Read Achang NEHEMIA 8 Bible Online

NEHEMIA 8 - Achang bible

NEHEMIA 8

¹Lhamhmuh nyhet vkhyvp lyis Israel jens dvnganh gas, nyamoq nyang dah wus jens mas tsain nyeis goeus. Hauh vkhyvp cangxeih vnyeih lyis nyamoq dvnganh gas Yerusalem Jeis Khomh vkhau pheh pazoe mas zophuom toh. Nyamoq gas YHENSAIN Israel jens lyis Moshe lhyi yah dyei toh dah Lyi lyes soeu, phudyei Ezra lyis, Lyi maussauh buk chi los das xiklyis tsain dung.

²Housoeh las Ezra gas yoh seq gyo bang vbusbih vmesbih, loshang jens bos dah moqphung huom yvmas Lyi maussauh lyis yoeus loh.

³Nyang gas Jeis Khomh xik, moqphung shot xoeu lha nvpsangh masyah nyeih gungs jweh shoq nghap kyoh. Nyamoq eq vlhomuh kamp gyo.

⁴Ezra gas hauh shvhoeu nyhenshang bat toh dah saiq gyamh nyhang thoq mas yap las Lyi maussauh lyis nghap. Nyah loqyos shot pheh gas Matithi, Shema, Anaia, Uria, Hikia, Maseia moq yap joq; loqwi shot pheh yap bang gas Pedaia, Mishael, Makhaia, Hashum, Hashbadana, Zekharia yahge Meshulam moq nghuot.

⁵Ezra gas nyamoq thoq lyis nyhang dah saiq gyamh thoq mas yap joq dah uhlyis dius dvnganh gas nyang lyis yoeuh tsuk toh. Lyi maussauh lyis phank kat uhlyis nyamoq toq yap.

⁶Ezra taiq, Kuhxing YHENSAIN Mangso lhyi chungh! ge. Dius jens dvnganh gas loq toeu lha, Amen, Amen, ge toeuh. Nyamoq gas phvluk zomhgyuis las tsain dupaiq.

⁷Hauh thang lhyi nyamoq gas nyamoq nyang joqyos mas toq yap las, o mha dah Lewi jens gas nyamoq lyis hauh lyi vjyuk tsain phui kyoh. Hauh bang gas Yeshua, Bani, Sherebia, Yamin, Akub, Shabethai, Hodia, Maseia, Kelita, Azaria, Yozabad, Hanan yahge Pelaia tsain nghuot.

⁸Nyamoq gas Mangso dah Lyi lyis vjyuk vlhomuh phui kyoh yvmvyah dius jens hauh yvlyis daq gyo.

⁹Dius jens gas Lyi maussauh nghap zis xauhgyo lyis ehnyet mas zangh las tsain ngaus. Mungh zau Nehemia, phudyei soeu, lyi svra Ezra yahge, dius jens lyis jyauh yvmas bos pangh dah Lewi jens gas dius jens lyis heisoeh ge, Khvnyhik gas YHENSAIN, yah Mangso dah gyingshang buisnyeis nghuot. Housoeh las namoq nhaiq vkuk goh, vngaus goh.

¹⁰Gvshih yhen pheh loh las pyo pyo zo shuk pwe kuot geh. Ma tham yoh bang lyis eq namoq dah zonoms eq zvbiq eq gvm dyei geh. Khvnyhik gas yah YHENSAIN dah gyingshang buisnyeis nghuot. Housoeh las vkuk goh. YHENSAIN dyei dah gauslaus zis gas namoq lyis yombos nhang das, ge.

¹¹Lewi jens eq dius jens jyank loh las, Hai gyingshang nyeih lyis nyens nyens nyeis geh, nhaiq vkuk goh, ge taiq.

¹²Housoeh las dius jens dvnganh gas yhen pheh loh las pyo pyo tsain zo shuk. Nyamoq lyis nghap kyoh cho seq gyo goeus yvmvyah, ma yoh bang lyis eq nyamoq yoh zis tsain gvm dyei.

¹³Nungs nyeih, vhuh uhshe bang gas, phudyei bang yahge Lewi jens yah dvgeh lyi maussauh xuq das xiklyis Ezra jyank mas tsain loh.

¹⁴Nyamoq gas Moshe lhyi yah YHENSAIN dyei toh dah Lyi mas, Phunk pwe kuot gyo lyis, Israel jens gas phunk bat las nyeis das xiklyis taiq toh zis tsain nyvng.

¹⁵Housoeh las nyamoq gas Lyi mas taiq shet lhaih toh zis yah dvyhangteh, boms mas loh las xoeuh kyang, tsanlun kyang, marta kyang, dyoms kyang yahge gohtoeu saiq kyang zan las phunk bat chah, ge Yerusalem yahge gohtoeu wugungs yahge wus jens mas nyeis bang lyis taiq shet cho dyei kat.

¹⁶Housoeh las dius jens eq saiq kyang loh choeu los las vsainnyang dah yhenkhung dvm, yhen ganthoq, yhenmuh khyam khau yahge Jeis Khomh, Ephraim khomh yvm mas dah pazoe mas phunk los tsain bat.

¹⁷Jonsdoeus loh masyah tauh los dah Israel jens dvnganh gas phunk bat las tsain nyeis. Israel jens gas Nun lo Yoshua zaih mas zis khvnyhik jweh shoq, cangxeih vlhain phunk bat las phunk pwe kuot las yuk khanghmuh svsoh gauslaus.

¹⁸Haih phunk pwe cangxeih nyeih masyah thang thank nyeih jweh shoq nyeih khanghmuh Mangso dah Lyi maussauh tsain nghap. Nyamoq Phunk Pwe nyhet nyeih kuot. Xet vnyeih lyis lyi taiq toh zis yah dvyhangteh nyamoq gas dvnganhmoq zain las gyingshang huom tsain kuot.