngos Tobia lyis cha taiq zis eq Tobia lyis loh doms taiq kyoh. Tobia eq ngos lyis kyuk maussauh tsoq lhaih nyeis.