Read Achang NEHEMIA 9 Bible Online

NEHEMIA 9 - Achang bible

NEHEMIA 9

¹Hauh lhamhmuh khyvp aiqci nyei vnyeih lyis Israel jens gas nyamoq yaunos xiklyis kuk cho chixoeuq das zis womkyi das xiklyis dvlhain doms huom. Nyamoq gas gohnyau bang yah ganggoh goeus. Nyamoq gas kuk dah vlho, yanghthung dyi wuot, uhloms mas tsohmop tsain lhyauq. Hauh thang lhyi nyamoq gas nyamoq yahge nyamoq phauh thyeih moq cu dah yaunos lyis tsain rhen.

³Housoeh YHENSAIN, nyamoq dah Mangso dah Lyi somh shishenh ko nghap kyoh lho lha, somh shishenh gas nyamoq cu yvlyis tsoq las rhen thang lhyi YHENSAIN, nyamoq dah Mangso lhyi paiq.

⁴Yeshua, Bani, Kadmiel, Shebania, Buni, Sherebia, Khenani yahge gohtoeu Bani moq gas Lewi jens gyangh yap dah gyamh mas yap las YHENSAIN, nyamoq dah Mangso lhyi shvmanh kaiq dung.

⁵O mha dah Lewi jens: Yeshua, Kadmiel, Bani, Hashabneia, Sherebia, Hodia, Shebania yahge Pethahia moq gas, paiq das xiklyis yus las taiq: Toq yap las YHENSAIN, namoq dah Mangso lhyi chungh geh. Nyang lyis vcaiq vto chungh geh! Mangso ka dius jens yoh chungh thoq lyis zes kuhxing laus eq, yang nyah phunk bos nyings lyis tsain chungh goh, ge.

⁶Hauh thang lhyi Israel jens gas haih shvmanh dung dang yah dung: YHENSAIN eh, Nvng dvyuk kyingh YHENSAIN nghuot. Nvng gas maukhung yahge kyi lhamhmuh gvnkhanh toh. Tung yos, thomh yahge houmha bos zis dvnganh lyis gvnkhanh las dvnganh lyis kang dyei. Hau maukhung yahge kyi lhamhmuh gas nvng lyis gop las paiq.

⁷Nvng, YHENSAIN Mangso ka Abram lyis khyen lha, Babilon mas dah Ur wus masyah shwih thuq los. Nvng nyah nyings lyis Abraham ge thaiq dyei.

⁸Nvng gas, nyang nvng lyis lomluk yvlyis nyvng las nvng nyang yah thanghchvp toh. Nvng nyang yahge nyah vnyau vshih lyis Khanan, Hiti, Amori, Perizi, Yebusi, Girgashi mau mas nyeis das zis dyei das, ge dangthoengh toh. Nvng gas wontang yvmvyah nah dangthoengh yah dvyhangteh kuot.

⁹Nvng, ngamoq dah phauh thyeih moq Egutu mas shohjyen xauh nyeis yvlyis nyvng. Thomh Nes mas nvng lyis bos pangh aq, ge lui zis xauhgyo.

¹⁰Nvng hwankti, nyah zau jens yahge nyah mau dius jens lyis tyi lha mauhphoh yomsoq muh kuot. Khasoeh ge lyis nyamoq gas nah dius jens lyis khasoeh zaiq yvlyis nvng seq. Hauh nvng ung cho lhyi khvnyhik jweh shoq hoeuh nyeis shih.

¹¹Hau thomh lyis thyet las, nah dius jens xiklyis cho kuot dyei las nyamoq lyis houmha tung yos cho suh lai nhang. Nyamoq lyis chank khat los bang lyis gas, thomh jeisphauq mas lukzains gyoh teh nyop loh nhang.

¹²Nvng nyamoq lyis, nyeih lyis jyommauh, nyenh lyis nyidains yah shwih los.

¹³Nvng gas maukhung mhayah Sina boms thoq mas gyoh los las, nah dius jens lyis jis zis yah nyamoq lyis gis dah lyi yahge jyoeng dah jyauh cho dyei.

¹⁴No nyeih lyis gyingshang nhang das xiklyis jyauh. Nah jyeidwis Moshe lhyi yah nvng nyamoq lyis nah lyi tsain dyei

¹⁵Nyamoq wom yuot lyis maukhung mhayah ohlhyoq khyoq dyei, jeis shet lyis lukmuh loms masyah jeis thuq los nhang. Nvng nyamoq lyis dyei das ge, dangthoengh toh dah mau lyis loh sain geh, ge taiq.

¹⁶Nghuot laus eq ngamoq dah phauh thyeih moq gas khwank, nhaiqlom than lha nah dang lyis domsyos gyo das zis ngoek.

¹⁷Nyamoq nvng kuot dah yomsoq muh dvnganh lyis tohnyhik las nah domsyos gyo das zis ngoek. Nyamoq khwank las nyamoq lyis Egutu mas jons duot yvpheh shwih tauh e das zis uhshe soeu khyen. Nghuot laus eq nvng gas yobos khyuot dyei dah Mangso nghuot. Nvng gas jyehjuh yahge jyetdap zis yah dyingh las nhaiq lvnyap ma yo dah Mangso nghuot. Nah nhaiqnyen cho ka kuhxing lha nvng nyamoq lyis ma doeuh tyamp.

¹⁸Nyamoq gas noeulu lho kuot las, heika nyamoq lyis Egutu masyah shwih los dah mangso nghuot, ge. Yhensain eh, nyamoq nvng lyis kha iq ma phauhgis kuot!

¹⁹Nghuot laus eq nah nhaiqnyen cho ka kuh yvmvyah, nvng nyamoq lyis mhanhdyvp mas ma she tyamp. Nyeih nyenh nyamoq lyis cho tuonh xoeuq dah jyommauh punk yahge nyidoms lyis ma yoeus tyamp.

²⁰Nvng gas gis las, nyamoq kuot chah cho lhyi tsain jyauh. Nyamoq lyis mana tsoh las, shuk das jeis dyei.

²¹Sihyos mhanhdyvp mas nyeici zvn, nvng nyamoq chah zis dvnganh dyei. Nyamoq dah dyimis khanhamp eq ma tyang loh, nyamoq dah khyei yam las ma nos.

²²Nvng nyamoq lyis maukyo toh las nyeis dah mau, munghdan yahge dius nyau jens lyis zan ung nhang. Nyamoq gas hwankti Sihon guon dah Heshbon mau yahge hwankti Og guon dah Bashan mau lyis zan ung.

²³Nvng nyamoq dah lo jens lyis maukhung kyi soeh nyo los nhang. Nyamoq lyis dyei das ge, nvng nyamoq dah phauh thyeih moq lyis dangthoengh toh dah mau lyis zan ung lha houmha nyeis nhang.

²⁴Nvng Khanan mau nyamoq lyis dyei las nyamoq gas hauh mau mas nyeis bang lyis zan ung tyamp. Nvng nah dius jens lyis Khanan hwankti yahge dius jens lyis kuot mes khyvlyis kuot das yomsoq dyei goeus.

²⁵Nah dius jens gas thoenkgus jesdvp bos dah wusmuh jens, nyeis coeu bos dah mau, zisyos dyingh shoq bos dah yhen jens, doeu toh goeus dah jeisdwang jens, tsanlun yos jens, shihkhyam jens yahge zvbiq khyam nyoshoq tsain xauh yoeus. Nyamoq gas nyamoq o zis dvnganh xauh zo las coeu los. Nyamoq gas nvng dyei dah vyhang gis zis yah xauh pyo nyeis.

²⁶Nghuot laus eq nah dius jens gas, Nah domsyos ma gyo, nvng lyis gomloeus tsain toq. Nah lyi masyah nungs phuk loh. Nyamoq nah jyank pheh tauh los das xiklyis taiq kyingh zaih nhang bang lvpe jens lyis sat. Nyamoq gas nvng lyis dvlhain thang lhyi dvlhain ma phauhgis kuot.

²⁷Housoeh las nvng nyamoq dah jeswus jens lyis yah, nyamoq lyis zan ung lha guon nhang. Nyamoq shanghsenh lyis nyamoq gas nvng lyis pangh das xiklyis lui las nvng gas maukhung mhayah toeuh dyei. Nvng nhaiqnyen zis yah, nyamoq lyis nyamoq dah jeswus masyah khyuot yoeus das xiklyis uhshe bang nhang kat dyei.

²⁸Nyenstap thang lhyi nyamoq gas yaunos doms kuot. Nvng eq jeswus lyis doms zan ung nhang: Nghuot laus eq nyamoq nhaiqlom thaiq las nyamoq lyis khyuot yoeus das xiklyis nyamoq doms dung lyis, Nvng nhaiqnyen zis yah dvlhain thang lhyi dvlhain nyamoq lyis khyuot yoeus.

²⁹Nvng nyamoq lyis nvng jyauh cho domsyos gyo das xiklyis zaih nhang. Nah lyi chank zis gas kang yoh das cho nghuot laus eq nyamoq gas khwank las nah lyi lyis peq tyamp. Nyamoq gas nhaiqlom svsoh than lha domsyos gyo das zis ngoek.

³⁰Nvng gas nyamoq lyis dvzvn thang lhyi dvzvn nhaiqlom xing xing zaih nhang nyeis. Nvng nah lvpe jens lyis Dyos kat dyei las taiq nhang. Nghuot laus eq nah dius jens gas no jet, housoeh las nvng gohnyau bang lyis los zan ung nhang.

³¹Nghuot laus eq nah nhaiqnyen cho ka kuh joq yvmvyah nvng nyamoq lyis ma tyamp, ma mhont. Nvng gas jyehjuh yahge nhaiqnyen dah Mangso nghuot.

³²Mangso eh, ngamoq dah Mangso eh, nvng gas kha iq gyukphoh, kha iq yomsoq bos! Nvng gas nah thanghchvp, dangthoengh lyis wontang zwi toh. Ngamoq lyis Asiria hwankti zaiq shishenh masyah khvnyhik jweh shoq ngamoq kha iq khamzo! Ngamoq dah hwankti jens, uhshe bang, phudyei bang, lvpe jens, phauh thyeih moq yahge ngamoq dah dius jens dvnganh gas svsoh shanghsenh cho xauh goeus. Ngamoq kha iq shanghsenh yvlyis jenh soh dyei aq.

³³Nvng ngamoq lyis joeng cho ka jus. Ngamoq yaunos kuot laus eq nvng gas wontang.

³⁴Ngamoq dah phauh thyeih moq, hwankti jens, uhshe bang, phudyei bang gas nah lyi ma chank. Nyamoq nah tyingtoh dang yahge zaih nhang yvlyis ma gyo yoeus.

³⁵Ngamoq dah hwankti jens gas nvng nyamoq lyis dyei toh, dvm las nyeis coeu bos dah mau mas nyeis uhlyis nah jyehjuh xauh kham lha nah dius nyau lyis xauh guon. Nghuot laus eq nyamoq gas yaunos lyis ma jhank, nvng lyis eq ma phuqsoe.

³⁶Gvshih ngamoq gas nvng ngamoq lyis dyei toh, hai coeu bos las ngamoq lyis zonoms dyei dah mau mas jons duot nyeis.

³⁷Ngamoq gas yaunos kuot yvmvyah ngamoq mau mas thuq dah jyo ka nvng ngamoq thoq mas guon nhang dah hwankti jens jyank mas dvloh. Nyamoq gas ngamoq dah gaunyhauq lyis nyamoq ehnyet tap khyvlyis dvkuot. Ngamoq gas ma thoq taiq lo shoq shohjyen nyeis.

³⁸Hai dvnganh bweh lai loh goeus gvng mas, ngamoq Israel dius jens gas xamxonh cho dvkoeuq lhaih las, ngamoq dah uhshe bang, Lewi jens yahge phudyei bang gas hauh yvmas nyamoq dah kyihau tsain tap.