Read Achang ESTHER 4 Bible Online

ESTHER 4 - Achang bible

ESTHER 4

¹Hau bweh goeus cho dvnganh Mordekhai seq lyis, nyang chiqjyen zis yah nyah dyimis langchuiq tyamp. Hauh thang lhyi nyang yanghthung dyi wuot, uhloms mas nyiyvp lhyauq las wugungs chank kuk zis yah svsoh kaiq ngaus loh.

²Nyang hwankti yhen khyam khomh mas jweh shoq loh. Nyang gas hwankti yhen khyam khau mha ma wvng loh: khasoeh ge lyis yanghthung dyi wuot soeu hank lyis eq hauh vkhau mha ma wvng nhang.

³Hwankti hoeuh kat cho seq dah mauxom dvkhauyah nyeis dah Jew jens mas svsoh tsain kuk ngaus nyeis. Nyamoq gas womkyi, ngaus, kukxi zis yah nyothyang ka yanghthung dyi wuot las nyiyvp boms mas lhain toh.

⁴Esther dah jyeidwis vmesbih jens yahge unuk jens gas Mordekhai cha kuot nyeis zis nyang lyis los tsain taiq kyoh lyis nyang svsoh ehnyet nyo. Nyang Mordekhai lyis nyah yanghthung dyi thaiq das xiklyis dyimis dyei kat laus eq, Mordekhai ma lhom yoeus.

⁵Esther ka hwankti yah nyah jyeidwis khyvlyis toeuq kat toh dyei dah hwankti yhen mha dah unuk Hathak lyis khi lha, Mordekhai cha mus nyeis, nyang chamus housoeh kuot zis loh nyei xo nhang.

⁶Hathak gas hwankti yhen khomhdwang xikkhonh, wusmuh cho mha, Mordekhai jyank mas e.

⁷Mordekhai ka nyang mas bweh joq cho dvnganh, Haman gas Jew dius dvnganh lyis sat tomh lyis hwankti ziskwi mha ngwis khanyhoq kat toh das ge dangthoengh toh cho Hathak lyis taiq kyoh.

⁸Mordekhai ka Hathak lyis, Jew jens dah dyoqbis cho zaudang, Susa wus mas hoeuh cho thuq kat dah maussauh dvkhyvp dyei. Mordekhai ka nyang lyis hauh maussauh Esther jyank mas chi loh las hauh cho jeis phui kyoh das xiklyis sang. Lho lha Esther ka nyah dius jens xiklyis hwankti jyank mas nhaiqnyen cho loh dung das zis eq tying kat.

⁹Hathak gas Mordekhai dah dang Esther lhyi los taiq kyoh.

¹⁰Esther ka Hathak lyis yah, Mordekhai lhyi haih loeus doms dyei kat.

¹¹Vbusbih vmesbih hank laus eq hwankti ma khi khi, vkhau khyam pheh hwankti jyank mas wvng lyis, hauh soeu ka shei chah. Houka lyi nghuot yvlyis hwankti lhyi joeui dyei bang mas zis mauxom mha dius jens dvnganhmoq seq. Hauh lyi lyis yoh jhank das zis dvcho kyingh dvbos. Hwankti ka nyah xing dunghkuq tuonh kat lyis hau zangh wvng soeu kang luiq. Ngos lyis eq hwankti ma khi zis lhamhmuh dvkhyvp nghuot goeus, ge.

¹²Mordekhai gas Esther dah dang xauhgyo lyis,

¹³Esther lyis haih zaih nhang cho taiq kat. Nvng gas hwankti yhen mha xauh nyeis las gohtoeu Jew jens thoq lyis sam cho bos oen vnghamh.

¹⁴Heiteh shishenh lyis nvng samlo nyeis lyis gas, Jew jens lyis gohyos masyah pangh cho los las nyamoq luiq das laus eq, nvng shei das, nah uwus yhenbang eq jom das. Nghuot laus eq nvng hwankti nyhiq duot nyeis zis gas haih shishenh xiklyis nghuot, mvbeh zis hank seq, ge.

¹⁵Hai Esther dah phuk dang Mordekhai lhyi dyei kat.

¹⁶Susa wus mas dah Jew jens dvnganhmoq dvgeh loh tsainh las, somh nyeih somh nyens ma zo ma shuk, ngah xiklyis womkyi lha shvmanh dung dyei geh. Ngah jyeidwis vmesbih jens yahge ngos eq vgus housoeh kuot das. Hauh thang lhyi ngos lyi yah tyi laus eq ngos hwankti jyank mas loh das. Ngos shei chah lyis, laus eq shei das, ge.

¹⁷Hauh thang lhyi Mordekhai ka Esther kuot aq ge taiq kat zis dvnganh loh kuot.