Read Achang ESTHER 2 Bible Online

ESTHER 2 - Achang bible

ESTHER 2

¹Hauh thang lhyi hwankti nhaiqyo bi lyis, Washti kuot goeus cho yahge nyang vmingh hoeuh kat cho lhyi soh.

²Housoeh las hwankti yah ni dah nyah joeui dyei bang dvyhamh nyang lyis joeui dyei. Nah xiklyis yungh dah lonyi gyingh jens xo cho chamus ma kuot?

³Munghdan mas dah mauxom khanghmuh mas zau toeuq toh las nyamoq gas hai yungh dah lonyi jens lyis hai wusmuh Susa, nah vmesbih jens toh dah yhen mha shwih los nhang aq. Nyamoq lyis vmesbih jens lyis yoeuh dah nah unuk Hegai loq mas kyauh zis yah yungh shoq dyangh nhang aq.

⁴Hauh thang lhyi nvng ngwis thank dah lonyi yoeus las nyang lyis Washti dah joqyos mas hwankti nyhiq kuot aq, ge. Hwankti eq haih zis gis dah joeui dyei cho nghuot ge nghamh las chank kuot.

⁵Susa wus mas Yair lo Mordekhai ge dah Jew dvyuk nyeis. Nyang gas Benyamin vkoq, Kish yahge Shimei dah vnyau vshih nghuot.

⁶Babilon hwankti Nebukhaneza yah Yuda hwankti Yehoiakhin lhyi Yerusalem masyah nyhik las jonsdoeus bang dvphung yah dvgeh shwih jons loh uhlyis, hauh bang mas Mordekhai bos.

⁷Nyang mas nyah phvthank dah lonyi Esther bos, nyah Hebre nyings gas Hadasa nghuot. Nyah nyhiphoq shei uhlyis Mordekhai ka nyang lyis shwih nyhoeu lha nyah lonyi gyingh teh nyhoeu bes kat. Nyang gas gungs eq nyoqnho eq yungh dah lonyi nghuot.

⁸Hwankti dah taiq hoeuh cho vsaiq thuq kat lyis, lonyi jens nyoshoq Susa mas tsain shwih jweh los, Esther eq houmha bos. Nyang eq hwankti yhen, lonyi jens toh dah yhen lyis yoeuh dah Hegai loq mas kyauh las dyangh zis xauh.

⁹Hegai gas Esther lhyi nhaiqdoeus las Esther ka nyoqnho yoh. Housoeh Hegai gas nyang lyis lvnyap yungh shoq lhyenwhei sop dyei, lhyenwhei zonoms dyei. Nyang lyis hau vmesbih jens nyeis dah yhen mha gis thank joqyos dyei las, nyang lyis phuqsoe das nyhenshang hwankti yhen mha dah lonyi jens masyah nyhet yuk lhyenwhei khyen toh dyei.

¹⁰Gvshih Esther ka nyang Jew dius nghuot zis zauh toh aq ge Mordekhai joeui dyei toh vgus nyang zauh toh.

¹¹Mordekhai ka Esther khasoeh nghuot nyeis zis yahge cha bweh los zis xo yoeuh das zis, lonyi jens nyeis dah yhen khyam xik mas nyeih yau nyeih e los suh nyeis.

¹²Vmesbih jens shunk cho kuot zis vjangh dvzvn nyangh. Gungs lyis mura coeu yah nis shunk zis lhamhmuh khyuk khyvp, basam coeu yah shunk zis khyuk khyvp nghuot shih. Hauh thang lhyi, vmesbih dvyuk dvyuk nyah toeuh yah hwankti Xerxes jyank mas shwih loh zis xauh.

¹³Nyang, lonyi jens nyeis yhen mhayah hwankti yhen pheh loh uhlyis nyang o zis cha eq yoh wuot.

¹⁴Nyang houmha nyenhthang lhyi loh das las nungs nvp gas hwankti dah nyinhungh jens lyis yoeuh dah unuk Sha Ashga dyangh dah vmesbih jens yhen gohtoeu dvyhen mha shwih kat das. Hwankti ngwis las nyings yoeus ma doms lui dvchank nyah jyank mas ma gis loh.

¹⁵Nyah lonyi teh shwih nyhoeu toh, Mordekhai dah phvthank Abihail lonyi Esther ka hwankti jyank mas loh das toeuh jweh lyis, vmesbih jens yhen lhyi yoeuh soeu, hwankti dah unuk Hegai nyang lyis joeui dyei las wuot nhang zis dvwuot. Esther lhyi nyvng soeu khanghmuh nyang lyis yoeuh jyet.

¹⁶Housoeh hwankti Xerxes hwankti doq zis nyhet vzvn, Tebet ge lhamhmuh dvci vkhyvp lyis Esther ka hwankti yhen, hwankti Xerxes jyank mas shwih kat zis xauh.

¹⁷Hwankti ka Esther lhyi gohtoeu vmesbih jens thoq lyis zes ngwis las, nyang gas gohtoeu gohyuk thoq lyis nyoqnho yoh, jyet zis xauh. Housoeh hwankti ka nyah uhloms mas buismuk tsungh dyei zis yah nyang lyis Washti dah joqyos mas hwankti nyhiq duot nhang.

¹⁸Hauh thang lhyi hwankti ka Esther lhyi nyoqnho ngelang dyei dah pwe zainsmuh dvkoeuq kuot dyei las nyah zau jens yahge guon bang dvnganh lyis yus. Nyang guon dah munghdan gonh mas xent buisnyeis dvnyeih dyei[2] cho hoeuh kat. Hwankti yah mon dah jyungshuk eq dyei gvm.

¹⁹Hauh yoq lyis hwankti ka Mordekhai lyis guon cho vkhom dvkoeuq mas toeuq toh.

²⁰Esther ka Mordekhai nyang lyis taiq toh vgus, nyang Jew dius nghuot yvlyis gvshih jweh shoq hank lyis eq ma seq nhang. Nyang gas ngis shih lyis Mordekhai dah domsyos gyo zis yah dvyhangteh haih cho mha eq domsyos gyo.

²¹Mordekhai hwankti yhen mha muh zwi uhlyis hwankti yvp jens mas wvng khomh tsain zungh vzomh, hwankti yhen unuk Bigthan yahge Teresh gas hwankti Xerxes lyis nhaiqnos las sat das ge tsain lhaink nyeis.

²²Hauh cho Mordekhai seq las hwankti nyhiq Esther lyis taiq kyoh. Esther eq Mordekhai nyvng cho hwankti lhyi taiq kyoh.

²³Hauh cho lhyi choq yoeuh lyis hau taiq los cho ka jus yvlyis nyvng. Housoeh nyah aiq yuk gonh lyis tapzains mas lhangh sat. Hwankti ka hauh cho lhyi hau munghdan sungson mha lhaih comh toh das zis zaudang khyoq.