Read Achang ESTHER 3 Bible Online

ESTHER 3 - Achang bible

ESTHER 3

¹Dvtsiq nyangh thang lhyi hwankti Xerxes gas Haman ge soeu lhyi guon zau zainsmuh vkhom toqh dyei. Haman gas Agag vnyau vshih[3] Hamedatha lo nghuot.

²Hwankti ka Haman lyis phvluk thuk gop zis yah phauh nyang cho chixoeuq das xiklyis nyah muh mas dah zau jens dvnganh lyis zaudang khyoq toh. Kuot das zis ngoek dah Mordekhai mha lai las, dvnganhmoq chank kuot.

³Hwankti muh mas dah gohtoeu zau jens gas Mordekhai lyis chamus hwankti dah zau dang lyis ngoek lah, ge tsain nyei las,

⁴nyamoq nyeih yau nyeih hauh cho chank kuot das xiklyis yomdyei laus eq, nyang nyamoq dang ma gyo dyei. Ngos Jew nghuot las Haman lyis ma yoh gop paiq, ge. Housoeh las nyamoq gas Mordekhai kuot cho lhyi Haman jhen das ma jhen das cho seq mes las Haman lyis tsain taiq kyoh.

⁵Haman gas Mordekhai nyang lyis phvluk thuk ma gop paiq das yvlyis sohseq lyis nhaiqlom phot phot tsoeu.

⁶Mordekhai ka Jew nghuot yvlyis seq goeus ya Haman gas Mordekhai dvyuk lyis kyingh ma nghuot, Persia munghdan gonh mas dah Jew dvnganh lyis sat das zis nghamh thyet las nghamh toeuq nyeis.

⁷Hwankti Xerxes guon zis dvci aiq vzvn, Nisan ge, lhamhmuh cangxeih vkhyvp lyis Haman gas nyang lhaink cho kuot thuq kat das zis doeus dah buisnyeis lyis Purim ge dah doeugoh cho kuot nhang lhyi Adar ge, dvci aiq vkhyvp, dvci somh vnyeih lyis thyet toh.

⁸Housoeh las Haman, hwankti Xerxes lyis taiq zis gas, Nah munghdan mauxom khanghmuh dvkhauyah dyos joq dah dius dvnyau bos. Nyamoq dah thungh lyi gas gohtoeu dius nyau hank yah eq ma doeusgoh. Hauh thoq lyis nyamoq gas munghdan lyi ma chank. Housoeh las nyamoq lyis jhen nyeis das zis gas nah xiklyis vkyuh ma bos das.

⁹Hwankti gyo lyis gas, nyamoq lyis sat tomh das zis vmingh thuq kat aq. Nvng housoeh kuot das lyis gas munghdan guon cho nyhenshang hwankti ziskwi mha ngwis 375 tan kat toh das zis ngos pauh das, ge.

¹⁰Hauh uhlyis hwankti ka nyang taiq hoeuh cho lyi wvng das xiklyis kyihau tap chah dah nyah loqkyop khyuot las Jew jens dah jes, Agag vnyau vshih Hamedatha lo Haman lyis dyei.

¹¹Hwankti, Haman lyis taiq zis gas, dius jens yahge nyamoq dah ngwis gas nah zis nghuot; nyamoq lyis nvng o khyvlyis kuot aq, ge.

¹²Housoeh las cangxeih vkhyvp dvci somh vnyeih lyis Haman gas hwankti dah lhaih comh bang lyis khi lha, Haman gas hoeuh kat das cho lhyi nyang taiq las lhaih nhang lha munghdan dius nyau vja ja dah nyingh khanghmuh pheh thaiq lhaih nhang. Hauh maussauh lyis guon bang, mungh zau jens yahge zau jens jyank mas huon kat nhang. Hauh zaudang lyis hwankti Xerxes dah nyings yah thuq kat las nyah loqkyop kyihau tap toh.

¹³Maussauh dih bang gas hai hoeuh kat cho lhyi munghdan khau, mauxom khanghmuh mas yoeus loh. Houmha bos dah shet cho ka, Adar ge, dvci aiq vkhyvp dvci somh vnyeih dvnyeih dvm lyis Jew dius ngislo kuhlo, loshang yahge vmesbih jens dvnganh lyis sat tomh tyamp das. Nyamoq lyis nhaiq ma nyen lo sat das. Nyamoq yah sen zis yoeus tyamp das.

¹⁴Hauh buisnyeis jweh lyis yuk khanghmuh cicont nghuot das xiklyis, mauxom khanghmuh mas bang lyis hau hoeuh kat yvmas bos zis taiq kyoh chah.

¹⁵Hwankti dah vmingh yah hau zau dang gas wusmuh Susa mas kyoh kat thang lhyi maussauh dih bang hauh loeus mauxom pheh tsain dih loh. Susa wugungs mas ma nyens ma tap khamkhvv nyeis uhlyis hwankti yahge Haman gas zvbiq tsung shuk goh nyeis.