Read Achang ESTHER 1 Bible Online

ESTHER 1 - Achang bible

ESTHER 1

¹Hwankti Xerxes[1] gas Persia wusmuh Susa wus, nyah hwankti tank mas tsung lha, India mau masyah Ethiopia jweh shoq 127 mauxom lhyi guon nyeis.

³Nyang guon dah somh vzvn lyis nyah xamchangh jens yahge zau guon bang dvnganhmoq xiklyis pwe kuot dyei. Persia, Media mas jeszau jens, mauxom mha dah zau jens yahge mungh zau jens eq tsain bos.

⁴Nyang gas nyah hwankti yhen khyam dah yoh khuiq cho, yungh shop cho yahge nyoqnho ngelang lyis lhamhmuh khyuk khyvp top chixoeuq nyeis.

⁵Hauh thang lhyi hwankti ka Susa wumuh, hwankti yhen khyam khau mas, dis bang, nyungs bang dvnganh xiklyis pwe kuot dyei. Houka dvdaus nyangh shoq nghuot.

⁶Hauh yhen khyam mha luk thyoeu zains mas ngwis khwank tsain lhangh toh. Houmha nesnoq twih yhwiq yah vthyoeu, vlanh ta-u seh khomhgos tsain jvng lhangh shunk toh. Luk thyoeu, luk nes, bvng kvnuq kvma yahge wakintu vlanh yah tsain nyhoeuh toh dah yvmas ngwis xing yah kuot dah jung tsain toh toh.

⁷Zvbiq lyis xing kom masyah tsain shuon dyei nhang. Hauh xing kom ka dvkoeuq yah dvkoeuq ma doeusgoh. Hwankti ka nyah zvbiq lyis shuk nhang mes.

⁸Zvbiq shuk cho ka keq toh zis ma bos. Hwankti ka hank eq hank o nyhoq shuk nhang das xiklyis nyah hwankti yhen jyeidwis jens lyis vmingh dyei toh.

⁹Hauh gyo lyis hwankti yhen khau mha hwankti nyhiq Washti eq vmesbih jens xiklyis pwe kuot dyei nyeis.

¹⁰Hwankti ka nyah pwe nyhet vnyeih lyis zvbiq shuk las dvtsiq pyo teh ge. Housoeh nyang gas nyah jyeidwis jens nghuot dah Mehuman, Biztha, Harbona, Bigtha, Abagtha, Zetha yahge Kharka, unuk nyhet yuk moq lyis khi.

¹¹Nyang nyamoq lyis hwankti nyhiq Washti lhyi nyah hwankti buismuk tsungh las shwih los aq ge vmingh dyei. Hwankti nyhiq gas yungh dah vmesbih nghuot. Nyang yungh cho lhyi, hwankti ka nyah zau jens, nyah boenghwus jens lyis chixoeuq mes.

¹²Nghuot laus eq jyeidwis jens hwankti nyhiq Washti lhyi hwankti dah zau dang taiq kyoh lyis nyang los das zis ngoek. Houka hwankti lhyi phot phot tsoeu nhang.

¹³Hwankti jens gas lyi yahge lyi jus cho mha lyes bang lyis joeui gyangh nyei. Housoeh las hwankti ka cha kuot chah zis seq, nyah dah joeui dyei bang lyis khi.

¹⁴Hwankti vjangh nyei dah joeui bos bang gas Kharshena, Shethar, Admatha, Tarshish, Mere, Marsena yahge Memukhan moq nghuot. Nyamoq gas yhaugyen dah Persia yahge Media zau jens nyhet yuk nghuot. Nyamoq gas munghdan mas nyhang thank zau jens nghuot.

¹⁵Nyang haih bang lyis taiq, ngos hwankti Xerxes ka ngah jyeidwis jens lyis nhang lha hwankti nyhiq Washti lhyi zaudang khyoq laus eq nyang domsyos gyo das zis ngoek. Nyang lyis, yang lyi khyvlyis khasoeh kuot chah lah, ge.

¹⁶Hauh uhlyis hwankti yahge nyah xam changh jens lyis Memukhan taiq hoeuh zis gas, Hwankti nyhiq Washti ka hwankti lhyi kyingh ma phauh gis kuot zis ma nghuot; nyah xam changh jens lyis eq ma phauhgis kuot goeus. Jyoengh, nyang guon mau dvnganh mas dah dius jens yuk khanghmuh lyis ma phauh gis kuot goeus.

¹⁷Hwankti Xerxes guon dah mau mas dah vmesbih jens hwankti nyhiq kuot goeus cho xauhgyo yah dvyih nyamoq dah yhensain phoq jens lyis dius ngis khyoq xi loh das. Nyamoq gas, Hwankti Xerxes gas hwankti nyhiq Washti lhyi nyah jyank mas los aq ge zaudang khyoq yvlyis ngoek, ge das.

¹⁸Persia yahge Media zau nyhiq jens hwankti nyhiq kuot cho lhyi xauhgyo lyis, nyamoq gas buis ma wvng shih lyis hauh cho nyamoq dah yhensain phoq jens lyis taiq kyoh das. Dvkhauyah dah yhensain nyhiq jens nyamoq dah yhensain phoq jens lyis ma phauh ma nyang kuot das las yhensain phoq jens eq nyamoq dah yhensain nyhiq jens lyis nhaiqyo das.

¹⁹Hwankti nhaiqdoeus lyis gas, Washti ka hwankti xikkhonh mas khanhamp eq ma doms xauh wvng lo bas jungh, oen hwankti dah taiq hoeuh cho kuot aq. Khanhamp eq ma yoh thaiq lo dah Persia Mede dah lyi mas lhaih toh aq. Lho lha nyah hwankti nyhiq joqyos lyis nyah thoq lyis zes gis dah vmesbih lyis dyei aq.

²⁰Hai hwankti guon dah mau zainsmuh dvkhau yah nah taiq hoeuh cho kuot goeus ya, vmesbih khanghmuh gas nyamoq dah yhensain phoq jens lyis dis laus, nyungs laus vjangh vgus phauh nyang das, ge.

²¹Hai Memukhan joeui dyei yvlyis hwankti yahge nyah zau jens gyo o lha, hwankti ka chank kuot.

²²Nyang gas, nyah mauxom dvkoeuq dvkoeuq mas nyah nyingh, nyah maussauh yah yhensain phoq khanghmuh gas vsainnyang yhen mha uhshe soeu nghuot chah, nyah dang goeng chah ge loeus kyoh kat.